Read Roman Urdu Geo yasāyāh 11 Bible Online

yasāyāh 11 - Roman Urdu Geo bible

yasāyāh 11

¹yassī [7] ke muḍh meṅ se koṅpal phūṭ niklegī, aur us kī bachī huī jaṛoṅ se shāḳh nikal kar phal lāegī.

²rab kā rūh us par ṭhahregā yānī hikmat aur samajh kā rūh, mashwarat aur quwwat kā rūh, irfān aur rab ke ḳhauf kā rūh.

³rab kā ḳhauf use azīz hogā. na wuh dikhāwe kī binā par faislā karegā, na sunī-sunāī bātoṅ kī binā par fatwā degā

⁴balki insāf se bebasoṅ kī adālat karegā aur ġhairjānibdārī se mulk ke musībatzadoṅ kā faislā karegā. apne kalām kī lāṭhī se wuh zamīn ko māregā aur apne muṅh kī phūṅk se bedīn ko halāk karegā.

⁵wuh rāstbāzī ke paṭke aur wafādārī ke zerjāme se mulabbas rahegā.

⁶bheṛiyā us waqt bheṛ ke bachche ke pās ṭhahregā, aur chītā bheṛ ke bachche ke pās ārām karegā. bachhṛā, jawān sherbabar aur moṭā-tāzā bail mil kar raheṅge, aur chhoṭā laṛkā unheṅ hāṅk kar saṅbhālegā.

⁷gāy rīchh ke sāth charegī, aur un ke bachche ek dūsre ke sāth ārām kareṅge. sherbabar bail kī tarah bhūsā khāegā.

⁸shīrḳhwār bachchā nāg kī bāṅbī ke qarīb khelegā, aur jawān bachchā apnā hāth zahrīle sāṅp ke bil meṅ ḍālegā.

⁹mere tamām muqaddas pahāṛ par na ġhalat aur na tabāhkun kām kiyā jāegā. kyūṅki mulk rab ke irfān se yūṅ māmūr hogā jis tarah samundar pānī se bharā rahtā hai.

¹⁰us din yassī [8] kī jaṛ se phūṭī huī koṅpal ummatoṅ ke lie jhanḍā hogā. qaumeṅ us kī tālib hoṅgī, aur us kī sukūnatgāh jalālī hogī.

¹¹us din rab ek bār phir apnā hāth baṛhāegā tāki apnī qaum kā wuh bachā-khuchā hissā dubārā hāsil kare jo asūr, shimālī aur junūbī misr, ethūpiyā, ailām, bābal, hamāt aur sāhilī ilāqoṅ meṅ muntashir hogā.

¹²wuh qaumoṅ ke lie jhanḍā gāṛ kar isrāīl ke jilāwatanoṅ ko ikaṭṭhā karegā. hāṅ, wuh yahūdāh ke bikhre afrād ko duniyā ke chāroṅ konoṅ se lā kar jamā karegā.

¹³tab isrāīl kā hasad ḳhatm ho jāegā, aur yahūdāh ke dushman nest-o-nābūd ho jāeṅge. na isrāīl yahūdāh se hasad karegā, na yahūdāh isrāīl se dushmanī rakhegā.

¹⁴phir donoṅ maġhrib meṅ filistī mulk par jhapaṭ paṛeṅge aur mil kar mashriq ke bāshindoṅ ko lūṭ leṅge. adom aur moāb un ke qabze meṅ āeṅge, aur ammon un ke tābe ho jāegā.

¹⁵rab bahr-e-qulzum ko ḳhushk karegā aur sāth sāth daryā-e-furāt ke ūpar hāth hilā kar us par zordār hawā chalāegā. tab daryā sāt aisī nahroṅ meṅ baṭ jāegā jo paidal hī pār kī jā sakeṅgī.

¹⁶ek aisā rāstā banegā jo rab ke bache hue afrād ko asūr se isrāīl tak pahuṅchāegā, bilkul us rāste kī tarah jis ne isrāīliyoṅ ko misr se nikalte waqt isrāīl tak pahuṅchāyā thā.