Read Roman Urdu Geo amsāl 14 Bible Online

amsāl 14 - Roman Urdu Geo bible

amsāl 14

¹hikmat bībī apnā ghar tāmīr kartī hai, lekin hamāqat bībī apne hī hāthoṅ se use ḍhā detī hai.

²jo sīdhī rāh par chaltā hai wuh allāh kā ḳhauf māntā hai, lekin jo ġhalat rāh par chaltā hai wuh use haqīr jāntā hai.

³ahmaq kī bātoṅ se wuh ḍanḍā nikaltā hai jo use us ke takabbur kī sazā detā hai, lekin dānishmand ke hoṅṭ use mahfūz rakhte haiṅ.

⁴jahāṅ bail nahīṅ wahāṅ charnī ḳhālī rahtī hai, bail kī tāqat hī se kasrat kī fasleṅ paidā hotī haiṅ.

⁵wafādār gawāh jhūṭ nahīṅ boltā, lekin jhūṭe gawāh ke muṅh se jhūṭ nikaltā hai.

⁶tānāzan hikmat ko ḍhūṅḍtā hai, lekin befāidā. samajhdār ke ilm meṅ āsānī se izāfā hotā hai.

⁷ahmaq se dūr rah, kyūṅki tū us kī bātoṅ meṅ ilm nahīṅ pāegā.

⁸zahīn kī hikmat is meṅ hai ki wuh soch samajh kar apnī rāh par chale, lekin ahmaq kī hamāqat sarāsar dhokā hī hai.

⁹ahmaq apne qusūr kā mazāq uṛāte haiṅ, lekin sīdhī rāh par chalne wāle rab ko manzūr haiṅ.

¹⁰har dil kī apnī hī talḳhī hotī hai jis se sirf wuhī wāqif hai, aur us kī ḳhushī meṅ bhī koī aur sharīk nahīṅ ho saktā.

¹¹bedīn kā ghar tabāh ho jāegā, lekin sīdhī rāh par chalne wāle kā ḳhaimā phale phūlegā.

¹²aisī rāh bhī hotī hai jo deḳhne meṅ ṭhīk to lagtī hai go us kā anjām maut hai.

¹³dil haṅste waqt bhī ranjīdā ho saktā hai, aur ḳhushī ke iḳhtitām par dukh hī bāqī rah jātā hai.

¹⁴jis kā dil bewafā hai wuh jī bhar kar apne chāl-chalan kā kaṛwā phal khāegā jabki nek ādmī apne āmāl ke mīṭhe phal se ser ho jāegā.

¹⁵sādālauh har ek kī bāt mān letā hai jabki zahīn ādmī apnā har qadam soch samajh kar uṭhātā hai.

¹⁶dānishmand ḍarte ḍarte ġhalat kām se dareġh kartā hai, lekin ahmaq ḳhudetimād hai aur ek dam mushta'il ho jātā hai.

¹⁷ġhusīlā ādmī ahmaqānā harkateṅ kartā hai, aur log sāzishī shaḳhs se nafrat karte haiṅ.

¹⁸sādālauh mīrās meṅ hamāqat pātā hai jabki zahīn ādmī kā sar ilm ke tāj se ārāstā rahtā hai.

¹⁹sharīroṅ ko nekoṅ ke sāmne jhuknā paṛegā, aur bedīnoṅ ko rāstbāz ke darwāze par aundhe muṅh honā paṛegā.

²⁰ġharīb ke hamsāe bhī us se nafrat karte haiṅ jabki amīr ke beshumār dost hote haiṅ.

²¹jo apne paṛosī ko haqīr jāne wuh gunāh kartā hai. mubārak hai wuh jo zarūratmand par tars khātā hai.

²²bure mansūbe bāndhne wāle sab āwārā phirte haiṅ. lekin achchhe mansūbe bāndhne wāle shafqat aur wafā pāeṅge.

²³mehnat-mashaqqat karne meṅ hameshā fāidā hotā hai, jabki ḳhālī bāteṅ karne se log ġharīb ho jāte haiṅ.

²⁴dānishmandoṅ kā ajr daulat kā tāj hai jabki ahmaqoṅ kā ajr hamāqat hī hai.

²⁵sachchā gawāh jāneṅ bachātā hai jabki jhūṭā gawāh farebdih hai.

²⁶jo rab kā ḳhauf māne us ke pās mahfūz qilā hai jis meṅ us kī aulād bhī panāh le saktī hai.

²⁷rab kā ḳhauf zindagī kā sarchashmā hai jo insān ko mohlak phandoṅ se bachāe rakhtā hai.

²⁸jitnī ābādī mulk meṅ hai utnī hī bādshāh kī shān-o-shaukat hai. riāyā kī kamī hukmrān ke tanazzul kā bāis hai.

²⁹tahammul karne wālā baṛī samajhdārī kā mālik hai, lekin ġhusīlā ādmī apnī hamāqat kā izhār kartā hai.

³⁰pursukūn dil jism ko zindagī dilātā jabki hasad haḍḍiyoṅ ko galne detā hai.

³¹jo pasthāl par zulm kare wuh us ke ḳhāliq kī tahqīr kartā hai jabki jo zarūratmand par tars khāe wuh allāh kā ehtirām kartā hai.

³²bedīn kī burāī use ḳhāk meṅ milā detī hai, lekin rāstbāz marte waqt bhī allāh meṅ panāh letā hai.

³³hikmat samajhdār ke dil meṅ ārām kartī hai, aur wuh ahmaqoṅ ke darmiyān bhī zāhir ho jātī hai.

³⁴rāstī se har qaum sarfarāz hotī hai jabki gunāh se ummateṅ ruswā ho jātī haiṅ.

³⁵bādshāh dānishmand mulāzim se ḳhush hotā hai, lekin sharmnāk kām karne wālā mulāzim us ke ġhusse kā nishānā ban jātā hai.