Read Roman Urdu Geo amsāl 3 Bible Online

amsāl 3 - Roman Urdu Geo bible

amsāl 3

¹mere beṭe, merī hidāyat mat bhūlnā. mere ahkām tere dil meṅ mahfūz raheṅ.

²kyūṅki in hī se terī zindagī ke dinoṅ aur sāloṅ meṅ izāfā hogā aur terī ḳhushhālī baṛhegī.

³shafqat aur wafā terā dāman na chhoṛeṅ. unheṅ apne gale se bāndhnā, apne dil kī taḳhtī par kandā karnā.

⁴tab tujhe allāh aur insān ke sāmne mehrbānī aur qabūliyat hāsil hogī.

⁵pūre dil se rab par bharosā rakh, aur apnī aql par takiyā na kar.

⁶jahāṅ bhī tū chale sirf usī ko jān le, phir wuh ḳhud terī rāhoṅ ko hamwār karegā.

⁷apne āp ko dānishmand mat samajhnā balki rab kā ḳhauf mān kar burāī se dūr rah.

⁸is se terā badan sehhat pāegā aur terī haḍḍiyāṅ tar-o-tāzā ho jāeṅgī.

⁹apnī milkiyat aur apnī tamām paidāwār ke pahle phal se rab kā ehtirām kar,

¹⁰phir tere godām anāj se bhar jāeṅge aur tere bartan mai se chhalak uṭheṅge.

¹¹mere beṭe, rab kī tarbiyat ko radd na kar, jab wuh tujhe ḍānṭe to ranjīdā na ho.

¹²kyūṅki jo rab ko pyārā hai us kī wuh tādīb kartā hai, jis tarah bāp us beṭe ko tambīh kartā hai jo use pasand hai.

¹³mubārak hai wuh jo hikmat pātā hai, jise samajh hāsil hotī hai.

¹⁴kyūṅki hikmat chāṅdī se kahīṅ zyādā sūdmand hai, aur us se sone se kahīṅ zyādā qīmtī chīzeṅ hāsil hotī haiṅ.

¹⁵hikmat motiyoṅ se zyādā nafīs hai, tere tamām ḳhazāne us kā muqābalā nahīṅ kar sakte.

¹⁶us ke dahne hāth meṅ umr kī darāzī aur bāeṅ hāth meṅ daulat aur izzat hai.

¹⁷us kī rāheṅ ḳhushgawār, us ke tamām rāste puramn haiṅ.

¹⁸jo us kā dāman pakaṛ le us ke lie wuh zindagī kā daraḳht hai. mubārak hai wuh jo us se lipṭā rahe.

¹⁹rab ne hikmat ke wasīle se hī zamīn kī bunyād rakhī, samajh ke zarī'e hī āsmān ko mazbūtī se lagāyā.

²⁰us ke irfān se hī gahrāiyoṅ kā pānī phūṭ niklā aur āsmān se shabnam ṭapak kar zamīn par paṛtī hai.

²¹mere beṭe, dānāī aur tamīz apne pās mahfūz rakh aur unheṅ apnī nazar se dūr na hone de.

²²un se terī jān tar-o-tāzā aur terā galā ārāstā rahegā.

²³tab tū chalte waqt mahfūz rahegā, aur terā pāoṅ ṭhokar nahīṅ khāegā.

²⁴tū pāoṅ phailā kar so sakegā, koī sadmā tujhe nahīṅ pahuṅchegā balki tū leṭ kar gahrī nīnd soegā.

²⁵nāgahāṅ āfat se mat ḍarnā, na us tabāhī se jo bedīn par ġhālib ātī hai,

²⁶kyūṅki rab par terā etimād hai, wuhī tere pāoṅ ko phaṅs jāne se mahfūz rakhegā.

²⁷agar koī zarūratmand ho aur tū us kī madad kar sake to us ke sāth bhalāī karne se inkār na kar.

²⁸agar tū āj kuchh de sake to apne paṛosī se mat kahnā, “kal ānā to maiṅ āp ko kuchh de dūṅgā.”

²⁹jo paṛosī befikr tere sāth rahtā hai us ke ḳhilāf bure mansūbe mat bāndhnā.

³⁰jis ne tujhe nuqsān nahīṅ pahuṅchāyā adālat meṅ us par bebunyād ilzām na lagānā.

³¹na zālim se hasad kar, na us kī koī rāh iḳhtiyār kar.

³²kyūṅki burī rāh par chalne wāle se rab ghin khātā hai jabki sīdhī rāh par chalne wāloṅ ko wuh apne rāzoṅ se āgāh kartā hai.

³³bedīn ke ghar par rab kī lānat ātī jabki rāstbāz ke ghar ko wuh barkat detā hai.

³⁴mazāq uṛāne wāloṅ kā wuh mazāq uṛātā, lekin farotanoṅ par mehrbānī kartā hai.

³⁵dānishmand mīrās meṅ izzat pāeṅge jabki ahmaq ke nasīb meṅ sharmindagī hogī.