Read Roman Urdu Geo amsāl 19 Bible Online

amsāl 19 - Roman Urdu Geo bible

amsāl 19

¹jo ġharīb be'ilzām zindagī guzāre wuh ṭeṛhī bāteṅ karne wāle ahmaq se kahīṅ behtar hai.

²agar ilm sāth na ho to sargarmī kā koī fāidā nahīṅ. jaldbāz ġhalat rāh par ātā rahtā hai.

³go insān kī apnī hamāqat use bhaṭkā detī hai to bhī us kā dil rab se nārāz hotā hai.

⁴daulatmand ke dostoṅ meṅ izāfā hotā hai, lekin ġharīb kā ek dost bhī us se alag ho jātā hai.

⁵jhūṭā gawāh sazā se nahīṅ bachegā, jo jhūṭī gawāhī de us kī jān nahīṅ chhūṭegī.

⁶muta'addid log baṛe ādmī kī ḳhushāmad karte haiṅ, aur har ek us ādmī kā dost hai jo tohfe detā hai.

⁷ġharīb ke tamām bhāī us se nafrat karte haiṅ, to phir us ke dost us se kyūṅ dūr na raheṅ. wuh bāteṅ karte karte un kā pīchhā kartā hai, lekin wuh ġhāib ho jāte haiṅ.

⁸jo hikmat apnā le wuh apnī jān se muhabbat rakhtā hai, jo samajh kī parwarish kare use kāmyābī hogī.

⁹jhūṭā gawāh sazā se nahīṅ bachegā, jhūṭī gawāhī dene wālā tabāh ho jāegā.

¹⁰ahmaq ke lie aish-o-ishrat se zindagī guzārnā mauzūṅ nahīṅ, lekin ġhulām kī hukmrānoṅ par hukūmat kahīṅ zyādā ġhairmunāsib hai.

¹¹insān kī hikmat use tahammul sikhātī hai, aur dūsroṅ ke jarāim se darguzar karnā us kā faḳhr hai.

¹²bādshāh kā taish jawān sherbabar kī dahāṛoṅ kī mānind hai jabki us kī manzūrī ghās par shabnam kī tarah tar-o-tāzā kartī hai.

¹³ahmaq beṭā bāp kī tabāhī aur jhagaṛālū bīwī musalsal ṭapakne wālī chhat hai.

¹⁴maurūsī ghar aur milkiyat bāpdādā kī taraf se miltī hai, lekin samajhdār bīwī rab kī taraf se hai.

¹⁵sust hone se insān gahrī nīnd so jātā hai, lekin ḍhīlā shaḳhs bhūke maregā.

¹⁶jo wafādārī se hukm par amal kare wuh apnī jān mahfūz rakhtā hai, lekin jo apnī rāhoṅ kī parwā na kare wuh mar jāegā.

¹⁷jo ġharīb par mehrbānī kare wuh rab ko udhār detā hai, wuhī use ajr degā.

¹⁸jab tak ummīd kī kiran bāqī ho apne beṭe kī tādīb kar, lekin itne josh meṅ na ā ki wuh mar jāe.

¹⁹jo had se zyādā taish meṅ āe use jurmānā denā paṛegā. use bachāne kī koshish mat kar warnā us kā taish aur baṛhegā.

²⁰achchhā mashwarā apnā aur tarbiyat qabūl kar tāki āindā dānishmand ho.

²¹insān dil meṅ muta'addid mansūbe bāndhtā rahtā hai, lekin rab kā irādā hameshā pūrā ho jātā hai.

²²insān kā lālach us kī ruswāī kā bāis hai, aur ġharīb daroġhgo se behtar hai.

²³rab kā ḳhauf zindagī kā mambā hai. ḳhudātars ādmī ser ho kar sukūn se so jātā aur musībat se mahfūz rahtā hai.

²⁴kāhil apnā hāth khāne ke bartan meṅ ḍāl kar use muṅh tak nahīṅ lā saktā.

²⁵tānāzan ko mār to sādālauh sabaq sīkhegā, samajhdār ko ḍāṅṭ to us ke ilm meṅ izāfā hogā.

²⁶jo apne bāp par zulm kare aur apnī māṅ ko nikāl de wuh wālidain ke lie sharm aur ruswāī kā bāis hai.

²⁷mere beṭe, tarbiyat par dhyān dene se bāz na ā, warnā tū ilm-o-irfān kī rāh se bhaṭak jāegā.

²⁸sharīr gawāh insāf kā mazāq uṛātā hai, aur bedīn kā muṅh āfat kī ḳhabreṅ phailātā hai.

²⁹tānāzan ke lie sazā aur ahmaq kī pīṭh ke lie koṛā tayyār hai.