Read Roman Urdu Geo yasāyāh 30 Bible Online

yasāyāh 30 - Roman Urdu Geo bible

yasāyāh 30

¹rab farmātā hai, “ai ziddī bachcho, tum par afsos! kyūṅki tum mere baġhair mansūbe bāndhte aur mere rūh ke baġhair muāhade kar lete ho. gunāhoṅ meṅ izāfā karte karte

²tum ne mujh se mashwarā lie baġhair misr kī taraf rujū kiyā tāki fir'aun kī āṛ meṅ panāh lo aur misr ke sāy meṅ hifāzat pāo.

³lekin ḳhabardār! fir'aun kā tahaffuz tumhāre lie sharm kā bāis banegā, misr ke sāy meṅ panāh lene se tumhārī ruswāī ho jāegī.

⁴kyūṅki go us ke afsar zuan meṅ haiṅ aur us ke elchī hanīs tak pahuṅch gae haiṅ

⁵to bhī sab is qaum se sharmindā ho jāeṅge, kyūṅki is ke sāth muāhadā bekār hogā. is se na madad aur na fāidā hāsil hogā balki yih sharm aur ḳhajālat kā bāis hī hogī.”

⁶dasht-e-najab ke jānwaroṅ ke bāre meṅ rab kā farmān: yahūdāh ke safīr ek taqlīfdih aur pareshānkun mulk meṅ se guzar rahe haiṅ jis meṅ sherbabar, shernī, zahrīle aur uṛansāṅp baste haiṅ. un ke gadhe aur ūṅṭ yahūdāh kī daulat aur ḳhazānoṅ se lade hue haiṅ, aur wuh sab kuchh misr ke pās pahuṅchā rahe haiṅ, go is qaum kā koī fāidā nahīṅ.

⁷misr kī madad fuzūl hī hai! is lie maiṅ ne misr kā nām ‘rahab azhdahā jis kā muṅh band kar diyā gayā hai’ rakhā hai.

⁸ab dūsroṅ ke pās jā kar sab kuchh taḳhte par likh. use kitāb kī sūrat meṅ qalamband kar tāki mere alfāz āne wāle dinoṅ meṅ hameshā tak gawāhī deṅ.

⁹kyūṅki yih qaum sarkash hai, yih log dhokebāz bachche haiṅ jo rab kī hidāyāt ko mānane ke lie tayyār hī nahīṅ.

¹⁰ġhaibbīnoṅ ko wuh kahte haiṅ, “royā se bāz āo.” aur royā deḳhne wāloṅ ko wuh hukm dete haiṅ, “hameṅ sachchī royā mat batānā balki hamārī ḳhushāmad karne wālī bāteṅ. farebdih royā dekh kar hamāre āge bayān karo!

¹¹sahīh rāste se haṭ jāo, sīdhī rāh ko chhoṛ do. hamāre sāmne isrāīl ke quddūs kā zikr karne se bāz āo!”

¹²jawāb meṅ isrāīl kā quddūs farmātā hai, “tum ne yih kalām radd karke zulm aur chālākī par bharosā balki pūrā etimād kiyā hai.

¹³ab yih gunāh tumhāre lie us ūṅchī dīwār kī mānind hogā jis meṅ darāṛeṅ paṛ gaī haiṅ. darāṛeṅ phailtī haiṅ aur dīwār baiṭhī jātī hai. phir achānak ek hī lamhe meṅ wuh dhaṛām se zamīnbos ho jātī hai.

¹⁴wuh ṭukṛe ṭukṛe ho jātī hai, bilkul miṭṭī ke us bartan kī tarah jo berahmī se chaknāchūr kiyā jātā hai aur jis kā ek ṭukṛā bhī āg se koele uṭhā kar le jāne yā hauz se thoṛā bahut pānī nikālne ke qābil nahīṅ rah jātā.”

¹⁵rab qādir-e-mutlaq jo isrāīl kā quddūs hai farmātā hai, “wāpas ā kar sukūn pāo, tab hī tumheṅ najāt milegī. ḳhāmosh rah kar mujh par bharosā rakho, tab hī tumheṅ taqwiyat milegī. lekin tum is ke lie tayyār hī nahīṅ the.

¹⁶chūṅki tum jawāb meṅ bole, ‘hargiz nahīṅ, ham apne ghoṛoṅ par sawār ho kar bhāgeṅge’ is lie tum bhāg jāoge. chūṅki tum ne kahā, ‘ham tez ghoṛoṅ par sawār ho kar bach nikleṅge’ is lie tumhārā tāqqub karne wāle kahīṅ zyādā tez hoṅge.

