Read Roman Urdu Geo zabūr 91 Bible Online

zabūr 91 - Roman Urdu Geo bible

zabūr 91

¹jo allāh t'ālā kī panāh meṅ rahe wuh qādir-e-mutlaq ke sāy meṅ sukūnat karegā.

²maiṅ kahūṅgā, “ai rab, tū merī panāh aur merā qilā hai, merā ḳhudā jis par maiṅ bharosā rakhtā hūṅ.”

³kyūṅki wuh tujhe chiṛīmār ke phande aur mohlak marz se chhuṛāegā.

⁴wuh tujhe apne shāhparoṅ ke nīche ḍhāṅp legā, aur tū us ke paroṅ tale panāh le sakegā. us kī wafādārī terī ḍhāl aur pushtā rahegī.

⁵rāt kī dahshatoṅ se ḳhauf mat khā, na us tīr se jo din ke waqt chale.

⁶us mohlak marz se dahshat mat khā jo tārīkī meṅ ghūme phire, na us wabāī bīmārī se jo dopahar ke waqt tabāhī phailāe.

⁷go tere sāth khaṛe hazār afrād halāk ho jāeṅ aur tere dahne hāth das hazār mar jāeṅ, lekin tū us kī zad meṅ nahīṅ āegā.

⁸tū apnī āṅkhoṅ se is kā mulāhazā karegā, tū ḳhud bedīnoṅ kī sazā dekhegā.

⁹kyūṅki tū ne kahā hai, “rab merī panāhgāh hai,” tū allāh t'ālā ke sāy meṅ chhup gayā hai.

¹⁰is lie terā kisī balā se wāstā nahīṅ paṛegā, koī āfat bhī tere ḳhaime ke qarīb phaṭakne nahīṅ pāegī.

¹¹kyūṅki wuh apne farishtoṅ ko har rāh par terī hifāzat karne kā hukm degā,

¹²aur wuh tujhe apne hāthoṅ par uṭhā leṅge tāki tere pāoṅ ko patthar se ṭhes na lage.

¹³tū sherbabaroṅ aur zahrīle sāṅpoṅ par qadam rakhegā, tū jawān sheroṅ aur azhdahāoṅ ko kuchal degā.

¹⁴rab farmātā hai, “chūṅki wuh mujh se lipṭā rahtā hai is lie maiṅ use bachāūṅgā. chūṅki wuh merā nām jāntā hai is lie maiṅ use mahfūz rakhūṅgā.

¹⁵wuh mujhe pukāregā to maiṅ us kī sunūṅgā. musībat meṅ maiṅ us ke sāth hūṅgā. maiṅ use chhuṛā kar us kī izzat karūṅga.

¹⁶maiṅ use umr kī darāzī baḳhshūṅgā aur us par apnī najāt zāhir karūṅga.”