Read Roman Urdu Geo amsāl 11 Bible Online

amsāl 11 - Roman Urdu Geo bible

amsāl 11

¹rab ġhalat tarāzū se ghin khātā hai, wuh sahīh tarāzū hī se ḳhush hotā hai.

²jahāṅ takabbur hai wahāṅ badnāmī bhī qarīb hī rahtī hai, lekin jo halīm hai us ke dāman meṅ hikmat rahtī hai.

³sīdhī rāh par chalne wāloṅ kī diyānatdārī un kī rāhnumāī kartī jabki bewafāoṅ kī namak-harāmī unheṅ tabāh kartī hai.

⁴ġhazab ke din daulat kā koī fāidā nahīṅ jabki rāstbāzī logoṅ kī jān ko chhuṛātī hai.

⁵be'ilzām kī rāstbāzī us kā rāstā hamwār banā detī hai jabki bedīn kī burī harkateṅ use girā detī haiṅ.

⁶sīdhī rāh par chalne wāloṅ kī rāstbāzī unheṅ chhuṛā detī jabki bewafāoṅ kā lālach unheṅ phaṅsā detā hai.

⁷dam toṛte waqt bedīn kī sārī ummīd jātī rahtī hai, jis daulat kī tawaqqo us ne kī wuh jātī rahtī hai.

⁸rāstbāz kī jān musībat se chhūṭ jātī hai, aur us kī jagah bedīn phaṅs jātā hai.

⁹kāfir apne muṅh se apne paṛosī ko tabāh kartā hai, lekin rāstbāzoṅ kā ilm unheṅ chhuṛātā hai.

¹⁰jab rāstbāz kāmyāb hoṅ to pūrā shahr jashn manātā hai, jab bedīn halāk hoṅ to ḳhushī ke nāre buland ho jāte haiṅ.

¹¹sīdhī rāh par chalne wāloṅ kī barkat se shahr taraqqī kartā hai, lekin bedīn ke muṅh se wuh mismār ho jātā hai.

¹²nāsamajh ādmī apne paṛosī ko haqīr jāntā hai jabki samajhdār ādmī ḳhāmosh rahtā hai.

¹³tohmat lagāne wālā dūsroṅ ke rāz fāsh kartā hai, lekin qābil-e-etimād shaḳhs wuh bhed poshīdā rakhtā hai jo us ke sapurd kiyā gayā ho.

¹⁴jahāṅ qiyādat kī kamī hai wahāṅ qaum kā tanazzul yaqīnī hai, jahāṅ mushīroṅ kī kasrat hai wahāṅ qaum fathyāb rahegī.

¹⁵jo ajnabī kā zāmin ho jāe use yaqīnan nuqsān pahuṅchegā, jo zāmin banane se inkār kare wuh mahfūz rahegā.

¹⁶nek aurat izzat se aur zālim ādmī daulat se lipṭe rahte haiṅ.

¹⁷shafīq kā achchhā sulūk usī ke lie fāidāmand hai jabki zālim kā burā sulūk usī ke lie nuqsāndeh hai.

¹⁸jo kuchh bedīn kamātā hai wuh farebdih hai, lekin jo rāstī kā bīj boe us kā ajr yaqīnī hai.

¹⁹rāstbāzī kā phal zindagī hai jabki burāī ke pīchhe bhāgne wāle kā anjām maut hai.

²⁰rab kajdiloṅ se ghin khātā hai, wuh be'ilzām rāh par chalne wāloṅ hī se ḳhush hotā hai.

²¹yaqīn karo, badkār sazā se nahīṅ bachegā jabki rāstbāzoṅ ke farzand chhūṭ jāeṅge.

²²jis tarah sūar kī thūthnī meṅ sone kā chhallā khaṭaktā hai usī tarah ḳhūbsūrat aurat kī betamīzī khaṭaktī hai.

²³allāh rāstbāzoṅ kī ārzū achchhī chīzoṅ se pūrī kartā hai, lekin us kā ġhazab bedīnoṅ kī ummīd par nāzil hotā hai.

²⁴ek ādmī kī daulat meṅ izāfā hotā hai, go wuh fayyāzdilī se taqsīm kartā hai. dūsre kī ġhurbat meṅ izāfā hotā hai, go wuh had se zyādā kanjūs hai.

²⁵fayyāzdil ḳhushhāl rahegā, jo dūsroṅ ko tar-o-tāzā kare wuh ḳhud tāzādam rahegā.

²⁶log gandum ke zakhīrā'andoz par lānat bhejte haiṅ, lekin jo gandum ko bāzār meṅ āne detā hai us ke sar par barkat ātī hai.

²⁷jo bhalāī kī talāsh meṅ rahe wuh allāh kī manzūrī chāhtā hai, lekin jo burāī kī talāsh meṅ rahe wuh ḳhud burāī ke phande meṅ phaṅs jāegā.

²⁸jo apnī daulat par bharosā rakhe wuh gir jāegā, lekin rāstbāz hare-bhare pattoṅ kī tarah phaleṅ phūleṅge.

²⁹jo apne ghar meṅ gaṛbaṛ paidā kare wuh mīrās meṅ hawā hī pāegā. ahmaq dānishmand kā naukar banegā.

³⁰rāstbāz kā phal zindagī kā daraḳht hai, aur dānishmand ādmī jāneṅ jīttā hai.

³¹rāstbāz ko zamīn par hī ajr miltā hai. to phir bedīn aur gunāhgār sazā kyūṅ na pāeṅ?