Read Roman Urdu Geo yasāyāh 15 Bible Online

yasāyāh 15 - Roman Urdu Geo bible

yasāyāh 15

¹moāb ke bāre meṅ rab kā farmān: ek hī rāt meṅ moāb kā shahr ār tabāh ho gayā hai. ek hī rāt meṅ moāb kā shahr qīr barbād ho gayā hai.

²ab dībon ke bāshinde mātam karne ke lie apne mandir aur pahāṛī qurbāngāhoṅ kī taraf chaṛh rahe haiṅ. moāb apne shahroṅ nabū aur mīdabā par wāwailā kar rahā hai. har sar munḍā huā aur har dāṛhī kaṭ gaī hai.

³galiyoṅ meṅ wuh ṭāṭ se mulabbas phir rahe haiṅ, chhatoṅ par aur chaukoṅ meṅ sab ro ro kar āh-o-bukā kar rahe haiṅ.

⁴hasbon aur ilīālī madad ke lie pukār rahe haiṅ, aur un kī āwāzeṅ yahaz tak sunāī de rahī haiṅ. is lie moāb ke musallah mard jang ke nāre lagā rahe haiṅ, go wuh andar hī andar kāṅp rahe haiṅ.

⁵merā dil moāb ko dekh kar ro rahā hai. us ke muhājirīn bhāg kar zuġhar aur ijlat-shalīshiyāh tak pahuṅch rahe haiṅ. log ro ro kar lūhīt kī taraf chaṛh rahe haiṅ, wuh horonāim tak jāne wāle rāste par chalte hue apnī tabāhī par giryā-o-zārī kar rahe haiṅ.

⁶nimrīm kā pānī sūkh gayā hai, ghās jhulas gaī hai, tamām hariyālī ḳhatm ho gaī hai, sabzāzāroṅ kā nām-o-nishān tak nahīṅ rahā.

⁷is lie log apnā sārā jamāshudā sāmān sameṭ kar wādī-e-safedā ko ubūr kar rahe haiṅ.

⁸chīḳheṅ moāb kī hudūd tak gūṅj rahī haiṅ, hāy hāy kī āwāzeṅ ijlāim aur bair-elīm tak sunāī de rahī haiṅ.

⁹lekin go dīmon kī nahar ḳhūn se surḳh ho gaī hai, tāham maiṅ us par mazīd musībat lāūṅgā. maiṅ sherbabar bhejūṅgā jo un par bhī dhāwā boleṅge jo moāb se bach nikle hoṅge aur un par bhī jo mulk meṅ pīchhe rah gae hoṅge.