Read Roman Urdu Geo amsāl 4 Bible Online

amsāl 4 - Roman Urdu Geo bible

amsāl 4

¹ai beṭo, bāp kī nasīhat suno, dhyān do tāki tum sīkh kar samajh hāsil kar sako.

²maiṅ tumheṅ achchhī tālīm detā hūṅ, is lie merī hidāyat ko tark na karo.

³maiṅ abhī apne bāp ke ghar meṅ nāzuk laṛkā thā, apnī māṅ kā wāhid bachchā,

⁴to mere bāp ne mujhe tālīm de kar kahā, “pūre dil se mere alfāz apnā le aur har waqt mere ahkām par amal kar to tū jītā rahegā.

⁵hikmat hāsil kar, samajh apnā le! yih chīzeṅ mat bhūlnā, mere muṅh ke alfāz se dūr na honā.

⁶hikmat tark na kar to wuh tujhe mahfūz rakhegī. us se muhabbat rakh to wuh terī dekh-bhāl karegī.

⁷hikmat is se shurū hotī hai ki tū hikmat apnā le. samajh hāsil karne ke lie bāqī tamām milkiyat qurbān karne ke lie tayyār ho.

⁸use azīz rakh to wuh tujhe sarfarāz karegī, use gale lagā to wuh tujhe izzat baḳhshegī.

⁹tab wuh tere sar ko ḳhūbsūrat sehre se ārāstā karegī aur tujhe shāndār tāj se nawāzegī.”

¹⁰mere beṭe, merī sun! merī bāteṅ apnā le to terī umr darāz hogī.

¹¹maiṅ tujhe hikmat kī rāh par chalne kī hidāyat detā, tujhe sīdhī rāhoṅ par phirne detā hūṅ.

¹²jab tū chalegā to tere qadmoṅ ko kisī bhī chīz se rokā nahīṅ jāegā, aur dauṛte waqt tū ṭhokar nahīṅ khāegā.

¹³tarbiyat kā dāman thāme rah! use na chhoṛ balki mahfūz rakh, kyūṅki wuh terī zindagī hai.

¹⁴bedīnoṅ kī rāh par qadam na rakh, sharīroṅ ke rāste par mat jā.

¹⁵us se gurez kar, us par safar na kar balki us se katrā kar āge nikal jā.

¹⁶kyūṅki jab tak un se burā kām sarzad na ho jāe wuh so hī nahīṅ sakte, jab tak unhoṅ ne kisī ko ṭhokar khilā kar ḳhāk meṅ milā na diyā ho wuh nīnd se mahrūm rahte haiṅ.

¹⁷wuh bedīnī kī roṭī khāte aur zulm kī mai pīte haiṅ.

¹⁸lekin rāstbāz kī rāh tulū-e-subh kī pahlī raushnī kī mānind hai jo din ke urūj tak baṛhtī rahtī hai.

¹⁹is ke muqābale meṅ bedīn kā rāstā gahrī tārīkī kī mānind hai, unheṅ patā hī nahīṅ chaltā ki kis chīz se ṭhokar khā kar gir gae haiṅ.

²⁰mere beṭe, merī bātoṅ par dhyān de, mere alfāz par kān dhar.

²¹unheṅ apnī nazar se ojhal na hone de balki apne dil meṅ mahfūz rakh.

²²kyūṅki jo yih bāteṅ apnāeṅ wuh zindagī aur pūre jism ke lie shifā pāte haiṅ.

²³tamām chīzoṅ se pahle apne dil kī hifāzat kar, kyūṅki yihī zindagī kā sarchashmā hai.

²⁴apne muṅh se jhūṭ aur apne hoṅṭoṅ se kajgoī dūr kar.

²⁵dhyān de ki terī āṅkheṅ sīdhā āge kī taraf dekheṅ, ki terī nazar us rāste par lagī rahe jo sīdhā hai.

²⁶apne pāoṅ kā rāstā chalne ke qābil banā de, dhyān de ki terī rāheṅ mazbūt haiṅ.

²⁷na dāīṅ, na bāīṅ taraf muṛ balki apne pāoṅ ko ġhalat qadam uṭhāne se bāz rakh.