Read Roman Urdu Geo amsāl 16 Bible Online

amsāl 16 - Roman Urdu Geo bible

amsāl 16

¹insān dil meṅ mansūbe bāndhtā hai, lekin zabān kā jawāb rab kī taraf se ātā hai.

²insān kī nazar meṅ us kī tamām rāheṅ pāk-sāf haiṅ, lekin rab hī rūhoṅ kī jāṅch-paṛtāl kartā hai.

³jo kuchh bhī tū karnā chāhe use rab ke sapurd kar. tab hī tere mansūbe kāmyāb hoṅge.

⁴rab ne sab kuchh apne hī maqāsid pūre karne ke lie banāyā hai. wuh din bhī pahle se muqarrar hai jab bedīn par āfat āegī.

⁵rab har maġhrūr dil se ghin khātā hai. yaqīnan wuh sazā se nahīṅ bachegā.

⁶shafqat aur wafādārī gunāh kā kaffārā detī haiṅ. rab kā ḳhauf mānane se insān burāī se dūr rahtā hai.

⁷agar rab kisī insān kī rāhoṅ se ḳhush ho to wuh us ke dushmanoṅ ko bhī us se sulah karāne detā hai.

⁸insāf se thoṛā bahut kamānā nāinsāfī se bahut daulat jamā karne se kahīṅ behtar hai.

⁹insān apne dil meṅ mansūbe bāndhtā rahtā hai, lekin rab hī muqarrar kartā hai ki wuh āḳhirkār kis rāh par chal paṛe.

¹⁰bādshāh ke hoṅṭ goyā ilāhī faisle pesh karte haiṅ, us kā muṅh adālat karte waqt bewafā nahīṅ hotā.

¹¹rab durust tarāzū kā mālik hai, usī ne tamām bāṭoṅ kā intizām qāim kiyā.

¹²bādshāh bedīnī se ghin khātā hai, kyūṅki us kā taḳht rāstbāzī kī bunyād par mazbūt rahtā hai.

¹³bādshāh rāstbāz hoṅṭoṅ se ḳhush hotā aur sāf bāt karne wāle se muhabbat rakhtā hai.

¹⁴bādshāh kā ġhussā maut kā peshḳhaimā hai, lekin dānishmand use ṭhanḍā karne ke tarīqe jāntā hai.

¹⁵jab bādshāh kā chehrā khil uṭhe to matlab zindagī hai. us kī manzūrī mausam-e-bahār ke tar-o-tāzā karne wāle bādal kī mānind hai.

¹⁶hikmat kā husūl sone se kahīṅ behtar aur samajh pānā chāṅdī se kahīṅ baṛh kar hai.

¹⁷diyānatdār kī mazbūt rāh bure kām se dūr rahtī hai, jo apnī rāh kī pahrādārī kare wuh apnī jān bachāe rakhtā hai.

¹⁸tabāhī se pahle ġhurūr aur girne se pahle takabbur ātā hai.

¹⁹farotanī se zarūratmandoṅ ke darmiyān basnā ghamanḍiyoṅ ke lūṭe hue māl meṅ sharīk hone se kahīṅ behtar hai.

²⁰jo kalām par dhyān de wuh ḳhushhāl hogā, mubārak hai wuh jo rab par bharosā rakhe.

²¹jo dil se dānishmand hai use samajhdār qarār diyā jātā hai, aur mīṭhe alfāz tālīm meṅ izāfā karte haiṅ.

²²fahm apne mālik ke lie zindagī kā sarchashmā hai, lekin ahmaq kī apnī hī hamāqat use sazā detī hai.

²³dānishmand kā dil samajh kī bāteṅ zabān par lātā aur tālīm dene meṅ hoṅṭoṅ kā sahārā bantā hai.

²⁴mehrbān alfāz ḳhālis shahd haiṅ, wuh jān ke lie shīrīṅ aur pūre jism ko tar-o-tāzā kar dete haiṅ.

²⁵aisī rāh bhī hotī hai jo deḳhne meṅ to ṭhīk lagtī hai go us kā anjām maut hai.

²⁶mazdūr kā ḳhālī peṭ use kām karne par majbūr kartā, us kī bhūk use hāṅktī rahtī hai.

²⁷sharīr kured kured kar ġhalat kām nikāl letā, us ke hoṅṭoṅ par jhulsāne wālī āg rahtī hai.

²⁸kajrau ādmī jhagaṛe chheṛtā rahtā, aur tohmat lagāne wālā dilī dostoṅ meṅ bhī raḳhnā ḍāltā hai.

²⁹zālim apne paṛosī ko warġhalā kar ġhalat rāh par le jātā hai.

³⁰jo āṅkh māre wuh ġhalat mansūbe bāndh rahā hai, jo apne hoṅṭ chabāe wuh ġhalat kām karne par tulā huā hai.

³¹safed bāl ek shāndār tāj haiṅ jo rāstbāz zindagī guzārne se hāsil hote haiṅ.

³²tahammul karne wālā sūrme se sabqat letā hai, jo apne āp ko qābū meṅ rakhe wuh shahr ko shikast dene wāle se bartar hai.

³³insān to qur'ā ḍāltā hai, lekin us kā har faislā rab kī taraf se hai.