Read Roman Urdu Geo wāiz 4 Bible Online

wāiz 4 - Roman Urdu Geo bible

wāiz 4

¹maiṅ ne ek bār phir nazar ḍālī to mujhe wuh tamām zulm nazar āyā jo sūraj tale hotā hai. mazlūmoṅ ke āṅsū bahte haiṅ, aur tasallī dene wālā koī nahīṅ hotā. zālim un se ziyādatī karte haiṅ, aur tasallī dene wālā koī nahīṅ hotā.

²yih dekh kar maiṅ ne murdoṅ ko mubārak kahā, hālāṅki wuh arse se wafāt pā chuke the. maiṅ ne kahā, “wuh hāl ke zindā logoṅ se kahīṅ mubārak haiṅ.

³lekin in se zyādā mubārak wuh hai jo ab tak wujūd meṅ nahīṅ āyā, jis ne wuh tamām burāiyāṅ nahīṅ dekhīṅ jo sūraj tale hotī haiṅ.”

⁴maiṅ ne yih bhī dekhā ki sab log is lie mehnat-mashaqqat aur mahārat se kām karte haiṅ ki ek dūsre se hasad karte haiṅ. yih bhī bātil aur hawā ko pakaṛne ke barābar hai.

⁵ek taraf to ahmaq hāth par hāth dhare baiṭhne ke bāis apne āp ko tabāhī tak pahuṅchātā hai.

⁶lekin dūsrī taraf agar koī muṭṭhī bhar rozī kamā kar sukūn ke sāth zindagī guzār sake to yih is se behtar hai ki donoṅ muṭṭhiyāṅ sirtoṛ mehnat aur hawā ko pakaṛne kī koshishoṅ ke bād hī bhareṅ.

⁷maiṅ ne sūraj tale mazīd kuchh dekhā jo bātil hai.

⁸ek ādmī akelā hī thā. na us ke beṭā thā, na bhāī. wuh behad mehnat-mashaqqat kartā rahā, lekin us kī āṅkheṅ kabhī apnī daulat se mutma'in na thīṅ. sawāl yih rahā, “maiṅ itnī sirtoṛ koshish kis ke lie kar rahā hūṅ? maiṅ apnī jān ko zindagī ke maze lene se kyūṅ mahrūm rakh rahā hūṅ?” yih bhī bātil aur nāgawār muāmalā hai.

⁹do ek se behtar haiṅ, kyūṅki unheṅ apne kām-kāj kā achchhā ajr milegā.

¹⁰agar ek gir jāe to us kā sāthī use dubārā khaṛā karegā. lekin us par afsos jo gir jāe aur koī sāthī na ho jo use dubārā khaṛā kare.

¹¹nīz, jab do sardiyoṅ ke mausam meṅ mil kar bistar par leṭ jāeṅ to wuh garm rahte haiṅ. jo tanhā hai wuh kis tarah garm ho jāegā?

¹²ek shaḳhs par qābū pāyā jā saktā hai jabki do mil kar apnā difā kar sakte haiṅ. tīn laṛiyoṅ wālī rassī jaldī se nahīṅ ṭūṭtī.

¹³jo laṛkā ġharīb lekin dānishmand hai wuh us buzurg lekin ahmaq bādshāh se kahīṅ behtar hai jo tambīh mānane se inkār kare.

¹⁴kyūṅki go wuh būṛhe bādshāh kī hukūmat ke daurān ġhurbat meṅ paidā huā thā to bhī wuh jel se nikal kar bādshāh ban gayā.

¹⁵lekin phir maiṅ ne dekhā ki sūraj tale tamām log ek aur laṛke ke pīchhe ho lie jise pahle kī jagah taḳhtnashīn honā thā.

¹⁶un tamām logoṅ kī intihā nahīṅ thī jin kī qiyādat wuh kartā thā. to bhī jo bād meṅ āeṅge wuh us se ḳhush nahīṅ hoṅge. yih bhī bātil aur hawā ko pakaṛne ke barābar hai.