Read Roman Urdu Geo zabūr 95 Bible Online

zabūr 95 - Roman Urdu Geo bible

zabūr 95

¹āo, ham shādiyānā bajā kar rab kī madahsarāī kareṅ, ḳhushī ke nāre lagā kar apnī najāt kī chaṭān kī tamjīd kareṅ!

²āo, ham shukrguzārī ke sāth us ke huzūr āeṅ, gīt gā kar us kī satāish kareṅ.

³kyūṅki rab azīm ḳhudā aur tamām mābūdoṅ par azīm bādshāh hai.

⁴us ke hāth meṅ zamīn kī gahrāiyāṅ haiṅ, aur pahāṛ kī bulandiyāṅ bhī usī kī haiṅ.

⁵samundar us kā hai, kyūṅki us ne use ḳhalaq kiyā. ḳhushkī us kī hai, kyūṅki us ke hāthoṅ ne use tashkīl diyā.

⁶āo ham sijdā kareṅ aur rab apne ḳhāliq ke sāmne jhuk kar ghuṭne ṭekeṅ.

⁷kyūṅki wuh hamārā ḳhudā hai aur ham us kī charāgāh kī qaum aur us ke hāth kī bheṛeṅ haiṅ. agar tum āj us kī āwāz suno

⁸“to apne diloṅ ko saḳht na karo jis tarah marībā meṅ huā, jis tarah registān meṅ massā meṅ huā.

⁹wahāṅ tumhāre bāpdādā ne mujhe āzmāyā aur jāṅchā, hālāṅki unhoṅ ne mere kām dekh lie the.

¹⁰chālīs sāl maiṅ us nasl se ghin khātā rahā. maiṅ bolā, ‘un ke dil hameshā sahīh rāh se haṭ jāte haiṅ, aur wuh merī rāheṅ nahīṅ jānte.’

¹¹apne ġhazab meṅ maiṅ ne qasam khāī, ‘yih kabhī us mulk meṅ dāḳhil nahīṅ hoṅge jahāṅ maiṅ unheṅ sukūn detā’.”