Read Roman Urdu Geo amsāl 20 Bible Online

amsāl 20 - Roman Urdu Geo bible

amsāl 20

¹mai tānāzan kā bāp aur sharāb shor-sharābā kī māṅ hai. jo yih pī pī kar ḍagmagāne lage wuh dānishmand nahīṅ.

²bādshāh kā qahr jawān sherbabar kī dahāṛoṅ kī mānind hai, jo use taish dilāe wuh apnī jān par kheltā hai.

³laṛāī-jhagaṛe se bāz rahnā izzat kā turrā-e-imtiyāz hai jabki har ahmaq jhagaṛne ke lie tayyār rahtā hai.

⁴kāhil waqt par hal nahīṅ chalātā, chunāṅche jab wuh fasal pakte waqt apne khet par nigāh kare to kuchh nazar nahīṅ āegā.

⁵insān ke dil kā mansūbā gahre pānī kī mānind hai, lekin samajhdār ādmī use nikāl kar amal meṅ lātā hai.

⁶bahut se log apnī wafādārī par faḳhr karte haiṅ, lekin qābil-e-etimād shaḳhs kahāṅ pāyā jātā hai?

⁷jo rāstbāz be'ilzām zindagī guzāre us kī aulād mubārak hai.

⁸jab bādshāh taḳht-e-adālat par baiṭh jāe to wuh apnī āṅkhoṅ se sab kuchh chhānbīn kar har ġhalat bāt ek taraf kar letā hai.

⁹kaun kah saktā hai, “maiṅ ne apne dil ko pāk-sāf kar rakhā hai, maiṅ apne gunāh se pāk ho gayā hūṅ”?

¹⁰ġhalat bāṭ aur ġhalat paimāish, rab donoṅ se ghin khātā hai.

¹¹laṛke kā kirdār us ke sulūk se mālūm hotā hai. is se patā chaltā hai ki us kā chāl-chalan pāk aur rāst hai yā nahīṅ.

¹²sunane wāle kān aur deḳhne wālī āṅkheṅ donoṅ hī rab ne banāī haiṅ.

¹³nīnd ko pyār na kar warnā ġharīb ho jāegā. apnī āṅkhoṅ ko khulā rakh to jī bhar kar khānā khāegā.

¹⁴gāhak dukāndār se kahtā hai, “yih kaisī nāqis chīz hai!” lekin phir jā kar dūsroṅ ke sāmne apne saude par sheḳhī mārtā hai.

¹⁵sonā aur kasrat ke motī pāe jā sakte haiṅ, lekin samajhdār hoṅṭ un se kahīṅ zyādā qīmtī haiṅ.

¹⁶zamānat kā wuh libās wāpas na kar jo kisī ne pardesī kā zāmin ban kar diyā hai. agar wuh ajnabī kā zāmin ho to us zamānat par zarūr qabzā kar jo us ne dī thī.

¹⁷dhoke se hāsil kī huī roṭī ādmī ko mīṭhī lagtī hai, lekin us kā anjām kankaroṅ se bharā muṅh hai.

¹⁸mansūbe salāh-mashware se mazbūt ho jāte haiṅ, aur jang karne se pahle dūsroṅ kī hidāyāt par dhyān de.

¹⁹agar tū buhtān lagāne wāle ko hamrāz banāe to wuh idhar udhar phir kar bāt phailāegā. chunāṅche bātūnī se gurez kar.

²⁰jo apne bāp yā māṅ par lānat kare us kā charāġh ghane andhere meṅ bujh jāegā.

²¹jo mīrās shurū meṅ baṛī jaldī se mil jāe wuh āḳhir meṅ barkat kā bāis nahīṅ hogī.

²²mat kahnā, “maiṅ ġhalat kām kā intiqām lūṅgā.” rab ke intizār meṅ rah to wuhī terī madad karegā.

²³rab jhūṭe bāṭoṅ se ghin khātā hai, aur ġhalat tarāzū use achchhā nahīṅ lagtā.

²⁴rab har ek ke qadam muqarrar kartā hai. to phir insān kis tarah apnī rāh samajh saktā hai?

²⁵insān apne lie phandā tayyār kartā hai jab wuh jaldbāzī se mannat māntā aur bād meṅ hī mannat ke natāij par ġhaur karne lagtā hai.

²⁶dānishmand bādshāh bedīnoṅ ko chhān chhān kar uṛā letā hai, hāṅ wuh gāhne kā ālā hī un par se guzarne detā hai.

²⁷ādamzād kī rūh rab kā charāġh hai jo insān ke bātin kī tah tak sab kuchh kī tahqīq kartā hai.

²⁸shafqat aur wafā bādshāh ko mahfūz rakhtī haiṅ, shafqat se wuh apnā taḳht mustahkam kar letā hai.

²⁹naujawānoṅ kā faḳhr un kī tāqat aur buzurgoṅ kī shān un ke safed bāl haiṅ.

³⁰zaḳhm aur choṭeṅ burāī ko dūr kar detī haiṅ, zarbeṅ bātin kī tah tak sab kuchh sāf kar detī haiṅ.