Read Roman Urdu Geo yasāyāh 20 Bible Online

yasāyāh 20 - Roman Urdu Geo bible

yasāyāh 20

¹ek din asūrī bādshāh sarjūn ne apne kamānḍar ko ashdūd se laṛne bhejā. jab asūriyoṅ ne us filistī shahr par hamlā kiyā to wuh un ke qabze meṅ ā gayā.

²tīn sāl pahle rab yasāyāh bin āmūs se hamkalām huā thā, “jā, ṭāṭ kā jo libās tū pahne rahā hai utār. apne jūtoṅ ko bhī utār.” nabī ne aisā hī kiyā aur isī hālat meṅ phirtā rahā thā.

³jab ashdūd asūriyoṅ ke qabze meṅ ā gayā to rab ne farmāyā, “mere ḳhādim yasāyāh ko barahnā aur nange pāoṅ phirte tīn sāl ho gae haiṅ. is se us ne alāmatī taur par is kī nishāndihī kī hai ki misr aur ethūpiyā kā kyā anjām hogā.

⁴shāh-e-asūr misrī qaidiyoṅ aur ethūpiyā ke jilāwatanoṅ ko isī hālat meṅ apne āge āge hāṅkegā. naujawān aur buzurg sab barahnā aur nange pāoṅ phireṅge, wuh kamr se le kar pāoṅ tak barahnā hoṅge. misr kitnā sharmindā hogā.

⁵yih dekh kar filistī dahshat khāeṅge. unheṅ sharm āegī, kyūṅki wuh ethūpiyā se ummīd rakhte aur apne misrī ittihādī par faḳhr karte the.

⁶us waqt is sāhilī ilāqe ke bāshinde kaheṅge, ‘dekho un logoṅ kī hālat jin se ham ummīd rakhte the. un hī ke pās ham bhāg kar āe tāki madad aur asūrī bādshāh se chhuṭkārā mil jāe. agar un ke sāth aisā huā to ham kis tarah bacheṅge’?”