Read Roman Urdu Geo wāiz 3 Bible Online

wāiz 3 - Roman Urdu Geo bible

wāiz 3

¹har chīz kī apnī ghaṛī hotī, āsmān tale har muāmale kā apnā waqt hotā hai,

²janm lene aur marne kā, paudā lagāne aur ukhāṛne kā,

³mār dene aur shifā dene kā, ḍhā dene aur tāmīr karne kā,

⁴rone aur haṅsne kā, āheṅ bharne aur raqs karne kā,

⁵patthar phaiṅkne aur patthar jamā karne kā, gale milne aur is se bāz rahne kā,

⁶talāsh karne aur kho dene kā, mahfūz rakhne aur phaiṅkne kā,

⁷phāṛne aur sī kar joṛne kā, ḳhāmosh rahne aur bolne kā,

⁸pyār karne aur nafrat karne kā, jang laṛne aur salāmatī se zindagī guzārne kā,

⁹chunāṅche kyā fāidā hai ki kām karne wālā mehnat-mashaqqat kare?

¹⁰maiṅ ne wuh taqlīfdih kām-kāj dekhā jo allāh ne insān ke sapurd kiyā tāki wuh us meṅ uljhā rahe.

¹¹us ne har chīz ko yūṅ banāyā hai ki wuh apne waqt ke lie ḳhūbsūrat aur munāsib ho. us ne insān ke dil meṅ jāwidānī bhī ḍālī hai, go wuh shurū se le kar āḳhir tak us kām kī tah tak nahīṅ pahuṅch saktā jo allāh ne kiyā hai.

¹²maiṅ ne jān liyā ki insān ke lie is se behtar kuchh nahīṅ hai ki wuh ḳhush rahe aur jīte jī zindagī kā mazā le.

¹³kyūṅki agar koī khāe pie aur tamām mehnat-mashaqqat ke sāth sāth ḳhushhāl bhī ho to yih allāh kī baḳhshish hai.

¹⁴mujhe samajh āī ki jo kuchh allāh kare wuh abad tak qāim rahegā. us meṅ na izāfā ho saktā hai na kamī. allāh yih sab kuchh is lie kartā hai ki insān us kā ḳhauf māne.

¹⁵jo hāl meṅ pesh ā rahā hai wuh māzī meṅ pesh ā chukā hai, aur jo mustaqbil meṅ pesh āegā wuh bhī pesh ā chukā hai. hāṅ, jo kuchh guzar chukā hai use allāh dubārā wāpas lātā hai.

¹⁶maiṅ ne sūraj tale mazīd dekhā, jahāṅ adālat karnī hai wahāṅ nāinsāfī hai, jahāṅ insāf karnā hai wahāṅ bedīnī hai.

¹⁷lekin maiṅ dil meṅ bolā, “allāh rāstbāz aur bedīn donoṅ kī adālat karegā, kyūṅki har muāmale aur kām kā apnā waqt hotā hai.”

¹⁸maiṅ ne yih bhī sochā, “jahāṅ tak insānoṅ kā tālluq hai allāh un kī jāṅch-paṛtāl kartā hai tāki unheṅ patā chale ki wuh jānwaroṅ kī mānind haiṅ.

¹⁹kyūṅki insān-o-haiwān kā ek hī anjām hai. donoṅ dam chhoṛte, donoṅ meṅ ek sā dam hai, is lie insān ko haiwān kī nisbat zyādā fāidā hāsil nahīṅ hotā. sab kuchh bātil hī hai.

²⁰sab kuchh ek hī jagah chalā jātā hai, sab kuchh ḳhāk se banā hai aur sab kuchh dubārā ḳhāk meṅ mil jāegā.

²¹kaun yaqīn se kah saktā hai ki insān kī rūh ūpar kī taraf jātī aur haiwān kī rūh nīche zamīn meṅ utartī hai?”

²²ġharz maiṅ ne jān liyā ki insān ke lie is se behtar kuchh nahīṅ hai ki wuh apne kāmoṅ meṅ ḳhush rahe, yihī us ke nasīb meṅ hai. kyūṅki kaun use wuh deḳhne ke qābil banāegā jo us ke bād pesh āegā? koī nahīṅ!