Read Roman Urdu Geo zabūr 94 Bible Online

zabūr 94 - Roman Urdu Geo bible

zabūr 94

¹ai rab, ai intiqām lene wāle ḳhudā! ai intiqām lene wāle ḳhudā, apnā nūr chamkā.

²ai duniyā ke munsif, uṭh kar maġhrūroṅ ko un ke āmāl kī munāsib sazā de.

³ai rab, bedīn kab tak, hāṅ kab tak fath ke nāre lagāeṅge?

⁴wuh kufr kī bāteṅ ugalte rahte, tamām badkār sheḳhī mārte rahte haiṅ.

⁵ai rab, wuh terī qaum ko kuchal rahe, terī maurūsī milkiyat par zulm kar rahe haiṅ.

⁶bewāoṅ aur ajnabiyoṅ ko wuh maut ke ghāṭ utār rahe, yatīmoṅ ko qatl kar rahe haiṅ.

⁷wuh kahte haiṅ, “yih rab ko nazar nahīṅ ātā, yāqūb kā ḳhudā dhyān hī nahīṅ detā.”

⁸ai qaum ke nādāno, dhyān do! ai ahmaqo, tumheṅ kab samajh āegī?

⁹jis ne kān banāyā, kyā wuh nahīṅ suntā? jis ne āṅkh ko tashkīl diyā kyā wuh nahīṅ deḳhtā?

¹⁰jo aqwām ko tambīh kartā aur insān ko tālīm detā hai kyā wuh sazā nahīṅ detā?

¹¹rab insān ke ḳhayālāt jāntā hai, wuh jāntā hai ki wuh dam bhar ke hī haiṅ.

¹²ai rab, mubārak hai wuh jise tū tarbiyat detā hai, jise tū apnī sharīat kī tālīm detā hai

¹³tāki wuh musībat ke dinoṅ se ārām pāe aur us waqt tak sukūn se zindagī guzāre jab tak bedīnoṅ ke lie gaṛhā tayyār na ho.

¹⁴kyūṅki rab apnī qaum ko radd nahīṅ karegā, wuh apnī maurūsī milkiyat ko tark nahīṅ karegā.

¹⁵faisle dubārā insāf par mabnī hoṅge, aur tamām diyānatdār dil us kī pairawī kareṅge.

¹⁶kaun sharīroṅ ke sāmne merā difā karegā? kaun mere lie badkāroṅ kā sāmnā karegā?

¹⁷agar rab merā sahārā na hotā to merī jān jald hī ḳhāmoshī ke mulk meṅ jā bastī.

¹⁸ai rab, jab maiṅ bolā, “merā pāoṅ ḍagmagāne lagā hai” to terī shafqat ne mujhe saṅbhālā.

¹⁹jab tashwīshnāk ḳhayālāt mujhe bechain karne lage to terī tasalliyoṅ ne merī jān ko tāzādam kiyā.

²⁰ai allāh, kyā tabāhī kī hukūmat tere sāth muttahid ho saktī hai, aisī hukūmat jo apne farmānoṅ se zulm kartī hai? hargiz nahīṅ!

²¹wuh rāstbāz kī jān lene ke lie āpas meṅ mil jāte aur bequsūroṅ ko qātil ṭhahrāte haiṅ.

²²lekin rab merā qilā ban gayā hai, aur merā ḳhudā merī panāh kī chaṭān sābit huā hai.

²³wuh un kī nāinsāfī un par wāpas āne degā aur un kī sharīr harkatoṅ ke jawāb meṅ unheṅ tabāh karegā. rab hamārā ḳhudā unheṅ nest karegā.