Read Roman Urdu Geo yasāyāh 29 Bible Online

yasāyāh 29 - Roman Urdu Geo bible

yasāyāh 29

¹ai arī'el, arī'el, [20] tujh par afsos! ai shahr jis meṅ dāūd ḳhaimāzan thā, tujh par afsos! chalo, sāl-ba-sāl apne tahwār manāte raho.

²lekin maiṅ arī'el ko yūṅ gher kar tang karūṅga ki us meṅ āh-o-zārī sunāī degī. tab yarūshalam mere nazdīk sahīh mānoṅ meṅ arī'el sābit hogā.

³kyūṅki maiṅ tujhe har taraf se pushtābandī se gher kar band rakhūṅgā, tere muhāsare kā pūrā band-o-bast karūṅga.

⁴tab tū itnā past hogā ki ḳhāk meṅ se bolegā, terī dabī dabī āwāz gard meṅ se niklegī. jis tarah murdā rūh zamīn ke andar se sargoshī kartī hai usī tarah terī dhīmī dhīmī āwāz zamīn meṅ se niklegī.

⁵lekin achānak tere muta'addid dushman bārīk dhūl kī tarah uṛ jāeṅge, zālimoṅ kā ġhol hawā meṅ bhūse kī tarah titar-bitar ho jāegā. kyūṅki achānak, ek hī lamhe meṅ

⁶rabb-ul-afwāj un par ṭūṭ paṛegā. wuh bijlī kī kaṛaktī āwāzeṅ, zalzalā, baṛā shor, tez āṅdhī, tūfān aur bhasm karne wālī āg ke shole apne sāth le kar shahr kī madad karne āegā.

⁷tab arī'el se laṛne wālī tamām qaumoṅ ke ġhol ḳhwāb jaise lageṅge. jo yarūshalam par hamlā karke us kā muhāsarā kar rahe aur use tang kar rahe the wuh rāt meṅ royā jaise ġhairhaqīqī lageṅge.

⁸tumhāre dushman us bhūke ādmī kī mānind hoṅge jo ḳhwāb meṅ deḳhtā hai ki maiṅ khānā khā rahā hūṅ, lekin phir jāg kar jān letā hai ki maiṅ waise kā waisā bhūkā hūṅ. tumhāre muḳhālif us pyāse ādmī kī mānind hoṅge jo ḳhwāb meṅ deḳhtā hai ki maiṅ pānī pī rahā hūṅ, lekin phir jāg kar jān letā hai ki maiṅ waise kā waisā niḍhāl aur pyāsā hūṅ. yihī un tamām bain-ul-aqwāmī ġholoṅ kā hāl hogā jo koh-e-siyyūn se jang kareṅge.

⁹hairatzadā ho kar hakkā-bakkā rah jāo! andhe ho kar nābīnā ho jāo! matwāle ho jāo, lekin mai se nahīṅ. laṛkhaṛāte jāo, lekin sharāb se nahīṅ.

¹⁰kyūṅki rab ne tumheṅ gahrī nīnd sulā diyā hai, us ne tumhārī āṅkhoṅ yānī nabiyoṅ ko band kiyā aur tumhāre saroṅ yānī royā deḳhne wāloṅ par pardā ḍāl diyā hai.

¹¹is lie jo bhī kalām nāzil huā hai wuh tumhāre lie sar-ba-muhr kitāb hī hai. agar use kisī paṛhe-likhe ādmī ko diyā jāe tāki paṛhe to wuh jawāb degā, “yih paṛhā nahīṅ jā saktā, kyūṅki is par muhr hai.”

¹²aur agar use kisī anpaṛh ādmī ko diyā jāe to wuh kahegā, “maiṅ anpaṛh hūṅ.”

¹³rab farmātā hai, “yih qaum mere huzūr ā kar apnī zabān aur hoṅṭoṅ se to merā ehtirām kartī hai, lekin us kā dil mujh se dūr hai. un kī ḳhudātarsī sirf insān hī ke raṭe-raṭāe ahkām par mabnī hai.

¹⁴is lie āindā bhī merā is qaum ke sāth sulūk hairatangez hogā. hāṅ, merā sulūk ajīb-o-ġharīb hogā. tab us ke dānishmandoṅ kī dānish jātī rahegī, aur us ke samajhdāroṅ kī samajh ġhāib ho jāegī.”

¹⁵un par afsos jo apnā mansūbā zamīn kī gahrāiyoṅ meṅ dabā kar rab se chhupāne kī koshish karte haiṅ, jo tārīkī meṅ apne kām karke kahte haiṅ, “kaun hameṅ dekh legā, kaun hameṅ pahchān legā?”

¹⁶tumhārī kajrawī par lānat! kyā kumhār ko us ke gāre ke barābar samjhā jātā hai? kyā banī huī chīz banāne wāle ke bāre meṅ kahtī hai, “us ne mujhe nahīṅ banāyā”? yā kyā jis ko tashkīl diyā gayā hai wuh tashkīl dene wāle ke bāre meṅ kahtā hai, “wuh kuchh nahīṅ samajhtā”? hargiz nahīṅ!

¹⁷thoṛī hī der ke bād lubnān kā jangal phalte phūlte bāġh meṅ tabdīl hogā jabki phaltā phūltā bāġh jangal sā lagegā.

¹⁸us din bahre kitāb kī tilāwat suneṅge, aur andhoṅ kī āṅkheṅ andhere aur tārīkī meṅ se nikal kar dekh sakeṅgī.

¹⁹ek bār phir farotan rab kī ḳhushī manāeṅge, aur muhtāj isrāīl ke quddūs ke bāis shādiyānā bajāeṅge.

²⁰zālim kā nām-o-nishān nahīṅ rahegā, tānāzan ḳhatm ho jāeṅge, aur dūsroṅ kī tāk meṅ baiṭhne wāle sab ke sab rū-e-zamīn par se miṭ jāeṅge.

²¹yihī un kā anjām hogā jo adālat meṅ dūsroṅ ko qusūrwār ṭhahrāte, shahr ke darwāze meṅ adālat karne wāle qāzī ko phaṅsāne kī koshish karte aur jhūṭī gawāhiyoṅ se bequsūr kā haq mārte haiṅ.

²²chunāṅche rab jis ne pahle ibrāhīm kā bhī fidyā de kar use chhuṛāyā thā yāqūb ke gharāne se farmātā hai, “ab se yāqūb sharmindā nahīṅ hogā, ab se isrāīliyoṅ kā rang faq nahīṅ paṛ jāegā.

²³jab wuh apne darmiyān apne bachchoṅ ko jo mere hāthoṅ kā kām haiṅ dekheṅge to wuh mere nām ko muqaddas māneṅge. wuh yāqūb ke quddūs ko muqaddas jāneṅge aur isrāīl ke ḳhudā kā ḳhauf māneṅge.

²⁴us waqt jin kī rūh āwārā hai wuh samajh hāsil kareṅge, aur buṛbuṛāne wāle tālīm qabūl kareṅge.”