Read Roman Urdu Geo ġhazal-ul-ġhazalāt 7 Bible Online

ġhazal-ul-ġhazalāt 7 - Roman Urdu Geo bible

ġhazal-ul-ġhazalāt 7

¹ai raīs kī beṭī, jūtoṅ meṅ chalne kā terā andāz kitnā manmohan hai! terī ḳhushwazā rāneṅ māhir kārīgar ke zewarāt kī mānind haiṅ.

²terī nāf pyālā hai jo mai se kabhī nahīṅ mahrūm rahtī. terā jism gandum kā ḍher hai jis kā ihātā sosan ke phūloṅ se kiyā gayā hai.

³terī chhātiyāṅ ġhazāl ke juṛwāṅ bachchoṅ kī mānind haiṅ.

⁴terī gardan hāthīdāṅt kā mīnār, terī āṅkheṅ hasbon shahr ke tālāb haiṅ, wuh jo bat-rabbīm ke darwāze ke pās haiṅ. terī nāk mīnār-e-lubnān kī mānind hai jis kā muṅh damishq kī taraf hai.

⁵terā sar koh-e-karmil kī mānind hai, tere khule bāl arġhawān kī tarah qīmtī aur dilkash haiṅ. bādshāh terī zulfoṅ kī zanjīroṅ meṅ jakaṛā rahtā hai.

⁶ai ḳhushiyoṅ se labrez muhabbat, tū kitnī hasīn hai, kitnī dilrubā!

⁷terā qad-o-qāmat khajūr ke daraḳht sā, terī chhātiyāṅ angūr ke guchchhoṅ jaisī haiṅ.

⁸maiṅ bolā, “maiṅ khajūr ke daraḳht par chaṛh kar us ke phūldār guchchhoṅ [5] par hāth lagāūṅgā.” terī chhātiyāṅ angūr ke guchchhoṅ kī mānind hoṅ, tere sāṅs kī ḳhushbū seboṅ kī ḳhushbū jaisī ho.

⁹terā muṅh behtarīn mai ho, aisī mai jo sīdhī mere mahbūb ke muṅh meṅ jā kar narmī se hoṅṭoṅ aur dāṅtoṅ meṅ se guzar jāe.

¹⁰maiṅ apne mahbūb kī hī hūṅ, aur wuh mujhe chāhtā hai.

¹¹ā, mere mahbūb, ham shahr se nikal kar dehāt meṅ rāt guzāreṅ.

¹²ā, ham subhsawere angūr ke bāġhoṅ meṅ jā kar mālūm kareṅ ki kyā beloṅ se koṅpleṅ nikal āī haiṅ aur phūl lage haiṅ, ki kyā anār ke daraḳht khil rahe haiṅ. wahāṅ maiṅ tujh par apnī muhabbat kā izhār karūṅgī.

¹³mardumgayāh [6] kī ḳhushbū phail rahī, aur hamāre darwāze par har qism kā lazīz phal hai, naī fasal kā bhī aur guzarī kā bhī. kyūṅki maiṅ ne yih chīzeṅ tere lie, apne mahbūb ke lie mahfūz rakhī haiṅ.