Read Roman Urdu Geo amsāl 5 Bible Online

amsāl 5 - Roman Urdu Geo bible

amsāl 5

¹mere beṭe, merī hikmat par dhyān de, merī samajh kī bātoṅ par kān dhar.

²phir tū tamīz kā dāman thāme rahegā, aur tere hoṅṭ ilm-o-irfān mahfūz rakheṅge.

³kyūṅki zinākār aurat ke hoṅṭoṅ se shahd ṭapaktā hai, us kī bāteṅ tel kī tarah chiknī-chupṛī hotī haiṅ.

⁴lekin anjām meṅ wuh zahr jaisī kaṛwī aur dodhārī talwār jaisī tez sābit hotī hai.

⁵us ke pāoṅ maut kī taraf utarte, us ke qadam pātāl kī jānib baṛhte jāte haiṅ.

⁶us ke rāste kabhī idhar kabhī idhar phirte haiṅ tāki tū zindagī kī rāh par tawajjuh na de aur us kī āwāragī ko jān na le.

⁷chunāṅche mere beṭo, merī suno aur mere muṅh kī bātoṅ se dūr na ho jāo.

⁸apne rāste us se dūr rakh, us ke ghar ke darwāze ke qarīb bhī na jā.

⁹aisā na ho ki tū apnī tāqat kisī aur ke lie sarf kare aur apne sāl zālim ke lie zāe kare.

¹⁰aisā na ho ki pardesī terī milkiyat se ser ho jāeṅ, ki jo kuchh tū ne mehnat-mashaqqat se hāsil kiyā wuh kisī aur ke ghar meṅ āe.

¹¹tab āḳhirkār terā badan aur gosht ghul jāeṅge, aur tū āheṅ bhar bhar kar

¹²kahegā, “hāy, maiṅ ne kyūṅ tarbiyat se nafrat kī, mere dil ne kyūṅ sarzanish ko haqīr jānā?

¹³hidāyat karne wāloṅ kī maiṅ ne na sunī, apne ustādoṅ kī bātoṅ par kān na dharā.

¹⁴jamā'at ke darmiyān hī rahte hue mujh par aisī āfat āī ki maiṅ tabāhī ke dahāne tak pahuṅch gayā hūṅ.”

¹⁵apne hī hauz kā pānī aur apne hī kueṅ se phūṭne wālā pānī pī le.

¹⁶kyā munāsib hai ki tere chashme galiyoṅ meṅ aur terī nadiyāṅ chaukoṅ meṅ bah nikleṅ?

¹⁷jo pānī terā apnā hai wuh tujh tak mahdūd rahe, ajnabī us meṅ sharīk na ho jāe.

¹⁸terā chashmā mubārak ho. hāṅ, apnī bīwī se ḳhush rah.

¹⁹wuhī terī manmohan hirnī aur dilrubā ġhazāl [1] hai. usī kā pyār tujhe tar-o-tāzā kare, usī kī muhabbat tujhe hameshā mast rakhe.

²⁰mere beṭe, tū ajnabī aurat se kyūṅ mast ho jāe, kisī dūsre kī bīwī se kyūṅ lipaṭ jāe?

²¹ḳhayāl rakh, insān kī rāheṅ rab ko sāf dikhāī detī haiṅ, jahāṅ bhī wuh chale us par wuh tawajjuh detā hai.

²²bedīn kī apnī hī harkateṅ use phaṅsā detī haiṅ, wuh apne hī gunāh ke rassoṅ meṅ jakaṛā rahtā hai.

²³wuh tarbiyat kī kamī ke sabab se halāk ho jāegā, apnī baṛī hamāqat ke bāis ḍagmagāte hue apne anjām ko pahuṅchegā.