Read Roman Urdu Geo yasāyāh 19 Bible Online

yasāyāh 19 - Roman Urdu Geo bible

yasāyāh 19

¹misr ke bāre meṅ allāh kā farmān: rab tezrau bādal par sawār ho kar misr ā rahā hai. us ke sāmne misr ke but thartharā rahe haiṅ aur misr kī himmat ṭūṭ gaī hai.

²“maiṅ misriyoṅ ko ek dūsre ke sāth laṛne par uksā dūṅgā. bhāī bhāī ke sāth, paṛosī paṛosī ke sāth, shahr shahr ke sāth, aur bādshāhī bādshāhī ke sāth jang karegī.

³misr kī rūh muztarib ho jāegī, aur maiṅ un ke mansūboṅ ko darham-barham kar dūṅgā. go wuh butoṅ, murdoṅ kī rūhoṅ, un se rābitā karne wāloṅ aur qismat kā hāl batāne wāloṅ se mashwarā kareṅge,

⁴lekin maiṅ unheṅ ek zālim mālik ke hawāle kar dūṅgā, aur ek saḳht bādshāh un par hukūmat karegā.” yih hai qādir-e-mutlaq rabb-ul-afwāj kā farmān.

⁵daryā-e-nīl kā pānī ḳhatm ho jāegā, wuh bilkul sūkh jāegā.

⁶misr kī nahroṅ se badbū phailegī balki misr ke nāle ghaṭte ghaṭte ḳhushk ho jāeṅge. narsal aur sarkanḍe murjhā jāeṅge.

⁷daryā-e-nīl ke dahāne tak jitnī bhī hariyālī aur fasleṅ kināre par ugtī haiṅ wuh sab pazhmurdā ho jāeṅgī aur hawā meṅ bikhar kar ġhāib ho jāeṅgī.

⁸machhere āh-o-zārī kareṅge, daryā meṅ kāṅṭā aur jāl ḍālne wāle ghaṭte jāeṅge.

⁹san ke reshoṅ se dhāgā banāne wāloṅ ko sharm āegī, aur jūlāhoṅ kā rang faq paṛ jāegā.

¹⁰kapṛā banāne wāle saḳht māyūs hoṅge, tamām mazdūr dil-bardāshtā hoṅge.

¹¹zuan ke afsar nāsamajh hī haiṅ, fir'aun ke dānā mushīr use ahmaqānā mashware de rahe haiṅ. tum misrī bādshāh ke sāmne kis tarah dāwā kar sakte ho, “maiṅ dānishmandoṅ ke halqe meṅ shāmil aur qadīm bādshāhoṅ kā wāris hūṅ”?

¹²ai fir'aun, ab tere dānishmand kahāṅ haiṅ? wuh mālūm karke tujhe batāeṅ ki rabb-ul-afwāj misr ke sāth kyā kuchh karne kā irādā rakhtā hai.

¹³zuan ke afsar ahmaq ban baiṭhe haiṅ, memfis ke buzurgoṅ ne dhokā khāyā hai. us ke qabāilī sardāroṅ ke fareb se misr ḍagmagāne lagā hai.

¹⁴kyūṅki rab ne un meṅ abtarī kī rūh ḍāl dī hai. jis tarah nashe meṅ dhut sharābī apnī qai meṅ laṛkhaṛātā rahtā hai usī tarah misr un ke mashwaroṅ se ḍāṅwāṅḍol ho gayā hai, ḳhwāh wuh kyā kuchh kyūṅ na kare.

¹⁵us kī koī bāt nahīṅ bantī, ḳhwāh sar ho yā dum, koṅpal ho yā tanā.

¹⁶misrī us din auratoṅ jaise kamzor hoṅge. jab rabb-ul-afwāj unheṅ mārne ke lie apnā hāth uṭhāegā to wuh ghabrā kar kāṅp uṭheṅge.

¹⁷mulk-e-yahūdāh misriyoṅ ke lie sharm kā bāis banegā. jab bhī us kā zikr hogā to wuh dahshat khāeṅge, kyūṅki unheṅ wuh mansūbā yād āegā jo rab ne un ke ḳhilāf bāndhā hai.

¹⁸us din misr ke pāṅch shahr kan'ān kī zabān apnā kar rabb-ul-afwāj ke nām par qasam khāeṅge. un meṅ se ek ‘tabāhī kā shahr’ kahlāegā. [11]

¹⁹us din mulk-e-misr ke bīch meṅ rab ke lie qurbāngāh maḳhsūs kī jāegī, aur us kī sarhad par rab kī yād meṅ satūn khaṛā kiyā jāegā.

²⁰yih donoṅ rabb-ul-afwāj kī huzūrī kī nishāndihī kareṅge aur gawāhī deṅge ki wuh maujūd hai. chunāṅche jab un par zulm kiyā jāegā to wuh chillā kar us se faryād kareṅge, aur rab un ke pās najātdahindā bhej degā jo un kī ḳhātir laṛ kar unheṅ bachāegā.

²¹yūṅ rab apne āp ko misriyoṅ par zāhir karegā. us din wuh rab ko jān leṅge, aur zabah aur ġhallā kī qurbāniyāṅ chaṛhā kar us kī parastish kareṅge. wuh rab ke lie mannateṅ mān kar un ko pūrā kareṅge.

²²rab misr ko māregā bhī aur use shifā bhī degā. misrī rab kī taraf rujū kareṅge to wuh un kī iltijāoṅ ke jawāb meṅ unheṅ shifā degā.

²³us din ek pakkī saṛak misr ko asūr ke sāth munsalik kar degī. asūrī aur misrī āzādī se ek dūsre ke mulk meṅ āeṅge, aur donoṅ mil kar allāh kī ibādat kareṅge.

²⁴us din isrāīl bhī misr aur asūr ke ittihād meṅ sharīk ho kar tamām duniyā ke lie barkat kā bāis hogā.

²⁵kyūṅki rabb-ul-afwāj unheṅ barkat de kar farmāegā, “merī qaum misr par barkat ho, mere hāthoṅ se bane mulk asūr par merī barkat ho, merī mīrās isrāīl par barkat ho.”