¹⁷tumhāre hazār mard ek hī ādmī kī dhamkī par bhāg jāeṅge. aur jab dushman ke pāṅch afrād tumheṅ dhamkāeṅge to tum sab ke sab farār ho jāoge. āḳhirkār jo bacheṅge wuh pahāṛ kī choṭī par parcham ke ḍanḍe kī tarah tanhā rah jāeṅge, pahāṛī par jhanḍe kī tarah akele hoṅge.”

¹⁸lekin rab tumheṅ mehrbānī dikhāne ke intizār meṅ hai, wuh tum par rahm karne ke lie uṭh khaṛā huā hai. kyūṅki rab insāf kā ḳhudā hai. mubārak haiṅ wuh jo us ke intizār meṅ rahte haiṅ.

¹⁹ai siyyūn ke bāshindo jo yarūshalam meṅ rahte ho, āindā tum nahīṅ ro'oge. jab tum faryād karoge to wuh zarūr tum par mehrbānī karegā. tumhārī sunte hī wuh jawāb degā.

²⁰go māzī meṅ rab ne tumheṅ tangī kī roṭī khilāī aur zulm kā pānī pilāyā, lekin ab terā ustād chhupā nahīṅ rahegā balki terī apnī hī āṅkheṅ use dekheṅgī.

²¹agar dāīṅ yā bāīṅ taraf muṛnā hai to tumheṅ pīchhe se hidāyat milegī, “yihī rāstā sahīh hai, isī par chalo!” tumhāre apne kān yih suneṅge.

²²us waqt tum chāṅdī aur sone se saje hue apne butoṅ kī behurmatī karoge. tum “uf, gandī chīz!” kah kar unheṅ nāpāk kachre kī tarah bāhar phaiṅkoge.

²³bīj bote waqt rab tere khetoṅ par bārish bhej kar behtarīn fasleṅ pakne degā, ġhizāiyatbaḳhsh ḳhurāk muhayyā karegā. us din terī bheṛ-bakriyāṅ aur gāy-bail wasī charāgāhoṅ meṅ chareṅge.

²⁴khetībāṛī ke lie mustāmal bailoṅ aur gadhoṅ ko chhāj aur doshāḳhe ke zarī'e sāf kī gaī behtarīn ḳhurāk milegī.

²⁵us din jab dushman halāk ho jāegā aur us ke burj gir jāeṅge to har ūṅche pahāṛ se nahreṅ aur har bulandī se nāle baheṅge.

²⁶chāṅd sūraj kī mānind chamkegā jabki sūraj kī raushnī sāt gunā zyādā tez hogī. ek din kī raushnī sāt ām dinoṅ kī raushnī ke barābar hogī. us din rab apnī qaum ke zaḳhmoṅ par marham-paṭṭī karke use shifā degā.

²⁷wuh dekho, rab kā nām dūrdarāz ilāqe se ā rahā hai. wuh ġhaiz-o-ġhazab se aur baṛe rob ke sāth qarīb pahuṅch rahā hai. us ke hoṅṭ qahr se hil rahe haiṅ, us kī zabān ke āge āge sab kuchh rākh ho rahā hai.

²⁸us kā dam kināroṅ se bāhar āne wālī nadī hai jo sab kuchh gale tak ḍubo detī hai. wuh aqwām ko halākat kī chhalnī meṅ chhān chhān kar un ke muṅh meṅ dahānā ḍāltā hai tāki wuh bhaṭak kar tabāhkun rāh par āeṅ.

²⁹lekin tum gīt gāoge, aise gīt jaise muqaddas īd kī rāt gāe jāte haiṅ. itnī raunaq hogī ki tumhāre dil phūle na samāeṅge. tumhārī ḳhushī un zāirīn kī mānind hogī jo bāṅsrī bajāte hue rab ke pahāṛ par chaṛhte aur isrāīl kī chaṭān ke huzūr āte haiṅ.

³⁰tab rab apnī bārob āwāz se logoṅ par apnī qudrat kā izhār karegā. us kā saḳht ġhazab aur bhasm karne wālī āg nāzil hogī, sāth sāth bārish kī tez bauchhāṛ aur oloṅ kā tūfān un par ṭūṭ paṛegā.

³¹rab kī āwāz asūr ko pāsh pāsh kar degī, us kī lāṭhī use mārtī rahegī.

³²aur jūṅ jūṅ rab sazā ke laṭh se asūr ko zarb lagāegā tūṅ tūṅ daf aur sarod bajeṅge. apne zor-āwar bāzū se wuh asūr se laṛegā.

³³kyūṅki baṛī der se wuh gaṛhā tayyār hai jahāṅ asūrī bādshāh kī lāsh ko jalānā hai. use gahrā aur chauṛā banāyā gayā hai, aur us meṅ lakaṛī kā baṛā ḍher hai. rab kā dam hī use gandhak kī tarah jalāegā.