Read Roman Urdu Geo amsāl 24 Bible Online

amsāl 24 - Roman Urdu Geo bible

amsāl 24

¹sharīroṅ se hasad na kar, na un se sohbat rakhne kī ārzū rakh,

²kyūṅki un kā dil zulm karne par tulā rahtā hai, un ke hoṅṭ dūsroṅ ko dukh pahuṅchāte haiṅ.

³hikmat ghar ko tāmīr kartī, samajh use mazbūt bunyād par khaṛā kar detī,

⁴aur ilm-o-irfān us ke kamroṅ ko beshqīmat aur manmohan chīzoṅ se bhar detā hai.

⁵dānishmand ko tāqat hāsil hotī aur ilm rakhne wāle kī quwwat baṛhtī rahtī hai,

⁶kyūṅki jang karne ke lie hidāyat aur fath pāne ke lie muta'addid mushīroṅ kī zarūrat hotī hai.

⁷hikmat itnī buland-o-bālā hai ki ahmaq use pā nahīṅ saktā. jab buzurg shahr ke darwāze meṅ faislā karne ke lie jamā hote haiṅ to wuh kuchh nahīṅ kah saktā.

⁸bure mansūbe bāndhne wālā sāzishī kahlātā hai.

⁹ahmaq kī chālākiyāṅ gunāh haiṅ, aur log tānāzan se ghin khāte haiṅ.

¹⁰agar tū musībat ke din himmat hār kar ḍhīlā ho jāe to terī tāqat jātī rahegī.

¹¹jinheṅ maut ke hawāle kiyā jā rahā hai unheṅ chhuṛā, jo qasāī kī taraf ḍagmagāte hue jā rahe haiṅ unheṅ rok de.

¹²shāyad tū kahe, “hameṅ to is ke bāre meṅ ilm nahīṅ thā.” lekin yaqīn jān, jo dil kī jāṅch-paṛtāl kartā hai wuh bāt samajhtā hai, jo terī jān kī dekh-bhāl kartā hai use mālūm hai. wuh insān ko us ke āmāl kā badlā detā hai.

¹³mere beṭe, shahd khā kyūṅki wuh achchhā hai, chhatte kā ḳhālis shahd mīṭhā hai.

¹⁴jān le ki hikmat isī tarah terī jān ke lie mīṭhī hai. agar tū use pāe to terī ummīd jātī nahīṅ rahegī balki terā mustaqbil achchhā hogā.

¹⁵ai bedīn, rāstbāz ke ghar kī tāk lagāe mat baiṭhnā, us kī rihāishgāh tabāh na kar.

¹⁶kyūṅki go rāstbāz sāt bār gir jāe to bhī har bār dubārā uṭh khaṛā hogā jabki bedīn ek bār ṭhokar khā kar musībat meṅ phaṅsā rahegā.

¹⁷agar terā dushman gir jāe to ḳhush na ho, agar wuh ṭhokar khāe to terā dil jashn na manāe.

¹⁸aisā na ho ki rab yih dekh kar terā rawayyā pasand na kare aur apnā ġhussā dushman par utārne se bāz āe.

¹⁹badkāroṅ ko dekh kar mushta'il na ho jā, bedīnoṅ ke bāis kuṛhtā na rah.

²⁰kyūṅki sharīroṅ kā koī mustaqbil nahīṅ, bedīnoṅ kā charāġh bujh jāegā.

²¹mere beṭe, rab aur bādshāh kā ḳhauf mān, aur sarkashoṅ meṅ sharīk na ho.

²²kyūṅki achānak hī un par āfat āegī, kisī ko patā hī nahīṅ chalegā jab donoṅ un par hamlā karke unheṅ tabāh kar deṅge.

²³zail meṅ dānishmandoṅ kī mazīd kahāwateṅ qalamband haiṅ. adālat meṅ jānibdārī dikhānā burī bāt hai.

²⁴jo qusūrwār se kahe, “tū bequsūr hai” us par qaumeṅ lānat bhejeṅgī, us kī sarzanish ummateṅ kareṅgī.

²⁵lekin jo qusūrwār ko mujrim ṭhahrāe wuh ḳhushhāl hogā, use kasrat kī barkat milegī.

²⁶sachchā jawāb dost ke bose kī mānind hai.

²⁷pahle bāhar kā kām mukammal karke apne khetoṅ ko tayyār kar, phir hī apnā ghar tāmīr kar.

²⁸bilāwajah apne paṛosī ke ḳhilāf gawāhī mat de. yā kyā tū apne hoṅṭoṅ se dhokā denā chāhtā hai?

²⁹mat kahnā, “jis tarah us ne mere sāth kiyā usī tarah maiṅ us ke sāth karūṅga, maiṅ us ke har fel kā munāsib jawāb dūṅgā.”

³⁰ek din maiṅ sust aur nāsamajh ādmī ke khet aur angūr ke bāġh meṅ se guzarā.

³¹har jagah kāṅṭedār jhāṛiyāṅ phailī huī thīṅ, ḳhudrau paude pūrī zamīn par chhā gae the. us kī chārdīwārī bhī gir gaī thī.

³²yih dekh kar maiṅ ne dil se dhyān diyā aur sabaq sīkh liyā,

³³agar tū kahe, “mujhe thoṛī der sone de, thoṛī der ūṅghne de, thoṛī der hāth par hāth dhare baiṭhne de tāki maiṅ ārām kar sakūṅ”

³⁴to ḳhabardār, jald hī ġhurbat rāhzan kī tarah tujh par āegī, muflisī hathiyār se les ḍākū kī tarah tujh par ā paṛegī.