Read Roman Urdu Geo yasāyāh 27 Bible Online

yasāyāh 27 - Roman Urdu Geo bible

yasāyāh 27

¹us din rab us bhāgne aur pech-o-tāb khāne wāle sāṅp ko sazā degā jo liwiyātān kahlātā hai. apnī saḳht, azīm aur tāqatwar talwār se wuh samundar ke azhdahe ko mār ḍālegā.

²us din kahā jāegā, “angūr kā kitnā ḳhūbsūrat bāġh hai! us kī tārīf meṅ gīt gāo!

³maiṅ, rab ḳhud hī use saṅbhāltā, use musalsal pānī detā rahtā hūṅ. din rāt maiṅ us kī pahrādārī kartā hūṅ tāki koī use nuqsān na pahuṅchāe.

⁴ab merā ġhussā ṭhanḍā ho gayā hai. lekin agar bāġh meṅ ūṅṭkaṭāre aur ḳhārdār jhāṛiyāṅ mil jāeṅ to maiṅ un se nipaṭ lūṅgā, maiṅ un se jang karke sab ko jalā dūṅgā.

⁵lekin agar wuh mān jāeṅ to mere pās ā kar panāh leṅ. wuh mere sāth sulah kareṅ, hāṅ mere sāth sulah kareṅ.”

⁶ek waqt āegā ki yāqūb jaṛ pakaṛegā. isrāīl ko phūl lag jāeṅge, us kī koṅpleṅ nikleṅgī aur duniyā us ke phal se bhar jāegī.

⁷kyā rab ne apnī qaum ko yūṅ mārā jis tarah us ne isrāīl ko mārne wāloṅ ko mārā hai? hargiz nahīṅ! yā kyā isrāīl ko yūṅ qatl kiyā gayā jis tarah us ke qātiloṅ ko qatl kiyā gayā hai?

⁸nahīṅ, balki tū ne use ḍarā kar aur bhagā kar us se jawāb talab kiyā, tū ne us ke ḳhilāf mashriq se tez āṅdhī bhej kar use apne huzūr se nikāl diyā.

⁹is tarah yāqūb ke qusūr kā kaffārā diyā jāegā. aur jab isrāīl kā gunāh dūr ho jāegā to natīje meṅ wuh tamām ġhalat qurbāngāhoṅ ko chūne ke pattharoṅ kī tarah chaknāchūr karegā. na yasīrat dewī ke khambe, na baḳhūr jalāne kī ġhalat qurbāngāheṅ khaṛī raheṅgī.

¹⁰kyūṅki qilāband shahr tanhā rah gayā hai. logoṅ ne use wīrān chhoṛ kar registān kī tarah tark kar diyā hai. ab se us meṅ bachhṛe hī chareṅge. wuhī us kī galiyoṅ meṅ ārām karke us kī ṭahniyoṅ ko chabā leṅge.

¹¹tab us kī shāḳheṅ sūkh jāeṅgī aur aurateṅ unheṅ toṛ toṛ kar jalāeṅgī. kyūṅki yih qaum samajh se ḳhālī hai, lihāzā us kā ḳhāliq us par tars nahīṅ khāegā, jis ne use tashkīl diyā wuh us par mehrbānī nahīṅ karegā.

¹²us din tum isrāīlī ġhallā jaise hoge, aur rab tumhārī bāliyoṅ ko daryā-e-furāt se le kar misr kī shimālī sarhad par wāqe wādī-e-misr tak kāṭegā. phir wuh tumheṅ gāh kar dānā-ba-dānā tamām ġhallā ikaṭṭhā karegā.

¹³us din narsingā buland āwāz se bajegā. tab asūr meṅ tabāh hone wāle aur misr meṅ bhagāe hue log wāpas ā kar yarūshalam ke muqaddas pahāṛ par rab ko sijdā kareṅge.