Read Roman Urdu Geo yasāyāh 28 Bible Online

yasāyāh 28 - Roman Urdu Geo bible

yasāyāh 28

¹sāmariyya par afsos jo isrāīlī sharābiyoṅ kā shāndār tāj hai. us shahr par afsos jo isrāīl kī shān-o-shaukat thā lekin ab murjhāne wālā phūl hai. us ābādī par afsos jo nashe meṅ dhut logoṅ kī zarḳhez wādī ke ūpar taḳhtnashīn hai.

²dekho, rab ek zabardast sūrmā bhejegā jo oloṅ ke tūfān, tabāhkun āṅdhī aur sailāb paidā karne wālī mūslādhār bārish kī tarah sāmariyya par ṭūṭ paṛegā aur zor se use zamīn par paṭaḳh degā.

³tab isrāīlī sharābiyoṅ kā shāndār tāj sāmariyya pāoṅ tale raundā jāegā.

⁴tab yih murjhāne wālā phūl jo zarḳhez wādī ke ūpar taḳhtnashīn hai aur us kī shān-o-shaukat ḳhatm ho jāegī. us kā hāl fasal se pahle pakne wāle anjīr jaisā hogā. kyūṅki jūṅ hī koī use dekhe wuh use toṛ kar haṛap kar legā.

⁵us din rabb-ul-afwāj ḳhud isrāīl kā shāndār tāj hogā, wuh apnī qaum ke bache huoṅ kā jalālī sehrā hogā.

⁶wuh adālat karne wāle ko insāf kī rūh dilāegā aur shahr ke darwāze par dushman ko pīchhe dhakelne wāloṅ ke lie tāqat kā bāis hogā.

⁷lekin yih log bhī mai ke asar se ḍagmagā rahe aur sharāb pī pī kar laṛkhaṛā rahe haiṅ. imām aur nabī nashe meṅ jhūm rahe haiṅ. mai pīne se un ke dimāġhoṅ meṅ ḳhalal ā gayā hai, sharāb pī pī kar wuh chakkar khā rahe haiṅ. royā deḳhte waqt wuh jhūmte, faisle karte waqt jhūlte haiṅ.

⁸tamām mezeṅ un kī qai se gandī haiṅ, un kī ġhilāzat har taraf nazar ātī hai.

⁹wuh āpas meṅ kahte haiṅ, “yih shaḳhs hamāre sāth is qism kī bāteṅ kyūṅ kartā hai? hameṅ tālīm dete aur ilāhī paiġhām kā matlab sunāte waqt wuh hameṅ yūṅ samjhātā hai goyā ham chhoṭe bachche hoṅ jin kā dūdh abhī abhī chhuṛāyā gayā ho.

¹⁰kyūṅki yih kahtā hai, ‘saw lāsaw saw lāsaw, qaw lāqaw qaw lāqaw, thoṛā sā is taraf thoṛā sā us taraf’.”

¹¹chunāṅche ab allāh haklāte hue hoṅṭoṅ aur ġhairzabānoṅ kī mārifat is qaum se bāt karegā.

¹²go us ne un se farmāyā thā, “yih ārām kī jagah hai. thakemāndoṅ ko ārām do, kyūṅki yihīṅ wuh sukūn pāeṅge.” lekin wuh sunane ke lie tayyār nahīṅ the.

¹³is lie āindā rab un se in hī alfāz se hamkalām hogā, “saw lāsaw saw lāsaw, qaw lāqaw kaw lāqaw, thoṛā sā is taraf, thoṛā sā us taraf.” kyūṅki lāzim hai ki wuh chal kar ṭhokar khāeṅ, aur dhaṛām se apnī pusht par gir jāeṅ, ki wuh zaḳhmī ho jāeṅ aur phande meṅ phaṅs kar giriftār ho jāeṅ.

¹⁴chunāṅche ab rab kā kalām sun lo, ai mazāq uṛāne wālo, jo yarūshalam meṅ basne wālī is qaum par hukūmat karte ho.

