Read Roman Urdu Geo zabūr 92 Bible Online

zabūr 92 - Roman Urdu Geo bible

zabūr 92

¹zabūr. sabat ke lie gīt. rab kā shukr karnā bhalā hai. ai allāh t'ālā, tere nām kī madahsarāī karnā bhalā hai.

²subh ko terī shafqat aur rāt ko terī wafā kā elān karnā bhalā hai,

³ḳhāskar jab sāth sāth das tāroṅ wālā sāz, sitār aur sarod bajte haiṅ.

⁴kyūṅki ai rab, tū ne mujhe apne kāmoṅ se ḳhush kiyā hai, aur tere hāthoṅ ke kām dekh kar maiṅ ḳhushī ke nāre lagātā hūṅ.

⁵ai rab, tere kām kitne azīm, tere ḳhayālāt kitne gahre haiṅ.

⁶nādān yih nahīṅ jāntā, ahmaq ko is kī samajh nahīṅ ātī.

⁷go bedīn ghās kī tarah phūṭ nikalte aur badkār sab phalte phūlte haiṅ, lekin āḳhirkār wuh hameshā ke lie halāk ho jāeṅge.

⁸magar tū, ai rab, abad tak sarbuland rahegā.

⁹kyūṅki tere dushman, ai rab, tere dushman yaqīnan tabāh ho jāeṅge, badkār sab titar-bitar ho jāeṅge.

¹⁰tū ne mujhe janglī bail kī sī tāqat de kar tāzā tel se masah kiyā hai.

¹¹merī āṅkh apne dushmanoṅ kī shikast se aur mere kān un sharīroṅ ke anjām se lutfandoz hue haiṅ jo mere ḳhilāf uṭh khaṛe hue haiṅ.

¹²rāstbāz khajūr ke daraḳht kī tarah phale phūlegā, wuh lubnān ke deodār ke daraḳht kī tarah baṛhegā.

¹³jo paude rab kī sukūnatgāh meṅ lagāe gae haiṅ wuh hamāre ḳhudā kī bārgāhoṅ meṅ phaleṅ phūleṅge.

¹⁴wuh buṛhāpe meṅ bhī phal lāeṅge aur tar-o-tāzā aur hare-bhare raheṅge.

¹⁵us waqt bhī wuh elān kareṅge, “rab rāst hai. wuh merī chaṭān hai, aur us meṅ nārāstī nahīṅ hotī.”