Read Roman Urdu Geo yasāyāh 25 Bible Online

yasāyāh 25 - Roman Urdu Geo bible

yasāyāh 25

¹ai rab, tū merā ḳhudā hai, maiṅ terī tāzīm aur tere nām kī tārīf karūṅga. kyūṅki tū ne baṛī wafādārī se anokhā kām karke qadīm zamāne meṅ bandhe hue mansūboṅ ko pūrā kiyā hai.

²tū ne shahr ko malbe kā ḍher banā kar hamloṅ se mahfūz ābādī ko khanḍarāt meṅ tabdīl kar diyā. ġhairmulkiyoṅ kā qilāband mahal yūṅ ḳhāk meṅ milāyā gayā ki āindā kabhī shahr nahīṅ kahlāegā, kabhī az sar-e-nau tāmīr nahīṅ hogā.

³yih dekh kar ek zor-āwar qaum terī tāzīm karegī, zabardast aqwām ke shahr terā ḳhauf māneṅge.

⁴kyūṅki tū pasthāloṅ ke lie qilā aur musībatzadā ġharīboṅ ke lie panāhgāh sābit huā hai. terī āṛ meṅ insān tūfān aur garmī kī shiddat se mahfūz rahtā hai. go zabardastoṅ kī phūṅkeṅ bārish kī bauchhāṛ

⁵yā registān meṅ tapish jaisī kyūṅ na hoṅ, tāham tū ġhairmulkiyoṅ kī garaj ko rok detā hai. jis tarah bādal ke sāy se jhulastī garmī jātī rahtī hai, usī tarah zabardastoṅ kī sheḳhī ko tū band kar detā hai.

⁶yihīṅ koh-e-siyyūn par rabb-ul-afwāj tamām aqwām kī zabardast ziyāfat karegā. behtarīn qism kī qadīm aur sāf-shaffāf mai pī jāegī, umdā aur lazīztarīn khānā khāyā jāegā.

⁷isī pahāṛ par wuh tamām ummatoṅ par kā niqāb utāregā aur tamām aqwām par kā pardā haṭā degā.

⁸maut ilāhī fath kā luqmā ho kar abad tak nest-o-nābūd rahegī. tab rab qādir-e-mutlaq har chehre ke āṅsū poṅchh kar tamām duniyā meṅ se apnī qaum kī ruswāī dūr karegā. rab hī ne yih sab kuchh farmāyā hai.

⁹us din log kaheṅge, “yihī hamārā ḳhudā hai jis kī najāt ke intizār meṅ ham rahe. yihī hai rab jis se ham ummīd rakhte rahe. āo, ham shādiyānā bajā kar us kī najāt kī ḳhushī manāeṅ.”

¹⁰rab kā hāth is pahāṛ par ṭhahrā rahegā. lekin moāb ko wuh yūṅ raundegā jis tarah bhūsā gobar meṅ milāne ke lie raundā jātā hai.

¹¹aur go moāb hāth phailā kar us meṅ tairne kī koshish kare to bhī rab us kā ġhurūr gobar meṅ dabāe rakhegā, chāhe wuh kitnī mahārat se hāth-pāoṅ mārne kī koshish kyūṅ na kare.

¹²ai moāb, wuh terī buland aur qilāband dīwāroṅ ko girāegā, unheṅ ḍhā kar ḳhāk meṅ milāegā.