Read Roman Urdu Geo amsāl 21 Bible Online

amsāl 21 - Roman Urdu Geo bible

amsāl 21

¹bādshāh kā dil rab ke hāth meṅ nahar kī mānind hai. wuh jidhar chāhe us kā ruḳh pher detā hai.

²har ādmī kī rāh us kī apnī nazar meṅ ṭhīk lagtī hai, lekin rab hī diloṅ kī jāṅch-paṛtāl kartā hai.

³rāstbāzī aur insāf karnā rab ko zabah kī qurbāniyoṅ se kahīṅ zyādā pasand hai.

⁴maġhrūr āṅkheṅ aur mutakabbir dil jo bedīnoṅ kā charāġh haiṅ gunāh haiṅ.

⁵mehnatī shaḳhs ke mansūbe nafā kā bāis haiṅ, lekin jaldbāzī ġhurbat tak pahuṅchā detī hai.

⁶farebdih zabān se jamā kiyā huā ḳhazānā bikhar jāne wālā dhuāṅ aur mohlak phandā hai.

⁷bedīnoṅ kā zulm hī unheṅ ghasīṭ kar le jātā hai, kyūṅki wuh insāf karne se inkār karte haiṅ.

⁸qusūrwār kī rāh pechdār hai jabki pāk shaḳhs sīdhī rāh par chaltā hai.

⁹jhagaṛālū bīwī ke sāth ek hī ghar meṅ rahne kī nisbat chhat ke kisī kone meṅ guzārā karnā behtar hai.

¹⁰bedīn ġhalat kām karne ke lālach meṅ rahtā hai aur apne kisī bhī paṛosī par tars nahīṅ khātā.

¹¹tānāzan par jurmānā lagā to sādālauh sabaq sīkhegā, dānishmand ko tālīm de to us ke ilm meṅ izāfā hogā.

¹²allāh jo rāst hai bedīn ke ghar ko dhyān meṅ rakhtā hai, wuhī bedīn ko ḳhāk meṅ milā detā hai.

¹³jo kān meṅ unglī ḍāl kar ġharīb kī madad ke lie chīḳheṅ nahīṅ suntā wuh bhī ek din chīḳheṅ māregā, aur us kī bhī sunī nahīṅ jāegī.

¹⁴poshīdagī meṅ silā dene se dūsre kā ġhussā ṭhanḍā ho jātā, kisī kī jeb garm karne se us kā saḳht taish dūr ho jātā hai.

¹⁵jab insāf kiyā jāe to rāstbāz ḳhush ho jātā, lekin badkār dahshat khāne lagtā hai.

¹⁶jo samajh kī rāh se bhaṭak jāe wuh ek din murdoṅ kī jamā'at meṅ ārām karegā.

¹⁷jo aish-o-ishrat kī zindagī pasand kare wuh ġharīb ho jāegā, jise mai aur tel pyārā ho wuh amīr nahīṅ ho jāegā.

¹⁸jab rāstbāz kā fidyā denā hai to bedīn ko diyā jāegā, aur diyānatdār kī jagah bewafā ko diyā jāegā.

¹⁹jhagaṛālū aur tang karne wālī bīwī ke sāth basne kī nisbat registān meṅ guzārā karnā behtar hai.

²⁰dānishmand ke ghar meṅ umdā ḳhazānā aur tel hotā hai, lekin ahmaq apnā sārā māl haṛap kar letā hai.

²¹jo insāf aur shafqat kā tāqqub kartā rahe wuh zindagī, rāstī aur izzat pāegā.

²²dānishmand ādmī tāqatwar faujiyoṅ ke shahr par hamlā karke wuh qilābandī ḍhā detā hai jis par un kā pūrā etimād thā.

²³jo apne muṅh aur zabān kī pahrādārī kare wuh apnī jān ko musībat se bachāe rakhtā hai.

²⁴maġhrūr aur ghamanḍī kā nām ‘tānāzan’ hai, har kām wuh behad takabbur ke sāth kartā hai.

²⁵kāhil kā lālach use maut ke ghāṭ utār detā hai, kyūṅki us ke hāth kām karne se inkār karte haiṅ.

²⁶lālchī pūrā din lālach kartā rahtā hai, lekin rāstbāz fayyāzdilī se detā hai.

²⁷bedīnoṅ kī qurbānī qābil-e-ghin hai, ḳhāskar jab use bure maqsad se pesh kiyā jāe.

²⁸jhūṭā gawāh tabāh ho jāegā, lekin jo dūsre kī dhyān se sune us kī bāt hameshā tak qāim rahegī.

²⁹bedīn ādmī gustāḳh andāz se pesh ātā hai, lekin sīdhī rāh par chalne wālā soch samajh kar apnī rāh par chaltā hai.

³⁰kisī kī bhī hikmat, samajh yā mansūbā rab kā sāmnā nahīṅ kar saktā.

³¹ghoṛe ko jang ke din ke lie tayyār to kiyā jātā hai, lekin fath rab ke hāth meṅ hai.