Read Roman Urdu Geo yasāyāh 23 Bible Online

yasāyāh 23 - Roman Urdu Geo bible

yasāyāh 23

¹sūr ke bāre meṅ allāh kā farmān: e tarsīs ke umdā jahāzo, [17] wāwailā karo! kyūṅki sūr tabāh ho gayā hai, wahāṅ ṭikne kī jagah tak nahīṅ rahī. jazīrā-e-qubrus se wāpas āte waqt unheṅ ittilā dī gaī.

²ai sāhilī ilāqe meṅ basne wālo, āh-o-zārī karo! ai saidā ke tājiro, mātam karo! tere qāsid samundar ko pār karte the,

³wuh gahre pānī par safar karte hue misr [18] kā ġhallā tujh tak pahuṅchāte the, kyūṅki tū hī daryā-e-nīl kī fasal se nafā kamātā thā. yūṅ tū tamām qaumoṅ kā tijāratī markaz banā.

⁴lekin ab sharmsār ho, ai saidā, kyūṅki samundar kā qilāband shahr sūr kahtā hai, “hāy, sab kuchh tabāh ho gayā hai. ab aisā lagtā hai ki maiṅ ne na kabhī dard-e-zah meṅ mubtalā ho kar bachche janm die, na kabhī beṭe-beṭiyāṅ pāle.”

⁵jab yih ḳhabar misr tak pahuṅchegī to wahāṅ ke bāshinde taṛap uṭheṅge.

⁶chunāṅche samundar ko pār karke tarsīs tak pahuṅcho! ai sāhilī ilāqe ke bāshindo, giryā-o-zārī karo!

⁷kyā yih wāqaī tumhārā wuh shahr hai jis kī rangraliyāṅ mashhūr thīṅ, wuh qadīm shahr jis ke pāoṅ use dūrdarāz ilāqoṅ tak le gae tāki wahāṅ naī ābādiyāṅ qāim kare?

⁸kis ne sūr ke ḳhilāf yih mansūbā bāndhā? yih shahr to pahle bādshāhoṅ ko taḳht par biṭhāyā kartā thā, aur us ke saudāgar raīs the, us ke tājir duniyā ke shurafā meṅ gine jāte the.

⁹rabb-ul-afwāj ne yih mansūbā bāndhā tāki tamām shān-o-shaukat kā ghamanḍ past aur duniyā ke tamām uhdedār zer ho jāeṅ.

¹⁰ai tarsīs beṭī, ab se apnī zamīn kī khetībāṛī kar, un kisānoṅ kī tarah kāshtkārī kar jo daryā-e-nīl ke kināre apnī fasleṅ lagāte haiṅ, kyūṅki terī bandargāh jātī rahī hai.

¹¹rab ne apne hāth ko samundar ke ūpar uṭhā kar mamālik ko hilā diyā. us ne hukm diyā hai ki kan'ān [19] ke qile barbād ho jāeṅ.

¹²us ne farmāyā, “ai saidā beṭī, ab se terī rangraliyāṅ band raheṅgī. ai kuṅwārī jis kī ismatdarī huī hai, uṭh aur samundar ko pār karke qubrus meṅ panāh le. lekin wahāṅ bhī tū ārām nahīṅ kar pāegī.”

¹³mulk-e-bābal par nazar ḍālo. yih qaum to nest-o-nābūd ho gaī, us kā mulk janglī jānwaroṅ kā ghar ban gayā hai. asūriyoṅ ne burj banā kar use gher liyā aur us ke qiloṅ ko ḍhā diyā. malbe kā ḍher hī rah gayā hai.

¹⁴ai tarsīs ke umdā jahāzo, hāy hāy karo, kyūṅki tumhārā qilā tabāh ho gayā hai!

¹⁵tab sūr insān kī yād se utar jāegā. lekin 70 sāl yānī ek bādshāh kī muddat-ul-umr ke bād sūr us tarah bahāl ho jāegā jis tarah gīt meṅ kasbī ke bāre meṅ gāyā jātā hai,

¹⁶“ai farāmosh kasbī, chal! apnā sarod pakaṛ kar galiyoṅ meṅ phir! sarod ko ḳhūb bajā, kaī ek gīt gā tāki log tujhe yād kareṅ.”

¹⁷kyūṅki 70 sāl ke bād rab sūr ko bahāl karegā. kasbī dubārā paise kamāegī, duniyā ke tamām mamālik us ke gāhak baneṅge.

¹⁸lekin jo paise wuh kamāegī wuh rab ke lie maḳhsūs hoṅge. wuh zaḳhīrā karne ke lie jamā nahīṅ hoṅge balki rab ke huzūr ṭhaharne wāloṅ ko die jāeṅge tāki jī bhar kar khā sakeṅ aur shāndār kapṛe pahan sakeṅ.