Read Roman Urdu Geo amsāl 31 Bible Online

amsāl 31 - Roman Urdu Geo bible

amsāl 31

¹zail meṅ massā ke bādshāh lamūel kī kahāwateṅ haiṅ. us kī māṅ ne use yih tālīm dī,

²ai mere beṭe, mere peṭ ke phal, jo merī mannatoṅ se paidā huā, maiṅ tujhe kyā batāūṅ?

³apnī pūrī tāqat auratoṅ par zāe na kar, un par jo bādshāhoṅ kī tabāhī kā bāis haiṅ.

⁴ai lamūel, bādshāhoṅ ke lie mai pīnā munāsib nahīṅ, hukmrānoṅ ke lie sharāb kī ārzū rakhnā mauzūṅ nahīṅ.

⁵aisā na ho ki wuh pī pī kar qawānīn bhūl jāeṅ aur tamām mazlūmoṅ kā haq māreṅ.

⁶sharāb unheṅ pilā jo tabāh hone wāle haiṅ, mai unheṅ pilā jo ġham khāte haiṅ,

⁷aise hī pī pī kar apnī ġhurbat aur musībat bhūl jāeṅ.

⁸apnā muṅh un ke lie khol jo bol nahīṅ sakte, un ke haq meṅ jo zarūratmand haiṅ.

⁹apnā muṅh khol kar insāf se adālat kar aur musībatzadā aur ġharīboṅ ke huqūq mahfūz rakh.

¹⁰sudhaṛ bīwī kaun pā saktā hai? aisī aurat motiyoṅ se kahīṅ zyādā beshqīmat hai.

¹¹us par us ke shauhar ko pūrā etimād hai, aur wuh nafā se mahrūm nahīṅ rahegā.

¹²umr bhar wuh use nuqsān nahīṅ pahuṅchāegī balki barkat kā bāis hogī.

¹³wuh ūn aur san chun kar baṛī mehnat se dhāgā banā letī hai.

¹⁴tijāratī jahāzoṅ kī tarah wuh dūrdarāz ilāqoṅ se apnī roṭī le ātī hai.

¹⁵wuh pau phaṭne se pahle hī jāg uṭhtī hai tāki apne ghar wāloṅ ke lie khānā aur apnī naukarāniyoṅ ke lie un kā hissā tayyār kare.

¹⁶soch-bichār ke bād wuh khet ḳharīd letī, apne kamāe hue paisoṅ se angūr kā bāġh lagā letī hai.

¹⁷tāqat se kamarbastā ho kar wuh apne bāzū'oṅ ko mazbūt kartī hai.

¹⁸wuh mahsūs kartī hai, “merā kārobār fāidāmand hai,” is lie us kā charāġh rāt ke waqt bhī nahīṅ bujhtā.

¹⁹us ke hāth har waqt ūn aur katān kātne meṅ masrūf rahte haiṅ.

²⁰wuh apnī muṭṭhī musībatzadoṅ aur ġharīboṅ ke lie khol kar un kī madad kartī hai.

²¹jab barf paṛe to use ghar wāloṅ ke bāre meṅ koī ḍar nahīṅ, kyūṅki sab garm garm kapṛe pahne hue haiṅ.

²²apne bistar ke lie wuh achchhe kambal banā letī, aur ḳhud wuh bārīk katān aur arġhawānī rang ke libās pahne phirtī hai.

²³shahr ke darwāze meṅ baiṭhe mulk ke buzurg us ke shauhar se ḳhūb wāqif haiṅ, aur jab kabhī koī faislā karnā ho to wuh bhī shūrā meṅ sharīk hotā hai.

²⁴bīwī kapṛoṅ kī silāī karke unheṅ faroḳht kartī hai, saudāgar us ke kamarband ḳharīd lete haiṅ.

²⁵wuh tāqat aur waqār se mulabbas rahtī aur haṅs kar āne wāle dinoṅ kā sāmnā kartī hai.

²⁶wuh hikmat se bāt kartī, aur us kī zabān par shafīq tālīm rahtī hai.

²⁷wuh sustī kī roṭī nahīṅ khātī balki apne ghar meṅ har muāmale kī dekh-bhāl kartī hai.

²⁸us ke beṭe khaṛe ho kar use mubārak kahte haiṅ, us kā shauhar bhī us kī tārīf karke kahtā hai,

²⁹“bahut sī aurateṅ sudhaṛ sābit huī haiṅ, lekin tū un sab par sabqat rakhtī hai!”

³⁰dilfarebī, dhokā aur husn pal bhar kā hai, lekin jo aurat allāh kā ḳhauf māne wuh qābil-e-tārīf hai.

³¹use us kī mehnat kā ajr do! shahr ke darwāzoṅ meṅ us ke kām us kī satāish kareṅ!.