Read Roman Urdu Geo ġhazal-ul-ġhazalāt 6 Bible Online

ġhazal-ul-ġhazalāt 6 - Roman Urdu Geo bible

ġhazal-ul-ġhazalāt 6

¹ai tū jo auratoṅ meṅ sab se ḳhūbsūrat hai, terā mahbūb kidhar chalā gayā hai? us ne kaun sī simt iḳhtiyār kī tāki ham tere sāth us kā khoj lagāeṅ?

²merā mahbūb yahāṅ se utar kar apne bāġh meṅ chalā gayā hai, wuh balsān kī kyāriyoṅ ke pās gayā hai tāki bāġhoṅ meṅ chare aur sosan ke phūl chune.

³maiṅ apne mahbūb kī hī hūṅ, aur wuh merā hī hai, wuh jo sosanoṅ meṅ chartā hai.

⁴merī mahbūbā, tū tirzā shahr jaisī hasīn, yarūshalam jaisī ḳhūbsūrat aur alambardār dastoṅ jaisī robdār hai.

⁵apnī nazaroṅ ko mujh se haṭā le, kyūṅki wuh mujh meṅ uljhan paidā kar rahī haiṅ. tere bāl un bakriyoṅ kī mānind haiṅ jo uchhaltī kūdtī koh-e-jiliād se utartī haiṅ.

⁶tere dāṅt abhī abhī nahlāī huī bheṛoṅ jaise safed haiṅ. har dāṅt kā juṛwāṅ hai, ek bhī gum nahīṅ huā.

⁷niqāb ke pīchhe tere gāloṅ kī jhalak anār ke ṭukṛoṅ kī mānind dikhāī detī hai.

⁸go bādshāh kī 60 bīwiyāṅ, 80 dāshtāeṅ aur beshumār kuṅwāriyāṅ hoṅ

⁹lekin merī kabūtarī, merī kāmil sāthī lāsānī hai. wuh apnī māṅ kī wāhid beṭī hai, jis ne use janm diyā us kī pāk lāḍlī hai. beṭiyoṅ ne use dekh kar use mubārak kahā, rāniyoṅ aur dāshtāoṅ ne us kī tārīf kī,

¹⁰“yih kaun hai jo tulū-e-subh kī tarah chamak uṭhī, jo chāṅd jaisī ḳhūbsūrat, āftāb jaisī pāk aur alambardār dastoṅ jaisī robdār hai?”

¹¹maiṅ aḳhroṭ ke bāġh meṅ utar āyā tāki wādī meṅ phūṭne wāle paudoṅ kā muāinā karūṅ. maiṅ yih bhī mālūm karnā chāhtā thā ki kyā angūr kī koṅpleṅ nikal āī yā anār ke phūl lag gae haiṅ.

¹²lekin chalte chalte na jāne kyā huā, merī ārzū ne mujhe merī sharīf qaum ke rathoṅ ke pās pahuṅchāyā.

¹³ai shūlammīt, lauṭ ā, lauṭ ā! muṛ kar lauṭ ā tāki ham tujh par nazar kareṅ. tum shūlammīt ko kyūṅ deḳhnā chāhtī ho? ham lashkargāh kā loknāch deḳhnā chāhtī haiṅ!