Read Roman Urdu Geo amsāl 23 Bible Online

amsāl 23 - Roman Urdu Geo bible

amsāl 23

¹agar tū kisī hukmrān ke khāne meṅ sharīk ho jāe to ḳhūb dhyān de ki tū kis ke huzūr hai.

²agar tū peṭū ho to apne gale par chhurī rakh.

³us kī umdā chīzoṅ kā lālach mat kar, kyūṅki yih khānā farebdih hai.

⁴apnī pūrī tāqat amīr banane meṅ sarf na kar, apnī hikmat aisī koshishoṅ se zāe mat kar.

⁵ek nazar daulat par ḍāl to wuh ojhal ho jātī hai, aur par lagā kar uqāb kī tarah āsmān kī taraf uṛ jātī hai.

⁶jalne wāle kī roṭī mat khā, us ke lazīz khānoṅ kā lālach na kar.

⁷kyūṅki yih gale meṅ bāl kī tarah hogā. wuh tujh se kahegā, “khāo, piyo!” lekin us kā dil tere sāth nahīṅ hai.

⁸jo luqmā tū ne khā liyā us se tujhe qai āegī, aur terī us se dostānā bāteṅ zāe ho jāeṅgī.

⁹ahmaq se bāt na kar, kyūṅki wuh terī dānishmand bāteṅ haqīr jānegā.

¹⁰zamīn kī jo hudūd qadīm zamāne meṅ muqarrar huīṅ unheṅ āge pīchhe mat karnā, aur yatīmoṅ ke khetoṅ par qabzā na kar.

¹¹kyūṅki un kā chhuṛāne wālā qawī hai, wuh un ke haq meṅ ḳhud tere ḳhilāf laṛegā.

¹²apnā dil tarbiyat ke hawāle kar aur apne kān ilm kī bātoṅ par lagā.

¹³bachche ko tarbiyat se mahrūm na rakh, chhaṛī se use sazā dene se wuh nahīṅ maregā.

¹⁴chhaṛī se use sazā de to us kī jān maut se chhūṭ jāegī.

¹⁵mere beṭe, agar terā dil dānishmand ho to merā dil bhī ḳhush hogā.

¹⁶maiṅ andar hī andar ḳhushī manāūṅgā jab tere hoṅṭ diyānatdār bāteṅ kareṅge.

¹⁷terā dil gunāhgāroṅ ko dekh kar kuṛhtā na rahe balki pūre din rab kā ḳhauf rakhne meṅ sargarm rahe.

¹⁸kyūṅki terī ummīd jātī nahīṅ rahegī balki terā mustaqbil yaqīnan achchhā hogā.

¹⁹mere beṭe, sun kar dānishmand ho jā aur sahīh rāh par apne dil kī rāhnumāī kar.

²⁰sharābī aur peṭū se dareġh kar,

²¹kyūṅki sharābī aur peṭū ġharīb ho jāeṅge, aur kāhilī unheṅ chīthaṛe pahnāegī.

²²apne bāp kī sun jis ne tujhe paidā kiyā, aur apnī māṅ ko haqīr na jān jab būṛhī ho jāe.

²³sachchāī ḳharīd le aur kabhī faroḳht na kar, us meṅ shāmil hikmat, tarbiyat aur samajh apnā le.

²⁴rāstbāz kā bāp baṛī ḳhushī manātā hai, aur dānishmand beṭe kā wālid us se lutfandoz hotā hai.

²⁵chunāṅche apne māṅ-bāp ke lie ḳhushī kā bāis ho, aisī zindagī guzār ki terī māṅ jashn manā sake.

²⁶mere beṭe, apnā dil mere hawāle kar, terī āṅkheṅ merī rāheṅ pasand kareṅ.

²⁷kyūṅki kasbī gahrā gaṛhā aur zinākār aurat tang kuāṅ hai,

²⁸ḍākū kī tarah wuh tāk lagāe baiṭh kar mardoṅ meṅ bewafāoṅ kā izāfā kartī hai.

²⁹kaun āheṅ bhartā hai? kaun hāy hāy kartā aur laṛāī-jhagaṛe meṅ mulawwas rahtā hai? kis ko bilāwajah choṭeṅ lagtī, kis kī āṅkheṅ dhundlī sī rahtī haiṅ?

³⁰wuh jo rāt gae tak mai pīne aur masāledār mai se mazā lene meṅ masrūf rahtā hai.

³¹mai ko taktā na rah, ḳhwāh us kā surḳh rang kitnī ḳhūbsūratī se pyāle meṅ kyūṅ na chamke, ḳhwāh use baṛe maze se kyūṅ na piyā jāe.

³²anjāmkār wuh tujhe sāṅp kī tarah kāṭegī, nāg kī tarah ḍasegī.

³³terī āṅkheṅ ajīb-o-ġharīb manzar dekheṅgī aur terā dil betukī bāteṅ haklāegā.

³⁴tū samundar ke bīch meṅ leṭne wāle kī mānind hogā, us jaisā jo mastūl par chaṛh kar leṭ gayā ho.

³⁵tū kahegā, “merī piṭāī huī lekin dard mahsūs na huā, mujhe mārā gayā lekin mālūm na huā. maiṅ kab jāg uṭhūṅgā tāki dubārā sharāb kī taraf ruḳh kar sakūṅ?”