Read Roman Urdu Geo amsāl 17 Bible Online

amsāl 17 - Roman Urdu Geo bible

amsāl 17

¹jis ghar meṅ roṭī kā bāsī ṭukṛā sukūn ke sāth khāyā jāe wuh us ghar se kahīṅ behtar hai jis meṅ laṛāī-jhagaṛā hai, ḳhwāh us meṅ kitnī shāndār ziyāfat kyūṅ na ho rahī ho.

²samajhdār mulāzim mālik ke us beṭe par qābū pāegā jo sharm kā bāis hai, aur jab bhāiyoṅ meṅ maurūsī milkiyat taqsīm kī jāe to use bhī hissā milegā.

³sonā-chāṅdī kuṭhālī meṅ pighlā kar pāk-sāf kī jātī hai, lekin rab hī dil kī jāṅch-paṛtāl kartā hai.

⁴badkār sharīr hoṅṭoṅ par dhyān aur dhokebāz tabāhkun zabān par tawajjuh detā hai.

⁵jo ġharīb kā mazāq uṛāe wuh us ke ḳhāliq kī tahqīr kartā hai, jo dūsre kī musībat dekh kar ḳhush ho jāe wuh sazā se nahīṅ bachegā.

⁶pote būṛhoṅ kā tāj aur wālidain apne bachchoṅ ke zewar haiṅ.

⁷ahmaq ke lie baṛī baṛī bāteṅ karnā mauzūṅ nahīṅ, lekin sharīf hoṅṭoṅ par fareb kahīṅ zyādā ġhairmunāsib hai.

⁸rishwat dene wāle kī nazar meṅ rishwat jādū kī mānind hai. jis darwāze par bhī khaṭkhaṭāe wuh khul jātā hai.

⁹jo dūsre kī ġhaltī ko darguzar kare wuh muhabbat ko faroġh detā hai, lekin jo māzī kī ġhaltiyāṅ dohrātā rahe wuh qarībī dostoṅ meṅ nifāq paidā kartā hai.

¹⁰agar samajhdār ko ḍānṭā jāe to wuh ḳhūb sīkh letā hai, lekin agar ahmaq ko sau bār mārā jāe to bhī wuh itnā nahīṅ sīkhtā.

¹¹sharīr sarkashī par tulā rahtā hai, lekin us ke ḳhilāf zālim qāsid bhejā jāegā.

¹²jo ahmaq apnī hamāqat meṅ uljhā huā ho us se dareġh kar, kyūṅki us se milne se behtar yih hai ki terā us rīchhnī se wāstā paṛe jis ke bachche us se chhīn lie gae hoṅ.

¹³jo bhalāī ke iwaz burāī kare us ke ghar se burāī kabhī dūr nahīṅ hogī.

¹⁴laṛāī-jhagaṛā chheṛnā band meṅ raḳhnā ḍālne ke barābar hai. is se pahle ki muqaddamābāzī shurū ho us se bāz ā.

¹⁵jo bedīn ko bequsūr aur rāstbāz ko mujrim ṭhahrāe us se rab ghin khātā hai.

¹⁶ahmaq ke hāth meṅ paisoṅ kā kyā fāidā hai? kyā wuh hikmat ḳharīd saktā hai jabki us meṅ aql nahīṅ? hargiz nahīṅ!

¹⁷paṛosī wuh hai jo har waqt muhabbat rakhtā hai, bhāī wuh hai jo musībat meṅ sahārā dene ke lie paidā huā hai.

¹⁸jo hāth milā kar apne paṛosī kā zāmin hone kā wādā kare wuh nāsamajh hai.

¹⁹jo laṛāī-jhagaṛe se muhabbat rakhe wuh gunāh se muhabbat rakhtā hai, jo apnā darwāzā had se zyādā baṛā banāe wuh tabāhī ko dāḳhil hone kī dāwat detā hai.

²⁰jis kā dil ṭeṛhā hai wuh ḳhushhālī nahīṅ pāegā, aur jis kī zabān chālāk hai wuh musībat meṅ ulajh jāegā.

²¹jis ke hāṅ ahmaq beṭā paidā ho jāe use dukh pahuṅchtā hai, aur aql se ḳhālī beṭā bāp ke lie ḳhushī kā bāis nahīṅ hotā.

²²ḳhushbāsh dil pūre jism ko shifā detā hai, lekin shikastā rūh haḍḍiyoṅ ko ḳhushk kar detī hai.

²³bedīn chupke se rishwat le kar insāf kī rāhoṅ ko bigāṛ detā hai.

²⁴samajhdār apnī nazar ke sāmne hikmat rakhtā hai, lekin ahmaq kī nazareṅ duniyā kī intihā tak āwārā phirtī haiṅ.

²⁵ahmaq beṭā bāp ke lie ranj kā bāis aur māṅ ke lie talḳhī kā sabab hai.

²⁶bequsūr par jurmānā lagānā ġhalat hai, aur sharīf ko us kī diyānatdārī ke sabab se koṛe lagānā burā hai.

²⁷jo apnī zabān ko qābū meṅ rakhe wuh ilm-o-irfān kā mālik hai, jo ṭhanḍe dil se bāt kare wuh samajhdār hai.

²⁸agar ahmaq ḳhāmosh rahe to wuh bhī dānishmand lagtā hai. jab tak wuh bāt na kare log use samajhdār qarār dete haiṅ.