Read Roman Urdu Geo amsāl 15 Bible Online

amsāl 15 - Roman Urdu Geo bible

amsāl 15

¹narm jawāb ġhussā ṭhanḍā kartā, lekin tursh bāt taish dilātī hai.

²dānishmandoṅ kī zabān ilm-o-irfān phailātī hai jabki ahmaq kā muṅh hamāqat kā zor se ubalne wālā chashmā hai.

³rab kī āṅkheṅ har jagah maujūd haiṅ, wuh bure aur bhale sab par dhyān detī haiṅ.

⁴narm zabān zindagī kā daraḳht hai jabki farebdih zabān shikastādil kar detī hai.

⁵ahmaq apne bāp kī tarbiyat ko haqīr jāntā hai, lekin jo nasīhat māne wuh dānishmand hai.

⁶rāstbāz ke ghar meṅ baṛā ḳhazānā hotā hai, lekin jo kuchh bedīn hāsil kartā hai wuh tabāhī kā bāis hai.

⁷dānishmandoṅ ke hoṅṭ ilm-o-irfān kā bīj bikher dete haiṅ, lekin ahmaqoṅ kā dil aisā nahīṅ kartā.

⁸rab bedīnoṅ kī qurbānī se ghin khātā, lekin sīdhī rāh par chalne wāloṅ kī duā se ḳhush hotā hai.

⁹rab bedīn kī rāh se ghin khātā, lekin rāstī kā pīchhā karne wāle se pyār kartā hai.

¹⁰jo sahīh rāh ko tark kare us kī saḳht tādīb kī jāegī, jo nasīhat se nafrat kare wuh mar jāegā.

¹¹pātāl aur ālam-e-arwāh rab ko sāf nazar āte haiṅ. to phir insānoṅ ke dil use kyūṅ na sāf dikhāī deṅ?

¹²tānāzan ko dūsroṅ kī nasīhat pasand nahīṅ ātī, is lie wuh dānishmandoṅ ke pās nahīṅ jātā.

¹³jis kā dil ḳhush hai us kā chehrā khulā rahtā hai, lekin jis kā dil pareshān hai us kī rūh shikastā rahtī hai.

¹⁴samajhdār kā dil ilm-o-irfān kī talāsh meṅ rahtā, lekin ahmaq hamāqat kī charāgāh meṅ chartā rahtā hai.

¹⁵musībatzadā ke tamām din bure haiṅ, lekin jis kā dil ḳhush hai wuh rozānā jashn manātā hai.

¹⁶jo ġharīb rab kā ḳhauf māntā hai us kā hāl us karoṛpatī se kahīṅ behtar hai jo baṛī bechainī se zindagī guzārtā hai.

¹⁷jahāṅ muhabbat hai wahāṅ sabzī kā sālan bahut hai, jahāṅ nafrat hai wahāṅ moṭe-tāze bachhṛe kī ziyāfat bhī befāidā hai.

¹⁸ġhusīlā ādmī jhagaṛe chheṛtā rahtā jabki tahammul karne wālā logoṅ ke ġhusse ko ṭhanḍā kar detā hai.

¹⁹kāhil kā rāstā kāṅṭedār bāṛ kī mānind hai, lekin diyānatdāroṅ kī rāh pakkī saṛak hī hai.

²⁰dānishmand beṭā apne bāp ke lie ḳhushī kā bāis hai, lekin ahmaq apnī māṅ ko haqīr jāntā hai.

²¹nāsamajh ādmī hamāqat se lutfandoz hotā, lekin samajhdār ādmī sīdhī rāh par chaltā hai.

²²jahāṅ salāh-mashwarā nahīṅ hotā wahāṅ mansūbe nākām rah jāte haiṅ, jahāṅ bahut se mushīr hote haiṅ wahāṅ kāmyābī hotī hai.

²³insān mauzūṅ jawāb dene se ḳhush ho jātā hai, waqt par munāsib bāt kitnī achchhī hotī hai.

²⁴zindagī kī rāh chaṛhtī rahtī hai tāki samajhdār us par chalte hue pātāl meṅ utarne se bach jāe.

²⁵rab mutakabbir kā ghar ḍhā detā, lekin bewā kī zamīn kī hudūd mahfūz rakhtā hai.

²⁶rab bure mansūboṅ se ghin khātā hai, aur mehrbān alfāz us ke nazdīk pāk haiṅ.

²⁷jo nājāiz nafā kamāe wuh apne ghar par āfat lātā hai, lekin jo rishwat se nafrat rakhe wuh jītā rahegā.

²⁸rāstbāz kā dil soch samajh kar jawāb detā hai, lekin bedīn kā muṅh zor se ubalne wālā chashmā hai jis se burī bāteṅ nikaltī rahtī haiṅ.

²⁹rab bedīnoṅ se dūr rahtā, lekin rāstbāz kī duā suntā hai.

³⁰chamaktī āṅkheṅ dil ko ḳhushī dilātī haiṅ, achchhī ḳhabar pūre jism ko tar-o-tāzā kar detī hai.

³¹jo zindagībaḳhsh nasīhat par dhyān de wuh dānishmandoṅ ke darmiyān hī sukūnat karegā.

³²jo tarbiyat kī parwā na kare wuh apne āp ko haqīr jāntā hai, lekin jo nasīhat par dhyān de us kī samajh meṅ izāfā hotā hai.

³³rab kā ḳhauf hī wuh tarbiyat hai jis se insān hikmat sīkhtā hai. pahle farotanī apnā le, kyūṅki yihī izzat pāne kā pahlā qadam hai.