Read Roman Urdu Geo amsāl 9 Bible Online

amsāl 9 - Roman Urdu Geo bible

amsāl 9

¹hikmat ne apnā ghar tāmīr karke apne lie sāt satūn tarāsh lie haiṅ.

²apne jānwaroṅ ko zabah karne aur apnī mai tayyār karne ke bād us ne apnī mez bichhāī hai.

³ab us ne apnī naukarāniyoṅ ko bhejā hai, aur ḳhud bhī logoṅ ko shahr kī bulandiyoṅ se ziyāfat karne kī dāwat detī hai,

⁴“jo sādālauh hai, wuh mere pās āe.” nāsamajh logoṅ se wuh kahtī hai,

⁵“āo, merī roṭī khāo, wuh mai piyo jo maiṅ ne tayyār kar rakhī hai.

⁶apnī sādālauh rāhoṅ se bāz āo to jīte rahoge, samajh kī rāh par chal paṛo.”

⁷jo lān-tān karne wāle ko tālīm de us kī apnī ruswāī ho jāegī, aur jo bedīn ko ḍānṭe use nuqsān pahuṅchegā.

⁸lān-tān karne wāle kī malāmat na kar warnā wuh tujh se nafrat karegā. dānishmand kī malāmat kar to wuh tujh se muhabbat karegā.

⁹dānishmand ko hidāyat de to us kī hikmat mazīd baṛhegī, rāstbāz ko tālīm de to wuh apne ilm meṅ izāfā karegā.

¹⁰rab kā ḳhauf mānane se hī hikmat shurū hotī hai, quddūs ḳhudā ko jānane se hī samajh hāsil hotī hai.

¹¹mujh se hī terī umr ke dinoṅ aur sāloṅ meṅ izāfā hogā.

¹²agar tū dānishmand ho to ḳhud is se fāidā uṭhāegā, agar lān-tān karne wālā ho to tujhe hī is kā nuqsān jhelnā paṛegā.

¹³hamāqat bībī belagām aur nāsamajh hai, wuh kuchh nahīṅ jāntī.

¹⁴us kā ghar shahr kī bulandī par wāqe hai. darwāze ke pās kursī par baiṭhī

¹⁵wuh guzarne wāloṅ ko jo sīdhī rāh par chalte haiṅ ūṅchī āwāz se dāwat detī hai,

¹⁶“jo sādālauh hai wuh mere pās āe.” jo nāsamajh haiṅ un se wuh kahtī hai,

¹⁷“chorī kā pānī mīṭhā aur poshīdagī meṅ khāī gaī roṭī lazīz hotī hai.”

¹⁸lekin unheṅ mālūm nahīṅ ki hamāqat bībī ke ghar meṅ sirf murdoṅ kī rūh bastī haiṅ, ki us ke mehmān pātāl kī gahrāiyoṅ meṅ rahte haiṅ.