Read Roman Urdu Geo yasāyāh 21 Bible Online

yasāyāh 21 - Roman Urdu Geo bible

yasāyāh 21

¹daldal ke ilāqe [12] ke bāre meṅ allāh kā farmān: jis tarah dasht-e-najab meṅ tūfān ke tez jhoṅke bār bār ā paṛte haiṅ usī tarah āfat bayābān se āegī, dushman dahshatnāk mulk se ā kar tujh par ṭūṭ paṛegā.

²rab ne haulnāk royā meṅ mujh par zāhir kiyā hai ki namak-harām aur halākū harkat meṅ ā gae haiṅ. ai ailām chal, bābal par hamlā kar! ai mādī uṭh, shahr kā muhāsarā kar! maiṅ hone dūṅgā ki bābal ke mazlūmoṅ kī āheṅ band ho jāeṅgī.

³is lie merī kamr shiddat se larazne lagī hai. dard-e-zah meṅ mubtalā aurat kī sī ghabrāhaṭ merī antaṛiyoṅ ko maroṛ rahī hai. jo kuchh maiṅ ne sunā hai us se maiṅ taṛap uṭhā hūṅ, aur jo kuchh maiṅ ne dekhā hai, us se maiṅ hawāsbāḳhtā ho gayā hūṅ.

⁴merā dil dhaṛak rahā hai, kapkapī mujh par tārī ho gaī hai. pahle shām kā dhundalkā mujhe pyārā lagtā thā, lekin ab royā ko dekh kar wuh mere lie dahshat kā bāis ban gayā hai.

⁵tāham bābal meṅ log mez lagā kar qālīn bichhā rahe haiṅ. beparwāī se wuh khānā khā rahe aur mai pī rahe haiṅ. ai afsaro, uṭho! apnī ḍhāloṅ par tel lagā kar laṛne ke lie tayyār ho jāo!

⁶rab ne mujhe hukm diyā, “jā kar pahredār khaṛā kar de jo tujhe har nazar āne wālī chīz kī ittilā de.

⁷jūṅ hī do ghoṛoṅ wāle rath yā gadhoṅ aur ūṅṭoṅ par sawār ādmī dikhāī deṅ to ḳhabardār! pahredār pūrī tawajjuh de.”

⁸tab pahredār sherbabar kī tarah pukār uṭhā, “mere āqā, roz-ba-roz maiṅ pūrī wafādārī se apnī burjī par khaṛā rahā hūṅ, aur rātoṅ maiṅ tayyār rah kar yahāṅ pahrādārī kartā āyā hūṅ.

⁹ab wuh dekho! do ghoṛoṅ wālā rath ā rahā hai jis par ādmī sawār hai. ab wuh jawāb meṅ kah rahā hai, ‘bābal gir gayā, wuh gir gayā hai! us ke tamām but chaknāchūr ho kar zamīn par bikhar gae haiṅ’.”

¹⁰ai gāhne kī jagah par kuchlī huī [13] merī qaum! jo kuchh isrāīl ke ḳhudā, rabb-ul-afwāj ne mujhe farmāyā hai use maiṅ ne tumheṅ sunā diyā hai.

¹¹adom ke bāre meṅ rab kā farmān: saīr ke pahāṛī ilāqe se koī mujhe āwāz detā hai, “ai pahredār, subh hone meṅ kitnī der bāqī hai? ai pahredār, subh hone meṅ kitnī der bāqī hai?”

¹²pahredār jawāb detā hai, “subh hone wālī hai, lekin rāt bhī. agar āp mazīd pūchhnā chāheṅ to dubārā ā kar pūchh leṅ.”

¹³mulk-e-arab [14] ke bāre meṅ rab kā farmān: ai dadāniyoṅ ke qāfilo, mulk-e-arab ke jangal meṅ rāt guzāro.

¹⁴ai mulk-e-taimā ke bāshindo, pānī le kar pyāsoṅ se milne jāo! panāhguzīnoṅ ke pās jā kar unheṅ roṭī khilāo!

¹⁵kyūṅki wuh talwār se les dushman se bhāg rahe haiṅ, aise logoṅ se jo talwār thāme aur kamān tāne un se saḳht laṛāī laṛe haiṅ.

¹⁶kyūṅki rab ne mujh se farmāyā, “ek sāl ke andar andar [15] qīdār kī tamām shān-o-shaukat ḳhatm ho jāegī.

¹⁷qīdār ke zabardast tīrandāzoṅ meṅ se thoṛe hī bach pāeṅge.” yih rab, isrāīl ke ḳhudā kā farmān hai.