Read Roman Urdu Geo amsāl 7 Bible Online

amsāl 7 - Roman Urdu Geo bible

amsāl 7

¹mere beṭe, mere alfāz kī pairawī kar, mere ahkām apne andar mahfūz rakh.

²mere ahkām ke tābe rah to jītā rahegā. apnī āṅkh kī putlī kī tarah merī hidāyat kī hifāzat kar.

³unheṅ apnī unglī ke sāth bāndh, apne dil kī taḳhtī par kandā kar.

⁴hikmat se kah, “tū merī bahan hai,” aur samajh se, “tū merī qarībī rishtedār hai.”

⁵yihī tujhe zinākār aurat se mahfūz rakheṅgī, dūsre kī us bīwī se jo apnī chiknī-chupṛī bātoṅ se tujhe phuslāne kī koshish kartī hai.

⁶ek din maiṅ ne apne ghar kī khiṛkī [2] meṅ se bāhar jhāṅkā

⁷to kyā deḳhtā hūṅ ki wahāṅ kuchh sādālauh naujawān khaṛe haiṅ. un meṅ se ek beaql jawān nazar āyā.

⁸wuh galī meṅ se guzar kar zinākār aurat ke kone kī taraf ṭahalne lagā. chalte chalte wuh us rāste par ā gayā jo aurat ke ghar tak le jātā hai.

⁹shām kā dhundalkā thā, din ḍhalne aur rāt kā andherā chhāne lagā thā.

¹⁰tab ek aurat kasbī kā libās pahne hue chālākī se us se milne āī.

¹¹yih aurat itnī belagām aur ḳhudsar hai ki us ke pāoṅ us ke ghar meṅ nahīṅ ṭikte.

¹²kabhī wuh galī meṅ, kabhī chaukoṅ meṅ hotī hai, har kone par wuh tāk meṅ baiṭhī rahtī hai.

¹³ab us ne naujawān ko pakaṛ kar use bosā diyā. behayā nazar us par ḍāl kar us ne kahā,

¹⁴“mujhe salāmatī kī qurbāniyāṅ pesh karnī thīṅ, aur āj hī maiṅ ne apnī mannateṅ pūrī kīṅ.

¹⁵is lie maiṅ nikal kar tujh se milne āī, maiṅ ne terā patā kiyā aur ab tū mujhe mil gayā hai.

¹⁶maiṅ ne apne bistar par misr ke rangīn kambal bichhāe,

¹⁷us par mur, ūd aur dārchīnī kī ḳhushbū chhiṛkī hai.

¹⁸āo, ham subh tak muhabbat kā pyālā tah tak pī leṅ, ham ishqbāzī se lutfandoz hoṅ!

¹⁹kyūṅki merā ḳhāwand ghar meṅ nahīṅ hai, wuh lambe safar ke lie rawānā huā hai.

²⁰wuh baṭwe meṅ paise ḍāl kar chalā gayā hai aur pūre chāṅd tak wāpas nahīṅ āegā.”

²¹aisī bāteṅ karte karte aurat ne naujawān ko tarġhīb de kar apnī chiknī-chupṛī bātoṅ se warġhalāyā.

²²naujawān sīdhā us ke pīchhe yūṅ ho liyā jis tarah bail zabah hone ke lie jātā yā hiran uchhal kar phande meṅ phaṅs jātā hai.

²³kyūṅki ek waqt āegā ki tīr us kā dil chīr ḍālegā. lekin filhāl us kī hālat us chiṛiyā kī mānind hai jo uṛ kar jāl meṅ ā jātī aur ḳhayāl tak nahīṅ kartī ki merī jān ḳhatre meṅ hai.

²⁴chunāṅche mere beṭo, merī suno, mere muṅh kī bātoṅ par dhyān do!

²⁵terā dil bhaṭak kar us taraf ruḳh na kare jahāṅ zinākār aurat phirtī hai, aisā na ho ki tū āwārā ho kar us kī rāhoṅ meṅ ulajh jāe.

²⁶kyūṅki un kī tādād baṛī hai jinheṅ us ne girā kar maut ke ghāṭ utārā hai, us ne muta'addid logoṅ ko mār ḍālā hai.

²⁷us kā ghar pātāl kā rāstā hai jo logoṅ ko maut kī koṭhaṛiyoṅ tak pahuṅchātā hai.