Read Roman Urdu Geo zabūr 96 Bible Online

zabūr 96 - Roman Urdu Geo bible

zabūr 96

¹rab kī tamjīd meṅ nayā gīt gāo, ai pūrī duniyā, rab kī madahsarāī karo.

²rab kī tamjīd meṅ gīt gāo, us ke nām kī satāish karo, roz-ba-roz us kī najāt kī ḳhushḳhabrī sunāo.

³qaumoṅ meṅ us kā jalāl aur tamām ummatoṅ meṅ us ke ajāib bayān karo.

⁴kyūṅki rab azīm aur satāish ke bahut lāiq hai. wuh tamām mābūdoṅ se mahīb hai.

⁵kyūṅki dīgar qaumoṅ ke tamām mābūd but hī haiṅ jabki rab ne āsmān ko banāyā.

⁶us ke huzūr shān-o-shaukat, us ke maqdis meṅ qudrat aur jalāl hai.

⁷ai qaumoṅ ke qabīlo, rab kī tamjīd karo, rab ke jalāl aur qudrat kī satāish karo.

⁸rab ke nām ko jalāl do. qurbānī le kar us kī bārgāhoṅ meṅ dāḳhil ho jāo.

⁹muqaddas libās se ārāstā ho kar rab ko sijdā karo. pūrī duniyā us ke sāmne laraz uṭhe.

¹⁰qaumoṅ meṅ elān karo, “rab hī bādshāh hai! yaqīnan duniyā mazbūtī se qāim hai aur nahīṅ ḍagmagāegī. wuh insāf se qaumoṅ kī adālat karegā.”

¹¹āsmān ḳhush ho, zamīn jashn manāe! samundar aur jo kuchh us meṅ hai ḳhushī se garaj uṭhe.

¹²maidān aur jo kuchh us meṅ hai bāġh bāġh ho. phir jangal ke daraḳht shādiyānā bajāeṅge.

¹³wuh rab ke sāmne shādiyānā bajāeṅge, kyūṅki wuh ā rahā hai, wuh duniyā kī adālat karne ā rahā hai. wuh insāf se duniyā kī adālat karegā aur apnī sadāqat se aqwām kā faislā karegā.