Read Roman Urdu Geo amsāl 6 Bible Online

amsāl 6 - Roman Urdu Geo bible

amsāl 6

¹mere beṭe, kyā tū apne paṛosī kā zāmin banā hai? kyā tū ne hāth milā kar wādā kiyā hai ki maiṅ kisī dūsre kā zimmādār ṭhahrūṅga?

²kyā tū apne wāde se bandhā huā, apne muṅh ke alfāz se phaṅsā huā hai?

³aisā karne se tū apne paṛosī ke hāth meṅ ā gayā hai, is lie apnī jān ko chhuṛāne ke lie us ke sāmne aundhe muṅh ho kar use apnī minnat-samājat se tang kar.

⁴apnī āṅkhoṅ ko sone na de, apne papoṭoṅ ko ūṅghne na de jab tak tū is zimmādārī se fāriġh na ho jāe.

⁵jis tarah ġhazāl shikārī ke hāth se aur parindā chiṛīmār ke hāth se chhūṭ jātā hai usī tarah sirtoṛ koshish kar tāki terī jān chhūṭ jāe.

⁶ai kāhil, chiyūṅṭī ke pās jā kar us kī rāhoṅ par ġhaur kar! us ke namūne se hikmat sīkh le.

⁷us par na sardār, na afsar yā hukmrān muqarrar hai,

⁸to bhī wuh garmiyoṅ meṅ sardiyoṅ ke lie khāne kā zaḳhīrā kar rakhtī, fasal ke dinoṅ meṅ ḳhūb ḳhurāk ikaṭṭhī kartī hai.

⁹ai kāhil, tū mazīd kab tak soyā rahegā, kab jāg uṭhegā?

¹⁰tū kahtā hai, “mujhe thoṛī der sone de, thoṛī der ūṅghne de, thoṛī der hāth par hāth dhare baiṭhne de tāki ārām kar sakūṅ.”

¹¹lekin ḳhabardār, jald hī ġhurbat rāhzan kī tarah tujh par āegī, muflisī hathiyār se les ḍākū kī tarah tujh par ṭūṭ paṛegī.

¹²badmāsh aur kamīnā kis tarah pahchānā jātā hai? wuh muṅh meṅ jhūṭ lie phirtā hai,

¹³apnī āṅkhoṅ, pāoṅ aur ungliyoṅ se ishārā karke tujhe fareb ke jāl meṅ phaṅsāne kī koshish kartā hai.

¹⁴us ke dil meṅ kajī hai, aur wuh har waqt bure mansūbe bāndhne meṅ lagā rahtā hai. jahāṅ bhī jāe wahāṅ jhagaṛe chhiṛ jāte haiṅ.

¹⁵lekin aise shaḳhs par achānak hī āfat āegī. ek hī lamhe meṅ wuh pāsh pāsh ho jāegā. tab us kā ilāj nāmumkin hogā.

¹⁶rab chhih chīzoṅ se nafrat balki sāt chīzoṅ se ghin khātā hai,

¹⁷wuh āṅkheṅ jo ġhurūr se deḳhtī haiṅ, wuh zabān jo jhūṭ boltī hai, wuh hāth jo begunāhoṅ ko qatl karte haiṅ,

¹⁸wuh dil jo bure mansūbe bāndhtā hai, wuh pāoṅ jo dūsroṅ ko nuqsān pahuṅchāne ke lie bhāgte haiṅ,

¹⁹wuh gawāh jo adālat meṅ jhūṭ boltā aur wuh jo bhāiyoṅ meṅ jhagaṛā paidā kartā hai.

²⁰mere beṭe, apne bāp ke hukm se lipṭā rah, aur apnī māṅ kī hidāyat nazarandāz na kar.

²¹unheṅ yūṅ apne dil ke sāth bāndhe rakh ki kabhī dūr na ho jāeṅ. unheṅ hār kī tarah apne gale meṅ ḍāl le.

²²chalte waqt wuh terī rāhnumāī kareṅ, ārām karte waqt terī pahrādārī kareṅ, jāgte waqt tujh se hamkalām hoṅ.

²³kyūṅki bāp kā hukm charāġh aur māṅ kī hidāyat raushnī hai, tarbiyat kī ḍānṭ-ḍapaṭ zindagībaḳhsh rāh hai.

²⁴yūṅ tū badkār aurat aur dūsre kī zinākār bīwī kī chiknī-chupṛī bātoṅ se mahfūz rahegā.

²⁵dil meṅ us ke husn kā lālach na kar, aisā na ho ki wuh palak mār mār kar tujhe pakaṛ le.

²⁶kyūṅki go kasbī ādmī ko us ke paise se mahrūm kartī hai, lekin dūsre kī zinākār bīwī us kī qīmtī jān kā shikār kartī hai.

²⁷kyā insān apnī jholī meṅ bhaṛaktī āg yūṅ uṭhā kar phir saktā hai ki us ke kapṛe na jaleṅ?

²⁸yā kyā koī dahakte koeloṅ par yūṅ phir saktā hai ki us ke pāoṅ jhulas na jāeṅ?

²⁹isī tarah jo kisī dūsre kī bīwī se hambistar ho jāe us kā anjām burā hai, jo bhī dūsre kī bīwī ko chheṛe use sazā milegī.

³⁰jo bhūk ke māre apnā peṭ bharne ke lie chorī kare use log had se zyādā haqīr nahīṅ jānte,

³¹hālāṅki use chorī kie hue māl ko sāt gunā wāpas karnā hai aur us ke ghar kī daulat jātī rahegī.

³²lekin jo kisī dūsre kī bīwī ke sāth zinā kare wuh beaql hai. jo apnī jān ko tabāh karnā chāhe wuhī aisā kartā hai.

³³us kī piṭāī aur be'izzatī kī jāegī, aur us kī sharmindagī kabhī nahīṅ miṭegī.

³⁴kyūṅki shauhar ġhairat khā kar aur taish meṅ ā kar berahmī se badlā legā.

³⁵na wuh koī muāwazā qabūl karegā, na rishwat legā, ḳhwāh kitnī zyādā kyūṅ na ho.