Read Roman Urdu Geo yasāyāh 24 Bible Online

yasāyāh 24 - Roman Urdu Geo bible

yasāyāh 24

¹dekho, rab duniyā ko wīrān-o-sunsān kar degā, rū-e-zamīn ko ulaṭ-palaṭ karke us ke bāshindoṅ ko muntashir kar degā.

²kisī ko bhī chhoṛā nahīṅ jāegā, ḳhwāh imām ho yā ām shaḳhs, mālik yā naukar, mālikan yā naukarānī, bechne wālā yā ḳharīdār, udhār lene yā dene wālā, qarzdār yā qarzḳhwāh.

³zamīn mukammal taur par ujaṛ jāegī, use sarāsar lūṭā jāegā. rab hī ne yih sab kuchh farmāyā hai.

⁴zamīn sūkh sūkh kar sukaṛ jāegī, duniyā ḳhushk ho kar murjhā jāegī. us ke baṛe baṛe log bhī niḍhāl ho jāeṅge.

⁵zamīn ke apne bāshindoṅ ne us kī behurmatī kī hai, kyūṅki wuh sharīat ke tābe na rahe balki us ke ahkām ko tabdīl karke allāh ke sāth kā abadī ahd toṛ diyā hai.

⁶isī lie zamīn lānat kā luqmā ban gaī hai, us par basne wāle apnī sazā bhugat rahe haiṅ. isī lie duniyā ke bāshinde bhasm ho rahe haiṅ aur kam hī bāqī rah gae haiṅ.

⁷angūr kā tāzā ras sūkh kar ḳhatm ho rahā, angūr kī beleṅ murjhā rahī haiṅ. jo pahle ḳhushbāsh the wuh āheṅ bharne lage haiṅ.

⁸dafoṅ kī ḳhushkun āwāzeṅ band, rangraliyāṅ manāne wāloṅ kā shor band, sarodoṅ ke surīle naġhme band ho gae haiṅ.

⁹ab log gīt gā gā kar mai nahīṅ pīte balki sharāb unheṅ kaṛwī hī lagtī hai.

¹⁰wīrān-o-sunsān shahr tabāh ho gayā hai, har ghar ke darwāze par kunḍī lagī hai tāki andar ghusne wāloṅ se mahfūz rahe.

¹¹galiyoṅ meṅ log giryā-o-zārī kar rahe haiṅ ki mai ḳhatm hai. har ḳhushī dūr ho gaī hai, har shādmānī zamīn se ġhāib hai.

¹²shahr meṅ malbe ke ḍher hī rah gae haiṅ, us ke darwāze ṭukṛe ṭukṛe ho gae haiṅ.

¹³kyūṅki mulk ke darmiyān aur aqwām ke bīch meṅ yihī sūrat-e-hāl hogī ki chand ek hī bach pāeṅge, bilkul un do chār zaitūnoṅ kī mānind jo daraḳht ko jhāṛne ke bāwujūd us par rah jāte haiṅ, yā un do chār angūroṅ kī tarah jo fasal chunane ke bāwujūd beloṅ par lage rahte haiṅ.

¹⁴lekin yih chand ek hī pukār kar ḳhushī ke nāre lagāeṅge. maġhrib se wuh rab kī azmat kī satāish kareṅge.

¹⁵chunāṅche mashriq meṅ rab ko jalāl do, jazīroṅ meṅ isrāīl ke ḳhudā ke nām kī tāzīm karo.

¹⁶hameṅ duniyā kī intihā se gīt sunāī de rahe haiṅ, “rāst ḳhudā kī tārīf ho!” lekin maiṅ bol uṭhā, “hāy, maiṅ ghul ghul kar mar rahā hūṅ, maiṅ ghul ghul kar mar rahā hūṅ! mujh par afsos, kyūṅki bewafā apnī bewafāī dikhā rahe haiṅ, bewafā khule taur par apnī bewafāī dikhā rahe haiṅ!”

¹⁷ai duniyā ke bāshindo, tum dahshatnāk musībat, gaṛhoṅ aur phandoṅ meṅ phaṅs jāoge.

¹⁸tab jo haulnāk āwāzoṅ se bhāg kar bach jāe wuh gaṛhe meṅ gir jāegā, aur jo gaṛhe se nikal jāe wuh phande meṅ phaṅs jāegā. kyūṅki āsmān ke darīche khul rahe aur zamīn kī bunyādeṅ hil rahī haiṅ.

¹⁹zamīn kaṛak se phaṭ rahī hai. wuh ḍagmagā rahī, jhūm rahī,

²⁰nashe meṅ āe sharābī kī tarah laṛkhaṛā rahī aur kachchī jhoṅpṛī kī tarah jhūl rahī hai. āḳhirkār wuh apnī bewafāī ke bojh tale itne dhaṛām se giregī ki āindā kabhī nahīṅ uṭhne kī.

²¹us din rab āsmān ke lashkar aur zamīn ke bādshāhoṅ se jawāb talab karegā.

²²tab wuh giriftār ho kar gaṛhe meṅ jamā hoṅge, unheṅ qaidḳhāne meṅ ḍāl kar muta'addid dinoṅ ke bād sazā milegī.

²³us waqt chāṅd nādim hogā aur sūraj sharm khāegā, kyūṅki rabb-ul-afwāj koh-e-siyyūn par taḳhtnashīn hogā. wahāṅ yarūshalam meṅ wuh baṛī shān-o-shaukat ke sāth apne buzurgoṅ ke sāmne hukūmat karegā.