Read Roman Urdu Geo yasāyāh 2 Bible Online

yasāyāh 2 - Roman Urdu Geo bible

yasāyāh 2

¹yasāyāh bin āmūs ne yahūdāh aur yarūshalam ke bāre meṅ zail kī royā dekhī,

²āḳhirī ayyām meṅ rab ke ghar kā pahāṛ mazbūtī se qāim hogā. sab se baṛā yih pahāṛ dīgar tamām bulandiyoṅ se kahīṅ zyādā sarfarāz hogā. tab tamām qaumeṅ jauq-dar-jauq us ke pās pahuṅcheṅgī,

³aur beshumār ummateṅ ā kar kaheṅgī, “āo, ham rab ke pahāṛ par chaṛh kar yāqūb ke ḳhudā ke ghar ke pās jāeṅ tāki wuh hameṅ apnī marzī kī tālīm de aur ham us kī rāhoṅ par chaleṅ.” kyūṅki siyyūn pahāṛ se rab kī hidāyat niklegī, aur yarūshalam se us kā kalām sādir hogā.

⁴rab bain-ul-aqwāmī jhagaṛoṅ ko nipṭāegā aur beshumār qaumoṅ kā insāf karegā. tab wuh apnī talwāroṅ ko kūṭ kar phāle banāeṅgī aur apne nezoṅ ko kāṅṭ-chhāṅṭ ke auzār meṅ tabdīl kareṅgī. ab se na ek qaum dūsrī par hamlā karegī, na log jang karne kī tarbiyat hāsil kareṅge.

⁵ai yāqūb ke gharāne, āo ham rab ke nūr meṅ chaleṅ!

⁶ai allāh, tū ne apnī qaum, yāqūb ke gharāne ko tark kar diyā hai. aur kyā ajab! kyūṅki wuh mashriqī jādūgarī se bhar gae haiṅ. filistiyoṅ kī tarah hamāre log bhī qismat kā hāl pūchhte haiṅ, wuh pardesiyoṅ ke sāth baġhalgīr rahte haiṅ.

⁷isrāīl sone-chāṅdī se bhar gayā hai, us ke ḳhazānoṅ kī had hī nahīṅ rahī. har taraf ghoṛe hī ghoṛe nazar āte haiṅ, aur un ke rath gine nahīṅ jā sakte.

⁸lekin sāth sāth un kā mulk butoṅ se bhī bhar gayā hai. jo chīzeṅ un ke hāthoṅ ne banāīṅ un ke sāmne wuh jhuk jāte haiṅ, jo kuchh un kī ungliyoṅ ne tashkīl diyā use wuh sijdā karte haiṅ.

⁹chunāṅche ab unheṅ ḳhud jhukāyā jāegā, unheṅ past kiyā jāegā. ai rab, unheṅ muāf na kar!

¹⁰chaṭānoṅ meṅ ghus jāo! ḳhāk meṅ chhup jāo! kyūṅki rab kā dahshatangez aur shāndār jalāl āne ko hai.

¹¹tab insān kī maġhrūr āṅkhoṅ ko nīchā kiyā jāegā, mardoṅ kā takabbur ḳhāk meṅ milāyā jāegā. us din sirf rab hī sarfarāz hogā.

¹²kyūṅki rabb-ul-afwāj ne ek ḳhās din ṭhahrāyā hai jis meṅ sab kuchh jo maġhrūr, buland yā sarfarāz ho zer kiyā jāegā.

¹³lubnān meṅ deodār ke tamām buland-o-bālā daraḳht, basan ke kul balūt,

¹⁴tamām ālī pahāṛ aur ūṅchī pahāṛiyāṅ,

¹⁵har azīm burj aur qilāband dīwār,

¹⁶samundar kā har azīm tijāratī aur shāndār jahāz zer ho jāegā.

¹⁷chunāṅche insān kā ġhurūr ḳhāk meṅ milāyā jāegā aur mardoṅ kā takabbur nīchā kar diyā jāegā. us din sirf rab hī sarfarāz hogā,

¹⁸aur but sab ke sab fanā ho jāeṅge.

¹⁹jab rab zamīn ko dahshatzadā karne ke lie uṭh khaṛā hogā to log miṭṭī ke gaṛhoṅ meṅ khisak jāeṅge. rab kī mahīb aur shāndār tajallī ko dekh kar wuh chaṭānoṅ ke ġhāroṅ meṅ chhup jāeṅge.

²⁰us din insān sone-chāṅdī ke un butoṅ ko phaiṅk degā jinheṅ us ne sijdā karne ke lie banā liyā thā. unheṅ chūhoṅ aur chamgādaṛoṅ ke āge phaiṅk kar

²¹wuh chaṭānoṅ ke shigāfoṅ aur darāṛoṅ meṅ ghus jāeṅge tāki rab kī mahīb aur shāndār tajallī se bach jāeṅ jab wuh zamīn ko dahshatzadā karne ke lie uṭh khaṛā hogā.

²²chunāṅche insān par etimād karne se bāz āo jis kī zindagī dam bhar kī hai. us kī qadar hī kyā hai?