Read Roman Urdu Geo yasāyāh 32 Bible Online

yasāyāh 32 - Roman Urdu Geo bible

yasāyāh 32

¹ek bādshāh āne wālā hai jo insāf se hukūmat karegā. us ke afsar bhī sadāqat se hukmrānī kareṅge.

²har ek āṅdhī aur tūfān se panāh degā, har ek registān meṅ nadiyoṅ kī tarah tar-o-tāzā karegā, har ek taptī dhūp meṅ baṛī chaṭān kā sā sāyā degā.

³tab deḳhne wāloṅ kī āṅkheṅ andhī nahīṅ raheṅgī, aur sunane wāloṅ ke kān dhyān deṅge.

⁴jaldbāzoṅ ke dil samajhdār ho jāeṅge, aur hakloṅ kī zabān rawānī se sāf bāt karegī.

⁵us waqt na ahmaq sharīf kahlāegā, na badmāsh ko mumtāz qarār diyā jāegā.

⁶kyūṅki ahmaq hamāqat bayān kartā hai, aur us kā zahan sharīr mansūbe bāndhtā hai. wuh bedīn harkateṅ karke rab ke bāre meṅ kufr baktā hai. bhūke ko wuh bhūkā chhoṛtā aur pyāse ko pānī pīne se roktā hai.

⁷badmāsh ke tarīq-e-kār sharīr haiṅ. wuh zarūratmand ko jhūṭ se tabāh karne ke mansūbe bāndhtā rahtā hai, ḳhwāh ġharīb haq par kyūṅ na ho.

⁸us ke muqābale meṅ sharīf ādmī sharīf mansūbe bāndhtā aur sharīf kām karne meṅ sābitqadam rahtā hai.

⁹ai beparwā aurato, uṭh kar merī bāt suno! ai beṭiyo jo apne āp ko mahfūz samajhtī ho, mere alfāz par dhyān do!

¹⁰ek sāl aur chand ek dinoṅ ke bād tum jo apne āp ko mahfūz samajhtī ho kāṅp uṭhogī. kyūṅki angūr kī fasal zāe ho jāegī, aur phal kī fasal pakne nahīṅ pāegī.

¹¹ai beparwā aurato, laraz uṭho! ai beṭiyo jo apne āp ko mahfūz samajhtī ho, thartharāo! apne achchhe kapṛoṅ ko utār kar ṭāṭ ke libās pahan lo.

¹²apne sīnoṅ ko pīṭ pīṭ kar apne ḳhushgawār khetoṅ aur angūr ke phaldār bāġhoṅ par mātam karo.

¹³merī qaum kī zamīn par āh-o-zārī karo, kyūṅki us par ḳhārdār jhāṛiyāṅ chhā gaī haiṅ. rangraliyāṅ manāne wāle shahr ke tamām ḳhushbāsh gharoṅ par ġham khāo.

¹⁴mahal wīrān hogā, raunaqdār shahr sunsān hogā. qilā aur burj hameshā ke lie ġhār baneṅge jahāṅ janglī gadhe apne dil bahlāeṅge aur bheṛ-bakriyāṅ chareṅgī.

¹⁵jab tak allāh apnā rūh ham par nāzil na kare us waqt tak hālāt aise hī raheṅge. lekin phir registān bāġh meṅ tabdīl ho jāegā, aur bāġh ke phaldār daraḳht jangal jaise ghane ho jāeṅge.

¹⁶tab insāf registān meṅ basegā, aur sadāqat phalte phūlte bāġh meṅ sukūnat karegī.

¹⁷insāf kā phal amn-o-amān hogā, aur sadāqat kā asar abadī sukūn aur hifāzat hogī.

¹⁸merī qaum pursukūn aur mahfūz ābādiyoṅ meṅ basegī, us ke ghar ārāmdih aur puramn hoṅge.

¹⁹go jangal tabāh aur shahr zamīnbos kyūṅ na ho,

²⁰lekin tum mubārak ho jo har nadī ke pās bīj bo sakoge aur āzādī se apne gāy-bailoṅ aur gadhoṅ ko charā sakoge.