Read Roman Urdu Geo wāiz 10 Bible Online

wāiz 10 - Roman Urdu Geo bible

wāiz 10

¹marī huī makkhiyāṅ ḳhushbūdār tel ḳharāb kartī haiṅ, aur hikmat aur izzat kī nisbat thoṛī sī hamāqat kā zyādā asar hotā hai.

²dānishmand kā dil sahīh rāh chun letā hai jabki ahmaq kā dil ġhalat rāh par ā jātā hai.

³rāste par chalte waqt bhī ahmaq samajh se ḳhālī hai, jis se bhī mile use batātā hai ki wuh bewuqūf hai. [4]

⁴agar hukmrān tujh se nārāz ho jāe to apnī jagah mat chhoṛ, kyūṅki pursukūn rawayyā baṛī baṛī ġhaltiyāṅ dūr kar detā hai.

⁵mujhe sūraj tale ek aisī burī bāt nazar āī jo aksar hukmrānoṅ se sarzad hotī hai.

⁶ahmaq ko baṛe uhdoṅ par fāiz kiyā jātā hai jabki amīr chhoṭe uhdoṅ par hī rahte haiṅ.

⁷maiṅ ne ġhulāmoṅ ko ghoṛe par sawār aur hukmrānoṅ ko ġhulāmoṅ kī tarah paidal chalte dekhā hai.

⁸jo gaṛhā khode wuh ḳhud us meṅ gir saktā hai, jo dīwār girā de ho saktā hai ki sāṅp use ḍase.

⁹jo kān se patthar nikāle use choṭ lag saktī hai, jo lakaṛī chīr ḍāle wuh zaḳhmī ho jāne ke ḳhatre meṅ hai.

¹⁰agar kulhāṛī kund ho aur koī use tez na kare to zyādā tāqat darkār hai. lihāzā hikmat ko sahīh taur se amal meṅ lā, tab hī kāmyābī hāsil hogī.

¹¹agar is se pahle ki saperā sāṅp par qābū pāe wuh use ḍase to phir saperā hone kā kyā fāidā?

¹²dānishmand apne muṅh kī bātoṅ se dūsroṅ kī mehrbānī hāsil kartā hai, lekin ahmaq ke apne hī hoṅṭ use haṛap kar lete haiṅ.

¹³us kā bayān ahmaqānā bātoṅ se shurū aur ḳhatarnāk bewuqūfiyoṅ se ḳhatm hotā hai.

¹⁴aisā shaḳhs bāteṅ karne se bāz nahīṅ ātā, go insān mustaqbil ke bāre meṅ kuchh nahīṅ jāntā. kaun use batā saktā hai ki us ke bād kyā kuchh hogā?

¹⁵ahmaq kā kām use thakā detā hai, aur wuh shahr kā rāstā bhī nahīṅ jāntā.

¹⁶us mulk par afsos jis kā bādshāh bachchā hai aur jis ke buzurg subh hī ziyāfat karne lagte haiṅ.

¹⁷mubārak hai wuh mulk jis kā bādshāh sharīf hai aur jis ke buzurg nashe meṅ dhut nahīṅ rahte balki munāsib waqt par aur nazm-o-zabt ke sāth khānā khāte haiṅ.

¹⁸jo sust hai us ke ghar ke shahtīr jhukne lagte haiṅ, jis ke hāth ḍhīle haiṅ us kī chhat se pānī ṭapakne lagtā hai.

¹⁹ziyāfat karne se haṅsī-ḳhushī aur mai pīne se zindādilī paidā hotī hai, lekin paisā hī sab kuchh muhayyā kartā hai.

²⁰ḳhayāloṅ meṅ bhī bādshāh par lānat na kar, apne sone ke kamre meṅ bhī amīr par lānat na bhej, aisā na ho ki koī parindā tere alfāz le kar us tak pahuṅchāe.