Read Roman Urdu Geo amsāl 29 Bible Online

amsāl 29 - Roman Urdu Geo bible

amsāl 29

¹jo muta'addid nasīhatoṅ ke bāwujūd haṭdharm rahe wuh achānak hī barbād ho jāegā, aur shifā kā imkān hī nahīṅ hogā.

²jab rāstbāz bahut haiṅ to qaum ḳhush hotī, lekin jab bedīn hukūmat kare to qaum āheṅ bhartī hai.

³jise hikmat pyārī ho wuh apne bāp ko ḳhushī dilātā hai, lekin kasbiyoṅ kā sāthī apnī daulat uṛā detā hai.

⁴bādshāh insāf se mulk ko mustahkam kartā, lekin had se zyādā ṭaiks lene se use tabāh kartā hai.

⁵jo apne paṛosī kī chāplūsī kare wuh us ke qadmoṅ ke āge jāl bichhātā hai.

⁶sharīr jurm karte waqt apne āp ko phaṅsā detā, lekin rāstbāz ḳhushī manā kar shādmān rahtā hai.

⁷rāstbāz pasthāloṅ ke huqūq kā ḳhayāl rakhtā hai, lekin bedīn parwā hī nahīṅ kartā.

⁸tānāzan shahr meṅ afrā-tafrī machā dete jabki dānishmand ġhussā ṭhanḍā kar dete haiṅ.

⁹jab dānishmand ādmī adālat meṅ ahmaq se laṛe to ahmaq taish meṅ ā jātā yā qahqahā lagātā hai, sukūn kā imkān hī nahīṅ hotā.

¹⁰ḳhūṅḳhār ādmī be'ilzām shaḳhs se nafrat kartā, lekin sīdhī rāh par chalne wālā us kī behtarī chāhtā hai.

¹¹ahmaq apnā pūrā ġhussā utārtā, lekin dānishmand use rok kar qābū meṅ rakhtā hai.

¹²jo hukmrān jhūṭ par dhyān de us ke tamām mulāzim bedīn hoṅge.

¹³jab ġharīb aur zālim kī mulāqāt hotī hai to donoṅ kī āṅkhoṅ ko raushan karne wālā rab hī hai.

¹⁴jo bādshāh diyānatdārī se zarūratmand kī adālat kare us kā taḳht hameshā tak qāim rahegā.

¹⁵chhaṛī aur nasīhat hikmat paidā kartī haiṅ. jise belagām chhoṛā jāe wuh apnī māṅ ke lie sharmindagī kā bāis hogā.

¹⁶jab bedīn phaleṅ phūleṅ to gunāh bhī phaltā phūltā hai, lekin rāstbāz un kī shikast ke gawāh hoṅge.

¹⁷apne beṭe kī tarbiyat kar to wuh tujhe sukūn aur ḳhushī dilāegā.

¹⁸jahāṅ royā nahīṅ wahāṅ qaum belagām ho jātī hai, lekin mubārak hai wuh jo sharīat ke tābe rahtā hai.

¹⁹naukar sirf alfāz se nahīṅ sudhartā. agar wuh bāt samjhe bhī to bhī dhyān nahīṅ degā.

²⁰kyā koī dikhāī detā hai jo bāt karne meṅ jaldbāz hai? us kī nisbat ahmaq ke sudharne kī zyādā ummīd hai.

²¹jo ġhulām jawānī se nāz-o-nemat meṅ pal kar bigaṛ jāe us kā burā anjām hogā.

²²ġhazabālūd ādmī jhagaṛe chheṛtā rahtā hai, ġhusīle shaḳhs se muta'addid gunāh sarzad hote haiṅ.

²³takabbur apne mālik ko past kar degā jabki farotan shaḳhs izzat pāegā.

²⁴jo chor kā sāthī ho wuh apnī jān se nafrat rakhtā hai. go us se half uṭh. āyā jāe ki chorī ke bāre meṅ gawāhī de to bhī kuchh nahīṅ batātā balki half kī lānat kī zad meṅ ā jātā hai.

²⁵jo insān se ḳhauf khāe wuh phande meṅ phaṅs jāegā, lekin jo rab kā ḳhauf māne wuh mahfūz rahegā.

²⁶bahut log hukmrān kī manzūrī ke tālib rahte haiṅ, lekin insāf rab hī kī taraf se miltā hai.

²⁷rāstbāz badkār se aur bedīn sīdhī rāh par chalne wāle se ghin khātā hai.