Read Roman Urdu Geo wāiz 2 Bible Online

wāiz 2 - Roman Urdu Geo bible

wāiz 2

¹maiṅ ne apne āp se kahā, “ā, ḳhushī ko āzmā kar achchhī chīzoṅ kā tajribā kar!” lekin yih bhī bātil hī niklā.

²maiṅ bolā, “haṅsnā behūdā hai, aur ḳhushī se kyā hāsil hotā hai?”

³maiṅ ne dil meṅ apnā jism mai se tar-o-tāzā karne aur hamāqat apnāne ke tarīqe ḍhūnḍ nikāle. is ke pīchhe bhī merī hikmat mālūm karne kī koshish thī, kyūṅki maiṅ deḳhnā chāhtā thā ki jab tak insān āsmān tale jītā rahe us ke lie kyā kuchh karnā mufīd hai.

⁴maiṅ ne baṛe baṛe kām anjām die, apne lie makān tāmīr kie, tākistān lagāe,

⁵muta'addid bāġh aur pārk lagā kar un meṅ muḳhtalif qism ke phaldār daraḳht lagāe.

⁶phalne phūlne wāle jangal kī ābpāshī ke lie maiṅ ne tālāb banwāe.

⁷maiṅ ne ġhulām aur launḍiyāṅ ḳharīd līṅ. aise ġhulām bhī bahut the jo ghar meṅ paidā hue the. mujhe utne gāy-bail aur bheṛ-bakriyāṅ milīṅ jitnī mujh se pahle yarūshalam meṅ kisī ko hāsil na thīṅ.

⁸maiṅ ne apne lie sonā-chāṅdī aur bādshāhoṅ aur sūboṅ ke ḳhazāne jamā kie. maiṅ ne gulūkār mard-o-ḳhawātīn hāsil kie, sāth sāth kasrat kī aisī chīzeṅ jin se insān apnā dil bahlātā hai.

⁹yūṅ maiṅ ne bahut taraqqī karke un sab par sabqat hāsil kī jo mujh se pahle yarūshalam meṅ the. aur har kām meṅ merī hikmat mere dil meṅ qāim rahī.

¹⁰jo kuchh bhī merī āṅkheṅ chāhtī thīṅ wuh maiṅ ne un ke lie muhayyā kiyā, maiṅ ne apne dil se kisī bhī ḳhushī kā inkār na kiyā. mere dil ne mere har kām se lutf uṭhāyā, aur yih merī tamām mehnat-mashaqqat kā ajr rahā.

¹¹lekin jab maiṅ ne apne hāthoṅ ke tamām kāmoṅ kā jāizā liyā, us mehnat-mashaqqat kā jo maiṅ ne kī thī to natījā yihī niklā ki sab kuchh bātil aur hawā ko pakaṛne ke barābar hai. sūraj tale kisī bhī kām kā fāidā nahīṅ hotā.

¹²phir maiṅ hikmat, behūdagī aur hamāqat par ġhaur karne lagā. maiṅ ne sochā, jo ādmī bādshāh kī wafāt par taḳhtnashīn hogā wuh kyā karegā? wuhī kuchh jo pahle bhī kiyā jā chukā hai!

¹³maiṅ ne dekhā ki jis tarah raushnī andhere se behtar hai usī tarah hikmat hamāqat se behtar hai.

¹⁴dānishmand ke sar meṅ āṅkheṅ haiṅ jabki ahmaq andhere hī meṅ chaltā hai. lekin maiṅ ne yih bhī jān liyā ki donoṅ kā ek hī anjām hai.

¹⁵maiṅ ne dil meṅ kahā, “ahmaq kā sā anjām merā bhī hogā. to phir itnī zyādā hikmat hāsil karne kā kyā fāidā hai? yih bhī bātil hai.”

¹⁶kyūṅki ahmaq kī tarah dānishmand kī yād bhī hameshā tak nahīṅ rahegī. āne wāle dinoṅ meṅ sab kī yād miṭ jāegī. ahmaq kī tarah dānishmand ko bhī marnā hī hai!

¹⁷yūṅ sochte sochte maiṅ zindagī se nafrat karne lagā. jo bhī kām sūraj tale kiyā jātā hai wuh mujhe burā lagā, kyūṅki sab kuchh bātil aur hawā ko pakaṛne ke barābar hai.

¹⁸sūraj tale maiṅ ne jo kuchh bhī mehnat-mashaqqat se hāsil kiyā thā us se mujhe nafrat ho gaī, kyūṅki mujhe yih sab kuchh us ke lie chhoṛnā hai jo mere bād merī jagah āegā.

¹⁹aur kyā mālūm ki wuh dānishmand yā ahmaq hogā? lekin jo bhī ho, wuh un tamām chīzoṅ kā mālik hogā jo hāsil karne ke lie maiṅ ne sūraj tale apnī pūrī tāqat aur hikmat sarf kī hai. yih bhī bātil hai.

²⁰tab merā dil māyūs ho kar himmat hārne lagā, kyūṅki jo bhī mehnat-mashaqqat maiṅ ne sūraj tale kī thī wuh bekār sī lagī.

²¹kyūṅki ḳhwāh insān apnā kām hikmat, ilm aur mahārat se kyūṅ na kare, āḳhirkār use sab kuchh kisī ke lie chhoṛnā hai jis ne us ke lie ek unglī bhī nahīṅ hilāī. yih bhī bātil aur baṛī musībat hai.

²²kyūṅki āḳhir meṅ insān ke lie kyā kuchh qāim rahtā hai, jabki us ne sūraj tale itnī mehnat-mashaqqat aur koshishoṅ ke sāth sab kuchh hāsil kar liyā hai?

²³us ke tamām din dukh aur ranjīdagī se bhare rahte haiṅ, rāt ko bhī us kā dil ārām nahīṅ pātā. yih bhī bātil hī hai.

²⁴insān ke lie sab se achchhī bāt yih hai ki khāe pie aur apnī mehnat-mashaqqat ke phal se lutfandoz ho. lekin maiṅ ne yih bhī jān liyā ki allāh hī yih sab kuchh muhayyā kartā hai.

²⁵kyūṅki us ke baġhair kaun khā kar ḳhush ho saktā hai? koī nahīṅ!

²⁶jo insān allāh ko manzūr ho use wuh hikmat, ilm-o-irfān aur ḳhushī atā kartā hai, lekin gunāhgār ko wuh jamā karne aur zaḳhīrā karne kī zimmādārī detā hai tāki bād meṅ yih daulat allāh ko manzūr shaḳhs ke hawāle kī jāe. yih bhī bātil aur hawā ko pakaṛne ke barābar hai.