Read Roman Urdu Geo yasāyāh 10 Bible Online

yasāyāh 10 - Roman Urdu Geo bible

yasāyāh 10

¹tum par afsos jo ġhalat qawānīn sādir karte aur zālim fatwe dete ho

²tāki ġharīboṅ kā haq māro aur mazlūmoṅ ke huqūq pāmāl karo. bewāeṅ tumhārā shikār hotī haiṅ, aur tum yatīmoṅ ko lūṭ lete ho.

³lekin adālat ke din tum kyā karoge, jab dūr dūr se zabardast tūfān tum par ān paṛegā to tum madad ke lie kis ke pās bhāgoge aur apnā māl-o-daulat kahāṅ mahfūz rakh chhoṛoge?

⁴jo jhuk kar qaidī na bane wuh gir kar halāk ho jāegā. tāham rab kā ġhazab ṭhanḍā nahīṅ hogā balki us kā hāth mārne ke lie uṭhā hī rahegā.

⁵asūr par afsos jo mere ġhazab kā ālā hai, jis ke hāth meṅ mere qahr kī lāṭhī hai.

⁶maiṅ use ek bedīn qaum ke ḳhilāf bhej rahā hūṅ, ek qaum ke ḳhilāf jo mujhe ġhussā dilātī hai. maiṅ ne asūr ko hukm diyā hai ki use lūṭ kar galī kī kīchaṛ kī tarah pāmāl kar.

⁷lekin us kā apnā irādā farq hai. wuh aisī soch nahīṅ rakhtā balki sab kuchh tabāh karne par tulā huā hai, bahut qaumoṅ ko nest-o-nābūd karne par āmādā hai.

⁸wuh faḳhr kartā hai, “mere tamām afsar to bādshāh haiṅ.

⁹phir hamārī futūhāt par ġhaur karo. karkimīs, kalno, arfād, hamāt, damishq aur sāmariyya jaise tamām shahr yake bād dīgare mere qabze meṅ ā gae haiṅ.

¹⁰maiṅ ne kaī saltanatoṅ par qābū pā liyā hai jin ke but yarūshalam aur sāmariyya ke butoṅ se kahīṅ behtar the.

¹¹sāmariyya aur us ke butoṅ ko maiṅ barbād kar chukā hūṅ, aur ab maiṅ yarūshalam aur us ke butoṅ ke sāth bhī aisā hī karūṅga!”

¹²lekin koh-e-siyyūn par aur yarūshalam meṅ apne tamām maqāsid pūre karne ke bād rab farmāegā, “maiṅ shāh-e-asūr ko bhī sazā dūṅgā, kyūṅki us ke maġhrūr dil se kitnā burā kām ubhar āyā hai, aur us kī āṅkheṅ kitne ġhurūr se deḳhtī haiṅ.

¹³wuh sheḳhī mār kar kahtā hai, ‘maiṅ ne apne hī zor-e-bāzū aur hikmat se yih sab kuchh kar liyā hai, kyūṅki maiṅ samajhdār hūṅ. maiṅ ne qaumoṅ kī hudūd ḳhatm karke un ke ḳhazānoṅ ko lūṭ liyā aur zabardast sānḍ kī tarah un ke bādshāhoṅ ko mār mār kar ḳhāk meṅ milā diyā hai.

¹⁴jis tarah koī apnā hāth ghoṅsle meṅ ḍāl kar anḍe nikāl letā hai usī tarah maiṅ ne qaumoṅ kī daulat chhīn lī hai. ām ādmī parindoṅ ko bhagā kar un ke chhoṛe hue anḍe ikaṭṭhe kar letā hai jabki maiṅ ne yihī sulūk duniyā ke tamām mamālik ke sāth kiyā. jab maiṅ unheṅ apne qabze meṅ lāyā to ek ne bhī apne paroṅ ko phaṛphaṛāne yā choṅch khol kar chīṅ chīṅ karne kī jur'at na kī’.”

¹⁵lekin kyā kulhāṛī us ke sāmne sheḳhī baghārtī jo use chalātā hai? kyā ārī us ke sāmne apne āp par faḳhr kartī jo use istemāl kartā hai? yih utnā hī nāmumkin hai jitnā yih ki lāṭhī pakaṛne wāle ko ghumāe yā ḍanḍā ādmī ko uṭhāe.