¹⁵tum sheḳhī mār kar kahte ho, “ham ne maut se ahd bāndhā aur pātāl se muāhadā kiyā hai. is lie jab sazā kā sailāb ham par se guzare to hameṅ nuqsān nahīṅ pahuṅchāegā. kyūṅki ham ne jhūṭ meṅ panāh lī aur dhoke meṅ chhup gae haiṅ.”

¹⁶is ke jawāb meṅ rab qādir-e-mutlaq farmātā hai, “dekho, maiṅ siyyūn meṅ ek patthar rakh detā hūṅ, kone kā ek āzmūdā aur qīmtī patthar jo mazbūt bunyād par lagā hai. jo īmān lāegā wuh kabhī nahīṅ hilegā.

¹⁷insāf merā fītā aur rāstī merī sāhūl kī ḍorī hogī. in se maiṅ sab kuchh parkhūṅgā. ole us jhūṭ kā safāyā kareṅge jis meṅ tum ne panāh lī hai, aur sailāb tumhārī chhupne kī jagah uṛā kar apne sāth bahā le jāegā.

¹⁸tab tumhārā maut ke sāth ahd mansūḳh ho jāegā, aur tumhārā pātāl ke sāth muāhadā qāim nahīṅ rahegā. sazā kā sailāb tum par se guzar kar tumheṅ pāmāl karegā.

¹⁹wuh subh-ba-subh aur din rāt guzaregā, aur jab bhī guzaregā to tumheṅ apne sāth bahā le jāegā. us waqt log dahshatzadā ho kar kalām kā matlab samjheṅge.”

²⁰chārpāī itnī chhoṭī hogī ki tum pāoṅ phailā kar so nahīṅ sakoge. bistar kī chauṛāī itnī kam hogī ki tum use lapeṭ kar ārām nahīṅ kar sakoge.

²¹kyūṅki rab uṭh kar yūṅ tum par jhapaṭ paṛegā jis tarah parāzīm pahāṛ ke pās filistiyoṅ par jhapaṭ paṛā. jis tarah wādī-e-jibaūn meṅ amoriyoṅ par ṭūṭ paṛā usī tarah wuh tum par ṭūṭ paṛegā. aur jo kām wuh karegā wuh ajīb hogā, jo qadam wuh uṭhāegā wuh māmūl se haṭ kar hogā.

²²chunāṅche apnī tānāzanī se bāz āo, warnā tumhārī zanjīreṅ mazīd zor se kas dī jāeṅgī. kyūṅki mujhe qādir-e-mutlaq rabb-ul-afwāj se paiġhām milā hai ki tamām duniyā kī tabāhī muta'ayyin hai.

²³ġhaur se merī bāt suno! dhyān se us par kān dharo jo maiṅ kah rahā hūṅ!

²⁴jab kisān khet ko bīj bone ke lie tayyār kartā hai to kyā wuh pūrā din hal chalātā rahtā hai? kyā wuh apnā pūrā waqt zamīn khodne aur ḍhele toṛne meṅ sarf kartā hai?

²⁵hargiz nahīṅ! jab pūre khet kī satah hamwār aur tayyār hai to wuh apnī apnī jagah par siyāh zīrā aur safed zīrā, gandum, bājrā aur jo kā bīj botā hai. āḳhir meṅ wuh kināre par chāre kā bīj botā hai.

²⁶kisān ko ḳhūb mālūm hai ki kyā kyā karnā hotā hai, kyūṅki us ke ḳhudā ne use tālīm de kar sahīh tarīqā sikhāyā.

²⁷chunāṅche siyāh zīrā aur safed zīrā ko anāj kī tarah gāhā nahīṅ jātā. dāne nikālne ke lie un par waznī chīz nahīṅ chalāī jātī balki unheṅ ḍanḍe se mārā jātā hai.

²⁸aur kyā anāj ko gāh gāh kar pīsā jātā hai? hargiz nahīṅ! kisān use had se zyādā nahīṅ gāhtā. go us ke ghoṛe koī waznī chīz khaiṅchte hue bāliyoṅ par se guzarte haiṅ tāki dāne nikleṅ tāham kisān dhyān detā hai ki dāne pis na jāeṅ.

²⁹use yih ilm bhī rabb-ul-afwāj se milā hai jo zabardast mashwaroṅ aur kāmil hikmat kā mambā hai.