Read Roman Urdu Geo amsāl 8 Bible Online

amsāl 8 - Roman Urdu Geo bible

amsāl 8

¹suno! kyā hikmat āwāz nahīṅ detī? hāṅ, samajh ūṅchī āwāz se elān kartī hai.

²wuh bulandiyoṅ par khaṛī hai, us jagah jahāṅ tamām rāste ek dūsre se milte haiṅ.

³shahr ke darwāzoṅ par jahāṅ log nikalte aur dāḳhil hote haiṅ wahāṅ hikmat zordār āwāz se pukārtī hai,

⁴“ai mardo, maiṅ tum hī ko pukārtī hūṅ, tamām insānoṅ ko āwāz detī hūṅ.

⁵ai sādālauho, hoshyārī sīkh lo! ai ahmaqo, samajh apnā lo!

⁶suno, kyūṅki maiṅ sharāfat kī bāteṅ kartī hūṅ, aur mere hoṅṭ sachchāī pesh karte haiṅ.

⁷merā muṅh sach boltā hai, kyūṅki mere hoṅṭ bedīnī se ghin khāte haiṅ.

⁸jo bhī bāt mere muṅh se nikle wuh rāst hai, ek bhī pechdār yā ṭeṛhī nahīṅ hai.

⁹samajhdār jāntā hai ki merī bāteṅ sab durust haiṅ, ilm rakhne wāle ko mālūm hai ki wuh sahīh haiṅ.

¹⁰chāṅdī kī jagah merī tarbiyat aur ḳhālis sone ke bajāe ilm-o-irfān apnā lo.

¹¹kyūṅki hikmat motiyoṅ se kahīṅ behtar hai, koī bhī ḳhazānā us kā muqābalā nahīṅ kar saktā.

¹²maiṅ jo hikmat hūṅ hoshyārī ke sāth bastī hūṅ, aur maiṅ tamīz kā ilm rakhtī hūṅ.

¹³jo rab kā ḳhauf māntā hai wuh burāī se nafrat kartā hai. mujhe ġhurūr, takabbur, ġhalat chāl-chalan aur ṭeṛhī bātoṅ se nafrat hai.

¹⁴mere pās achchhā mashwarā aur kāmyābī hai. merā dūsrā nām samajh hai, aur mujhe quwwat hāsil hai.

¹⁵mere wasīle se bādshāh saltanat aur hukmrān rāst faisle karte haiṅ.

¹⁶mere zarī'e raīs aur shurafā balki tamām ādil munsif hukūmat karte haiṅ.

¹⁷jo mujhe pyār karte haiṅ unheṅ maiṅ pyār kartī hūṅ, aur jo mujhe ḍhūṅḍte haiṅ wuh mujhe pā lete haiṅ.

¹⁸mere pās izzat-o-daulat, shāndār māl aur rāstī hai.

¹⁹merā phal sone balki ḳhālis sone se kahīṅ behtar hai, merī paidāwār ḳhālis chāṅdī par sabqat rakhtī hai.

²⁰maiṅ rāstī kī rāh par hī chaltī hūṅ, wahīṅ jahāṅ insāf hai.

²¹jo mujh se muhabbat rakhte haiṅ unheṅ maiṅ mīrās meṅ daulat muhayyā kartī hūṅ. un ke godām bhare rahte haiṅ.

²²jab rab taḳhlīq kā silsilā amal meṅ lāyā to pahle us ne mujhe hī banāyā. qadīm zamāne meṅ maiṅ us ke dīgar kāmoṅ se pahle hī wujūd meṅ āī.

²³mujhe azal se muqarrar kiyā gayā, ibtidā hī se jab duniyā abhī paidā nahīṅ huī thī.

²⁴na samundar kī gahrāiyāṅ, na kasrat se phūṭne wāle chashme the jab maiṅ ne janm liyā.

²⁵na pahāṛ apnī apnī jagah par qāim hue the, na pahāṛiyāṅ thīṅ jab maiṅ paidā huī.

²⁶us waqt allāh ne na zamīn, na us ke maidān, aur na duniyā ke pahle ḍhele banāe the.

²⁷jab us ne āsmān ko us kī jagah par lagāyā aur samundar kī gahrāiyoṅ par zamīn kā ilāqā muqarrar kiyā to maiṅ sāth thī.

²⁸jab us ne āsmān par bādaloṅ aur gahrāiyoṅ meṅ sarchashmoṅ kā intizām mazbūt kiyā to maiṅ sāth thī.

²⁹jab us ne samundar kī haddeṅ muqarrar kīṅ aur hukm diyā ki pānī un se tajāwuz na kare, jab us ne zamīn kī bunyādeṅ apnī apnī jagah par rakhīṅ

³⁰to maiṅ māhir kārīgar kī haisiyat se us ke sāth thī. roz-ba-roz maiṅ lutf kā bāis thī, har waqt us ke huzūr rangraliyāṅ manātī rahī.

³¹maiṅ us kī zamīn kī satah par rangraliyāṅ manātī aur insān se lutfandoz hotī rahī.

³²chunāṅche mere beṭo, merī suno, kyūṅki mubārak haiṅ wuh jo merī rāhoṅ par chalte haiṅ.

³³merī tarbiyat mān kar dānishmand ban jāo, use nazarandāz mat karnā.

³⁴mubārak hai wuh jo merī sune, jo roz-ba-roz mere darwāze par chaukas khaṛā rahe, rozānā merī chaukhaṭ par hāzir rahe.

³⁵kyūṅki jo mujhe pāe wuh zindagī aur rab kī manzūrī pātā hai.

³⁶lekin jo mujhe pāne se qāsir rahe wuh apnī jān par zulm kartā hai, jo bhī mujh se nafrat kare use maut pyārī hai.”