Read Roman Urdu Geo yasāyāh 22 Bible Online

yasāyāh 22 - Roman Urdu Geo bible

yasāyāh 22

¹royā kī wādī yarūshalam ke bāre meṅ rab kā farmān: kyā huā hai? sab chhatoṅ par kyūṅ chaṛh gae haiṅ?

²har taraf shor-sharābā mach rahā hai, pūrā shahr baġhleṅ bajā rahā hai. yih kaisī bāt hai? tere maqtūl na talwār se, na maidān-e-jang meṅ mare.

³kyūṅki tere tamām līḍar mil kar farār hue aur phir tīr chalāe baġhair pakaṛe gae. bāqī jitne log tujh meṅ the wuh bhī dūr dūr bhāgnā chāhte the, lekin unheṅ bhī qaid kiyā gayā.

⁴is lie maiṅ ne kahā, “apnā muṅh mujh se pher kar mujhe zār zār rone do. mujhe tasallī dene par bazid na raho jabki merī qaum tabāh ho rahī hai.”

⁵kyūṅki qādir-e-mutlaq rabb-ul-afwāj royā kī wādī par haulnāk din lāyā hai. har taraf ghabrāhaṭ, kuchle hue log aur abtarī nazar ātī hai. shahr kī chārdīwārī ṭūṭne lagī hai, pahāṛoṅ meṅ chīḳheṅ gūṅj rahī haiṅ.

⁶ailām ke faujī apne tarkash uṭhā kar rathoṅ, ādmiyoṅ aur ghoṛoṅ ke sāth ā gae haiṅ. qīr ke mard bhī apnī ḍhāleṅ ġhilāf se nikāl kar tujh se laṛne ke lie nikal āe haiṅ.

⁷yarūshalam ke gird-o-nawāh kī behtarīn wādiyāṅ dushman ke rathoṅ se bhar gaī haiṅ, aur us ke ghuṛsawār shahr ke darwāze par hamlā karne ke lie us ke sāmne khaṛe ho gae haiṅ.

⁸jo bhī band-o-bast yahūdāh ne apne tahaffuz ke lie kar liyā thā wuh ḳhatm ho gayā hai. us din tum logoṅ ne kyā kiyā? tum ‘janglaghar’ nāmī silāhḳhāne meṅ jā kar aslāh kā muāinā karne lage.

⁹tum ne un muta'addid darāṛoṅ kā jāizā liyā jo dāūd ke shahr kī fasīl meṅ paṛ gaī thīṅ. use mazbūt karne ke lie tum ne yarūshalam ke makānoṅ ko gin kar un meṅ se kuchh girā die. sāth sāth tum ne nichle tālāb kā pānī jamā kiyā. ūpar ke purāne tālāb se nikalne wālā pānī jamā karne ke lie tum ne andarūnī aur bairūnī fasīl ke darmiyān ek aur tālāb banā liyā. lekin afsos, tum us kī parwā nahīṅ karte jo yih sārā silsilā amal meṅ lāyā. us par tum tawajjuh hī nahīṅ dete jis ne baṛī der pahle ise tashkīl diyā thā.

¹²us waqt qādir-e-mutlaq rabb-ul-afwāj ne hukm diyā ki giryā-o-zārī karo, apne bāloṅ ko munḍwā kar ṭāṭ kā libās pahan lo.

¹³lekin kyā huā? tamām log shādiyānā bajā kar ḳhushī manā rahe haiṅ. har taraf bailoṅ aur bheṛ-bakriyoṅ ko zabah kiyā jā rahā hai. sab gosht aur mai se lutfandoz ho kar kah rahe haiṅ, “āo, ham khāeṅ pieṅ, kyūṅki kal to mar hī jānā hai.”

¹⁴lekin rabb-ul-afwāj ne merī maujūdagī meṅ hī zāhir kiyā hai ki yaqīnan yih qusūr tumhāre marte dam tak muāf nahīṅ kiyā jāegā. [16] yih qādir-e-mutlaq rabb-ul-afwāj kā farmān hai.

¹⁵qādir-e-mutlaq rabb-ul-afwāj farmātā hai, “us nigarān shibnāh ke pās chal jo mahal kā inchārj hai. use paiġhām pahuṅchā de,

¹⁶tū yahāṅ kyā kar rahā hai? kis ne tujhe yahāṅ apne lie maqbarā tarāshne kī ijāzat dī? tū kaun hai ki bulandī par apne lie mazār banwāe, chaṭān meṅ ārāmgāh khudwāe?

¹⁷ai mard, ḳhabardār! rab tujhe zor se dūr dūr tak phaiṅkne wālā hai. wuh tujhe pakaṛ legā

¹⁸aur maroṛ maroṛ kar geṅd kī tarah ek wasī mulk meṅ phaiṅk degā. wahīṅ tū maregā, wahīṅ tere shāndār rath paṛe raheṅge. kyūṅki tū apne mālik ke gharāne ke lie sharm kā bāis banā hai.

¹⁹maiṅ tujhe bartaraf karūṅga, aur tū zabardastī apne uhde aur mansab se fāriġh kar diyā jāegā.

²⁰us din maiṅ apne ḳhādim iliyāqīm bin ḳhilqiyāh ko bulāūṅgā.

²¹maiṅ use terā hī sarkārī libās aur kamarband pahnā kar terā iḳhtiyār use de dūṅgā. us waqt wuh yahūdāh ke gharāne aur yarūshalam ke tamām bāshindoṅ kā bāp banegā.

²²maiṅ us ke kandhe par dāūd ke gharāne kī chābī rakh dūṅgā. jo darwāzā wuh kholegā use koī band nahīṅ kar sakegā, aur jo darwāzā wuh band karegā use koī khol nahīṅ sakegā.

²³wuh khūṅṭī kī mānind hogā jis ko maiṅ zor se ṭhoṅk kar mazbūt dīwār meṅ lagā dūṅgā. us se us ke bāp ke gharāne ko sharāfat kā ūṅchā maqām hāsil hogā.

²⁴lekin phir ābāī gharāne kā pūrā bojh us ke sāth laṭak jāegā. tamām aulād aur rishtedār, tamām chhoṭe bartan pyāloṅ se le kar martabānoṅ tak us ke sāth laṭak jāeṅge.

²⁵rabb-ul-afwāj farmātā hai ki us waqt mazbūt dīwār meṅ lagī yih khūṅṭī nikal jāegī. use toṛā jāegā to wuh gir jāegī, aur us ke sāth laṭkā sārā sāmān ṭūṭ jāegā.” yih rab kā farmān hai.