Read Roman Urdu Geo amsāl 22 Bible Online

amsāl 22 - Roman Urdu Geo bible

amsāl 22

¹nek nām baṛī daulat se qīmtī, aur manzūr-e-nazar honā sone-chāṅdī se behtar hai.

²amīr aur ġharīb ek dūsre se milte julte haiṅ, rab un sab kā ḳhāliq hai.

³zahīn ādmī ḳhatrā pahle se bhāṅp kar chhup jātā hai, jabki sādālauh āge baṛh kar us kī lapeṭ meṅ ā jātā hai.

⁴farotanī aur rab kā ḳhauf mānane kā phal daulat, ehtirām aur zindagī hai.

⁵bedīn kī rāh meṅ kāṅṭe aur phande hote haiṅ. jo apnī jān mahfūz rakhnā chāhe wuh un se dūr rahtā hai.

⁶chhoṭe bachche ko sahīh rāh par chalne kī tarbiyat kar to wuh būṛhā ho kar bhī us se nahīṅ haṭegā.

⁷amīr ġharīb par hukūmat kartā, aur qarzdār qarzḳhwāh kā ġhulām hotā hai.

⁸jo nāinsāfī kā bīj boe wuh āfat kī fasal kāṭegā, tab us kī ziyādatī kī lāṭhī ṭūṭ jāegī.

⁹fayyāzdil ko barkat milegī, kyūṅki wuh pasthāl ko apne khāne meṅ sharīk kartā hai.

¹⁰tānāzan ko bhagā de to laṛāī-jhagaṛā ghar se nikal jāegā, tū tū maiṅ maiṅ aur ek dūsre kī be'izzatī karne kā silsilā ḳhatm ho jāegā.

¹¹jo dil kī pākīzagī ko pyār kare aur mehrbān zabān kā mālik ho wuh bādshāh kā dost banegā.

¹²rab kī āṅkheṅ ilm-o-irfān kī dekh-bhāl kartī haiṅ, lekin wuh bewafā kī bātoṅ ko tabāh hone detā hai.

¹³kāhil kahtā hai, “galī meṅ sher hai, agar bāhar jāūṅ to mujhe kisī chauk meṅ phāṛ khāegā.”

¹⁴zinākār aurat kā muṅh gahrā gaṛhā hai. jis se rab nārāz ho wuh us meṅ gir jātā hai.

¹⁵bachche ke dil meṅ hamāqat ṭiktī hai, lekin tarbiyat kī chhaṛī use bhagā detī hai.

¹⁶ek pasthāl par zulm kartā hai tāki daulat pāe, dūsrā amīr ko tohfe detā hai lekin ġharīb ho jātā hai.

¹⁷kān lagā kar dānāoṅ kī bātoṅ par dhyān de, dil se merī tālīm apnā le!

¹⁸kyūṅki achchhā hai ki tū unheṅ apne dil meṅ mahfūz rakhe, wuh sab tere hoṅṭoṅ par musta'id raheṅ.

¹⁹āj maiṅ tujhe, hāṅ tujhe hī tālīm de rahā hūṅ tāki terā bharosā rab par rahe.

²⁰maiṅ ne tere lie 30 kahāwateṅ qalamband kī haiṅ, aisī bāteṅ jo mashwaroṅ aur ilm se bharī huī haiṅ.

²¹kyūṅki maiṅ tujhe sachchāī kī qābil-e-etimād bāteṅ sikhānā chāhtā hūṅ tāki tū unheṅ qābil-e-etimād jawāb de sake jinhoṅ ne tujhe bhejā hai.

²²pasthāl ko is lie na lūṭ ki wuh pasthāl hai, musībatzadā ko adālat meṅ mat kuchalnā.

²³kyūṅki rab ḳhud un kā difā karke unheṅ lūṭ legā jo unheṅ lūṭ rahe haiṅ.

²⁴ġhusīle shaḳhs kā dost na ban, na us se zyādā tālluq rakh jo jaldī se āg-bagūlā ho jātā hai.

²⁵aisā na ho ki tū us kā chāl-chalan apnā kar apnī jān ke lie phandā lagāe.

²⁶kabhī hāth milā kar wādā na kar ki maiṅ dūsre ke karze kā zāmin hūṅgā.

²⁷qarzdār ke paise wāpas na karne par agar tū bhī paise adā na kar sake to terī chārpāī bhī tere nīche se chhīn lī jāegī.

²⁸zamīn kī jo hudūd tere bāpdādā ne muqarrar kīṅ unheṅ āge pīchhe mat karnā.

²⁹kyā tujhe aisā ādmī nazar ātā hai jo apne kām meṅ māhir hai? wuh nichle tabqe ke logoṅ kī ḳhidmat nahīṅ karegā balki bādshāhoṅ kī.