Read Roman Urdu Geo amsāl 2 Bible Online

amsāl 2 - Roman Urdu Geo bible

amsāl 2

¹mere beṭe, merī bāt qabūl karke mere ahkām apne dil meṅ mahfūz rakh.

²apnā kān hikmat par dhar, apnā dil samajh kī taraf māil kar.

³basīrat ke lie āwāz de, chillā kar samajh māṅg.

⁴use yūṅ talāsh kar goyā chāṅdī ho, us kā yūṅ khoj lagā goyā poshīdā ḳhazānā ho.

⁵agar tū aisā kare to tujhe rab ke ḳhauf kī samajh āegī aur allāh kā irfān hāsil hogā.

⁶kyūṅki rab hī hikmat atā kartā, usī ke muṅh se irfān aur samajh nikaltī hai.

⁷wuh sīdhī rāh par chalne wāloṅ ko kāmyābī farāham kartā aur be'ilzām zindagī guzārne wāloṅ kī ḍhāl banā rahtā hai.

⁸kyūṅki wuh insāf pasandoṅ kī rāhoṅ kī pahrādārī kartā hai. jahāṅ bhī us ke īmāndār chalte haiṅ wahāṅ wuh un kī hifāzat kartā hai.

⁹tab tujhe rāstī, insāf, diyānatdārī aur har achchhī rāh kī samajh āegī.

¹⁰kyūṅki tere dil meṅ hikmat dāḳhil ho jāegī, aur ilm-o-irfān terī jān ko pyārā ho jāegā.

¹¹tamīz terī hifāzat aur samajh terī chaukīdārī karegī.

¹²hikmat tujhe ġhalat rāh aur kajrau bāteṅ karne wāle se bachāe rakhegī.

¹³aise log sīdhī rāh ko chhoṛ dete haiṅ tāki tārīk rāstoṅ par chaleṅ,

¹⁴wuh burī harkateṅ karne se ḳhush ho jāte haiṅ, ġhalat kām kī kajrawī dekh kar jashn manāte haiṅ.

¹⁵un kī rāheṅ ṭeṛhī haiṅ, aur wuh jahāṅ bhī chaleṅ āwārā phirte haiṅ.

¹⁶hikmat tujhe nājāiz aurat se chhuṛātī hai, us ajnabī aurat se jo chiknī-chupṛī bāteṅ kartī,

¹⁷jo apne jīwansāthī ko tark karke apne ḳhudā kā ahd bhūl jātī hai.

¹⁸kyūṅki us ke ghar meṅ dāḳhil hone kā anjām maut, us kī rāhoṅ kī manzil-e-maqsūd pātāl hai.

¹⁹jo bhī us ke pās jāe wuh wāpas nahīṅ āegā, wuh zindagībaḳhsh rāhoṅ par dubārā nahīṅ pahuṅchegā.

²⁰chunāṅche achchhe logoṅ kī rāh par chal phir, dhyān de ki tere qadam rāstbāzoṅ ke rāste par raheṅ.

²¹kyūṅki sīdhī rāh par chalne wāle mulk meṅ ābād hoṅge, āḳhirkār be'ilzām hī us meṅ bāqī raheṅge.

²²lekin bedīn mulk se miṭ jāeṅge, aur bewafāoṅ ko ukhāṛ kar mulk se ḳhārij kar diyā jāegā.