¹⁶chunāṅche qādir-e-mutlaq rabb-ul-afwāj asūr ke moṭe-tāze faujiyoṅ meṅ ek marz phailā degā jo un ke jismoṅ ko raftā raftā zāe karegā. asūr kī shān-o-shaukat ke nīche ek bhaṛaktī huī āg lagāī jāegī.

¹⁷us waqt isrāīl kā nūr āg aur isrāīl kā quddūs sholā ban kar asūr kī kāṅṭedār jhāṛiyoṅ aur ūṅṭkaṭāroṅ ko ek hī din meṅ bhasm kar degā.

¹⁸wuh us ke shāndār jangloṅ aur bāġhoṅ ko mukammal taur par tabāh kar degā, aur wuh marīz kī tarah ghul ghul kar zāil ho jāeṅge.

¹⁹jangloṅ ke itne kam daraḳht bacheṅge ki bachchā bhī unheṅ gin kar kitāb meṅ darj kar sakegā.

²⁰us din se isrāīl kā baqiyā yānī yāqūb ke gharāne kā bachā-khuchā hissā us par mazīd inhisār nahīṅ karegā jo use mārtā rahā thā, balki wuh pūrī wafādārī se isrāīl ke quddūs, rab par bharosā rakhegā.

²¹baqiyā wāpas āegā, yāqūb kā bachā-khuchā hissā qawī ḳhudā ke huzūr lauṭ āegā.

²²ai isrāīl, go tū sāhil par kī ret jaisā beshumār kyūṅ na ho to bhī sirf ek bachā huā hissā wāpas āegā. tere barbād hone kā faislā ho chukā hai, aur insāf kā sailāb mulk par āne wālā hai.

²³kyūṅki is kā aṭal faislā ho chukā hai ki qādir-e-mutlaq rabb-ul-afwāj pūre mulk par halākat lāne ko hai.

²⁴is lie qādir-e-mutlaq rabb-ul-afwāj farmātā hai, “ai siyyūn meṅ basne wālī merī qaum, asūr se mat ḍarnā jo lāṭhī se tujhe mārtā hai aur tere ḳhilāf lāṭhī yūṅ uṭhātā hai jis tarah pahle misr kiyā kartā thā.

²⁵merā tujh par ġhussā jald hī ṭhanḍā ho jāegā aur merā ġhazab asūriyoṅ par nāzil ho kar unheṅ ḳhatm karegā.”

²⁶jis tarah rabb-ul-afwāj ne midiyāniyoṅ ko mārā jab jidāūn ne oreb kī chaṭān par unheṅ shikast dī usī tarah wuh asūriyoṅ ko bhī koṛe se māregā. aur jis tarah rab ne apnī lāṭhī mūsā ke zarī'e samundar ke ūpar uṭhāī aur natīje meṅ misr kī fauj us meṅ ḍūb gaī bilkul usī tarah wuh asūriyoṅ ke sāth bhī karegā.

²⁷us din asūr kā bojh tere kandhoṅ par se utar jāegā, aur us kā jūā terī gardan par se dūr ho kar ṭūṭ jāegā. fāteh ne yashīmon kī taraf se chaṛh kar

²⁸ayyāt par hamlā kiyā hai. us ne mijron meṅ se guzar kar mikmās meṅ apnā lashkarī sāmān chhoṛ rakhā hai.

²⁹darre ko pār karke wuh kahte haiṅ, “āj ham rāt ko jibā meṅ guzāreṅge.” rāmā thartharā rahā aur sāūl kā shahr jibiā bhāg gayā hai.

³⁰ai jallīm beṭī, zor se chīḳheṅ mār! ai laisā, dhyān de! ai anatot, use jawāb de!

³¹madmīnā farār ho gayā aur jebīm ke bāshindoṅ ne dūsrī jaghoṅ meṅ panāh lī hai.

³²āj hī fāteh nob ke pās ruk kar siyyūn beṭī ke pahāṛ yānī koh-e-yarūshalam ke ūpar hāth hilāegā. [6]

³³dekho, qādir-e-mutlaq rabb-ul-afwāj baṛe zor se shāḳhoṅ ko toṛne wālā hai. tab ūṅche ūṅche daraḳht kaṭ kar gir jāeṅge, aur jo sarfarāz haiṅ unheṅ ḳhāk meṅ milāyā jāegā.

³⁴wuh kulhāṛī le kar ghane jangal ko kāṭ ḍālegā balki lubnān bhī zor-āwar ke hāthoṅ gir jāegā.