Read Roman Urdu Geo yasāyāh 26 Bible Online

yasāyāh 26 - Roman Urdu Geo bible

yasāyāh 26

¹us din mulk-e-yahūdāh meṅ gīt gāyā jāegā, “hamārā shahr mazbūt hai, kyūṅki ham allāh kī najāt dene wālī chārdīwārī aur pushtoṅ se ghire hue haiṅ.

²shahr ke darwāzoṅ ko kholo tāki rāst qaum dāḳhil ho, wuh qaum jo wafādār rahī hai.

³ai rab, jis kā irādā mazbūt hai use tū mahfūz rakhtā hai. use pūrī salāmatī hāsil hai, kyūṅki wuh tujh par bharosā rakhtā hai.

⁴rab par abad tak etimād rakho! kyūṅki rab ḳhudā abadī chaṭān hai.

⁵wuh bulandiyoṅ par rahne wāloṅ ko zer aur ūṅche shahr ko nīchā karke ḳhāk meṅ milā detā hai.

⁶zarūratmand aur pasthāl use pāoṅ tale kuchal dete haiṅ.”

⁷ai allāh, rāstbāz kī rāh hamwār hai, kyūṅki tū us kā rāstā chalne ke qābil banā detā hai.

⁸ai rab, ham tere intizār meṅ rahte haiṅ, us waqt bhī jab tū hamārī adālat kartā hai. ham tere nām aur terī tamjīd ke ārzūmand rahte haiṅ.

⁹rāt ke waqt merī rūh tere lie taṛaptī, merā dil terā tālib rahtā hai. kyūṅki duniyā ke bāshinde us waqt insāf kā matlab sīkhte haiṅ jab tū duniyā kī adālat kartā hai.

¹⁰afsos, jab bedīn par rahm kiyā jātā hai to wuh insāf kā matlab nahīṅ sīkhtā balki insāf ke mulk meṅ bhī ġhalat kām karne se bāz nahīṅ rahtā, wahāṅ bhī rab kī azmat kā lihāz nahīṅ kartā.

¹¹ai rab, go terā hāth unheṅ mārne ke lie uṭhā huā hai to bhī wuh dhyān nahīṅ dete. lekin ek din un kī āṅkheṅ khul jāeṅgī, aur wuh terī apnī qaum ke lie ġhairat ko dekh kar sharmindā ho jāeṅge. tab tū apnī bhasm karne wālī āg un par nāzil karegā.

¹²ai rab, tū hameṅ amn-o-amān muhayyā kartā hai balki hamārī tamām kāmyābiyāṅ tere hī hāth se hāsil huī haiṅ.

¹³ai rab hamāre ḳhudā, go tere siwā dīgar mālik ham par hukūmat karte āe haiṅ to bhī ham tere hī fazl se tere nām ko yād kar pāe.

¹⁴ab yih log mar gae haiṅ aur āindā kabhī zindā nahīṅ hoṅge, un kī rūh kūch kar gaī haiṅ aur āindā kabhī wāpas nahīṅ āeṅgī. kyūṅki tū ne unheṅ sazā de kar halāk kar diyā, un kā nām-o-nishān miṭā ḍālā hai.

¹⁵ai rab, tū ne apnī qaum ko faroġh diyā hai. tū ne apnī qaum ko baṛā banā kar apne jalāl kā izhār kiyā hai. tere hāth se us kī sarhaddeṅ chāroṅ taraf baṛh gaī haiṅ.

¹⁶ai rab, wuh musībat meṅ phaṅs kar tujhe talāsh karne lage, terī tādīb ke bāis mantar phūṅkne lage.

¹⁷ai rab, tere huzūr ham dard-e-zah meṅ mubtalā aurat kī tarah taṛapte aur chīḳhte chillāte rahe.

¹⁸janane kā dard mahsūs karke ham pech-o-tāb khā rahe the. lekin afsos, hawā hī paidā huī. na ham ne mulk ko najāt dī, na duniyā ke nae bāshinde paidā hue.

¹⁹lekin tere murde dubārā zindā hoṅge, un kī lāsheṅ ek din jī uṭheṅgī. ai ḳhāk meṅ basne wālo, jāg uṭho aur ḳhushī ke nāre lagāo! kyūṅki terī os nūroṅ kī shabnam hai, aur zamīn murdā rūhoṅ ko janm degī.

²⁰ai merī qaum, jā aur thoṛī der ke lie apne kamroṅ meṅ chhup kar kunḍī lagā le. jab tak rab kā ġhazab ṭhanḍā na ho wahāṅ ṭhahrī rah.

²¹kyūṅki dekh, rab apnī sukūnatgāh se nikalne ko hai tāki duniyā ke bāshindoṅ ko sazā de. tab zamīn apne āp par bahāyā huā ḳhūn fāsh karegī aur apne maqtūloṅ ko mazīd chhupāe nahīṅ rakhegī.