Read Roman Urdu Geo amsāl 25 Bible Online

amsāl 25 - Roman Urdu Geo bible

amsāl 25

¹zail meṅ sulaimān kī mazīd kahāwateṅ darj haiṅ jinheṅ yahūdāh ke bādshāh hizqiyāh ke logoṅ ne jamā kiyā.

²allāh kā jalāl is meṅ zāhir hotā hai ki wuh muāmalā poshīdā rakhtā hai, bādshāh kā jalāl is meṅ ki wuh muāmale kī tahqīq kartā hai.

³jitnā āsmān buland aur zamīn gahrī hai utnā hī bādshāhoṅ ke dil kā khoj nahīṅ lagāyā jā saktā.

⁴chāṅdī se mail dūr karo to sunār bartan banāne meṅ kāmyāb ho jāegā,

⁵bedīn ko bādshāh ke huzūr se dūr karo to us kā taḳht rāstī kī bunyād par qāim rahegā.

⁶bādshāh ke huzūr apne āp par faḳhr na kar, na izzat kī us jagah par khaṛā ho jā jo buzurgoṅ ke lie maḳhsūs hai.

⁷is se pahle ki shurafā ke sāmne hī terī be'izzatī ho jāe behtar hai ki tū pīchhe khaṛā ho jā aur bād meṅ koī tujh se kahe, “yahāṅ sāmne ā jāeṅ.” jo kuchh terī āṅkhoṅ ne dekhā use adālat meṅ pesh karne meṅ

⁸jaldbāzī na kar, kyūṅki tū kyā karegā agar terā paṛosī tere muāmale ko jhuṭlā kar tujhe sharmindā kare?

⁹adālat meṅ apne paṛosī se laṛte waqt wuh bāt bayān na kar jo kisī ne poshīdagī meṅ tere sapurd kī,

¹⁰aisā na ho ki sunane wālā terī be'izzatī kare. tab terī badnāmī kabhī nahīṅ miṭegī.

¹¹waqt par mauzūṅ bāt chāṅdī ke bartan meṅ sone ke seb kī mānind hai.

¹²dānishmand kī nasīhat qabūl karne wāle ke lie sone kī bālī aur ḳhālis sone ke gulūband kī mānind hai.

¹³qābil-e-etimād qāsid bhejne wāle ke lie fasal kāṭte waqt barf kī ṭhanḍak jaisā hai, is tarah wuh apne mālik kī jān ko tar-o-tāzā kar detā hai.

¹⁴jo sheḳhī mār kar tohfoṅ kā wādā kare lekin kuchh na de wuh un tūfānī bādaloṅ kī mānind hai jo barse baġhair guzar jāte haiṅ.

¹⁵hukmrān ko tahammul se qāil kiyā jā saktā, aur narm zabān haḍḍiyāṅ toṛne ke qābil hai.

¹⁶agar shahd mil jāe to zarūrat se zyādā mat khā, had se zyādā khāne se tujhe qai āegī.

¹⁷apne paṛosī ke ghar meṅ bār bār jāne se apne qadmoṅ ko rok, warnā wuh tang ā kar tujh se nafrat karne lagegā.

¹⁸jo apne paṛosī ke ḳhilāf jhūṭī gawāhī de wuh hathauṛe, talwār aur tez tīr jaisā nuqsāndeh hai.

¹⁹musībat ke waqt bewafā par etibār karnā ḳharāb dāṅt yā ḍagmagāte pāoṅ kī tarah taqlīfdih hai.

²⁰dukhte dil ke lie gīt gānā utnā hī ġhairmauzūṅ hai jitnā sardiyoṅ ke mausam meṅ qamīs utārnā yā soḍe par sirkā ḍālnā.

²¹agar terā dushman bhūkā ho to use khānā khilā, agar pyāsā ho to pānī pilā.

²²kyūṅki aisā karne se tū us ke sar par jalte hue koeloṅ kā ḍher lagāegā, aur rab tujhe ajr degā.

²³jis tarah kāle bādal lāne wālī hawā bārish paidā kartī hai usī tarah bātūnī kī chupke se kī gaī bātoṅ se logoṅ ke muṅh bigaṛ jāte haiṅ.

²⁴jhagaṛālū bīwī ke sāth ek hī ghar meṅ rahne kī nisbat chhat ke kisī kone meṅ guzārā karnā behtar hai.

²⁵dūrdarāz mulk kī ḳhushḳhabrī pyāse gale meṅ ṭhanḍā pānī hai.

²⁶jo rāstbāz bedīn ke sāmne ḍagmagāne lage, wuh gadlā chashmā aur ālūdā kuāṅ hai.

²⁷zyādā shahd khānā achchhā nahīṅ, aur na hī zyādā apnī izzat kī fikr karnā.

²⁸jo apne āp par qābū na pā sake wuh us shahr kī mānind hai jis kī fasīl ḍhā dī gaī hai.